Li naxye li Santil Hu naru tooxtenqʼa
Li Santil Hu ak kixtenqʼa chi miyon li qas qiitzʼin rikʼin kaahibʼ chi naʼlebʼ.
1. Li sumlaak
Wank jalan jalanq li naʼlebʼ li nekeʼxkʼoxla li kristiʼaan chirix li sumlaak ut chirix li naʼajmank re naq sahaqebʼ saʼ xchʼool.
LI NAXYE LI SANTIL HU: «Cheejunqal tento teera leerixaqil joʼ naq nekeera eeribʼ. Joʼkan ajwiʼ li ixaqilbʼej qʼaxal troxloqʼi li xbʼeelom» (Efesios 5:33).
LI NARAJ XYEEBʼAL: Li Yos kixaqabʼank re li sumlajik joʼkan naq naxnaw kʼaru naʼajmank re naq li sumal sahaqebʼ saʼ xchʼool (Marcos 10:6-9). Naq li bʼeelomej ut li ixaqilbʼej nekeʼxkʼe xchʼool chiribʼilebʼ ribʼ sahaqebʼ saʼ xchʼool. Joʼkan naq junaq li bʼeelomej li naxra li rixaqil tixkʼutbʼesi rikʼin li xbʼaanuhom. Ut junaq li ixaqilbʼej li naroxloqʼi li xbʼeelom tixkʼutbʼesi rikʼin chanru naraatina.
LI XNAʼLEBʼ LI SANTIL HU NAKʼANJELAK: Laj Quang ut li xThi li rixaqil, li wankebʼ Vietnam, nekeʼxkʼoxla naq maajunwa sahaqebʼ saʼ xchʼool saʼ xsumlajikebʼ. Xbʼaan naq laj Quang kaw nataqlank. Aʼan naxye: «Maakʼaʼ nawaj re li wixaqil ut junelik ninbʼaanu naq trekʼa ribʼ naq maakʼaʼ naʼok wiʼ». Li xThi kiraj xraqbʼal li xsumlajik. Aʼan naxye: «Xwekʼa naq inkʼaʼ chik ninruuk roxloqʼinkil linbʼeelom».
Moqon xeʼok xtzolbʼal li Santil Hu ut xeʼok xyuʼaminkil li naxye Efesios 5:33. Laj Quang naxye: «Li raqal aʼin kitenqʼank we re naq li wixaqil trekʼa naq raaro inbʼaan ut naq ninkʼe inchʼool chirix. Naq ninbʼaanu aʼin, nikinxra ut nikinroxloqʼi». Li xThi naxye: «Ninyal inqʼe chi roxloqʼinkil, joʼ naxye Efesios 5:33. Ut aʼan naxbʼaanu naq twekʼa naq raarokin».
Wi taawaj xnawbʼal xkomon chirix aʼin, sikʼ li naʼlebʼ «Tzol 12 li naʼlebʼ re naq sahaq saʼ xchʼool li junkabʼal», saʼ li hu Ajsi aawu! ajl 2, 2018 saʼ jw.org.
2. Chanru tqilebʼ li junchʼol
Ebʼ li kristiʼaan xikʼ nekeʼril li jalan xtenamit, xpaabʼal malaj xbʼaan ani nawulak chiruhebʼ.
LI NAXYE LI SANTIL HU: «Teeroxloqʼi li jalan jalanq chi qas qiitzʼin» (1 Pedro 2:17).
LI NARAJ XYEEBʼAL: Li Santil Hu naxye naq inkʼaʼ xikʼ tqil li jalanebʼ xtenamit malaj ebʼ li ixqiwinq. Naxye bʼan naq maakʼaʼ naxye bʼar chalenaq junaq li kristiʼaan malaj chanru li xwanjik, tento naq tqoxloqʼihebʼ usta jalan nokoonaʼlebʼak (Hechos 10:34; Mateo 7:12).
LI XNAʼLEBʼ LI SANTIL HU NAKʼANJELAK: Xeʼxkʼut chiru laj Daniel naq li chalenaqebʼ Asia xiwajelebʼ ru. Joʼkan naq xikʼ narilebʼ ut naxkʼehebʼ saʼ xutaan. Aʼan naxye: «Xinkʼoxla naq yookin xtenqʼankil lintenamit, maajunwa xinkʼoxla naq moko us ta yookin chi naʼlebʼak».
Naq laj Daniel kixtzol li Santil Hu, kixye: «Xjalaak chanru ninkʼoxlak. Xinkʼe reetal naq li Yos juntaqʼeet naril chixjunilebʼ li qas qiitzʼin, joʼkan ajwiʼ tento tinbʼaanu laaʼin». Joʼkan naq naxye naq naxnaw ru junaq li kristiʼaan xbʼeen sut inkʼaʼ naxkʼoxla bʼar chalenaq, joʼkan naq wankebʼ ramiiw yalaq bʼar ut qʼaxal naxrahebʼ.
Wi taawaj xnawbʼal xkomon chirix aʼin, sikʼ li naʼlebʼ «Ma wank xbʼanol li tzʼeqtaanank?», saʼ li hu Ajsi aawu! ajl 3, 2020 saʼ jw.org.
3. Li tumin
Naabʼalebʼ li kristiʼaan nekeʼxsikʼ li bʼihomal re naq sahaqebʼ saʼ xchʼool.
LI NAXYE LI SANTIL HU: «Li chaabʼil naʼlebʼ natenqʼank qe; joʼkan ajwiʼ li tumin. Abʼanan najtaq roq li qayuʼam wi wank qachoxahil naʼlebʼ» (Eclesiastés 7:12).
LI NARAJ XYEEBʼAL: Yaal naq naʼajmank li tumin abʼan aʼin inkʼaʼ naxkʼam chaq li sahil chʼoolejil ut inkʼaʼ naru naqakʼojobʼ qachʼool rikʼin (Proverbios 18:11; 23:4, 5). Re naq sahaq saʼ qachʼool ut wanq qoybʼenihom tento tqayuʼami li naxye li Santil Hu (1 Timoteo 6:17-19).
LI XNAʼLEBʼ LI SANTIL HU NAKʼANJELAK: Jun li winq Cardo xkʼabʼaʼ aj Indonesia kixyal xqʼe re naq tbʼihomoʼq, aʼan naxye: «Wank naabʼal lintumin, rajlal ninbʼihajik ut ninloqʼ chixjunil li nawaj». Abʼan kisach chixjunil. Aʼan naxye: «Xineʼxbʼalaqʼi ut xeʼrelqʼa chixjunil li wank we. Usta xinkʼanjelak chiru naabʼal chihabʼ xinkanaak chi maakʼaʼ intumin ut xwekʼa naq maakʼaʼ ninʼok wiʼ».
Anaqwan laj Cardo naxyuʼami li naʼlebʼ li wank saʼ li Santil Hu chirix li tumin, inkʼaʼ chik nakʼanjelak re naq tbʼihomoʼq naxsikʼ bʼan li naʼajmank saʼ li xyuʼam. Aʼan naxye: «Maakʼaʼ chik naxkʼe inkʼaʼuxl ut qʼaxal sa saʼ linchʼool xbʼaan naq wankin saʼ amiiwil rikʼin li Jehobʼa».
Wi taawaj xnawbʼal xkomon chirix aʼin, sikʼ li naʼlebʼ «Ma chaabʼilaq laayuʼam wi wank aatzolbʼal ut aatumin?», saʼ li hu Laj Kʼaakʼalehom ajl 3, 2021 saʼ jw.org.
4. Li wank saʼ wiibʼal
Jalan jalanq nekeʼxkʼoxla li qas qiitzʼin chirix li wank saʼ wiibʼal.
LI NAXYE LI SANTIL HU: «Teetzʼeqtaana li muxuk ibʼ. Li junjunq saʼ eeyanq tento tixnaw chanru xbʼeresinkil li xtibʼel re naq santaq ut kʼulubʼanbʼilaq xbʼaan li Yos. Meekʼam eere rikʼinebʼ li tenamit li inkʼaʼ nekeʼxnaw ru li Yos xbʼaan naq aʼanebʼ qʼaxal nekeʼxrahi ru wank rikʼin winq malaj ixq ut inkʼaʼ nakʼojlaak xchʼoolebʼ» (1 Tesalonicenses 4:3-5).
LI NARAJ XYEEBʼAL: Li Santil Hu naxkʼe li naʼlebʼ chirix li wank saʼ wiibʼal. Saʼ li aatin «muxuk ibʼ» naʼokenk li koʼbʼeetak yumbʼeetak, ebʼ li kristiʼaan li nekeʼwank saʼ wiibʼal ut moko sumsukebʼ ta, naq nekeʼxkʼayi ribʼ, ebʼ li ixqiwinq malaj naq nekeʼxmux ribʼebʼ rikʼinebʼ li xul (1 Corintios 6:9, 10). Li wank saʼ wiibʼal aʼan jun maatan li kʼebʼil re jun li winq ut jun li ixq li sumsukebʼ (Proverbios 5:18, 19).
LI XNAʼLEBʼ LI SANTIL HU NAKʼANJELAK: Li xKylie, li wank Australia, naxye: «Naq toj wankin chaq injunes xinkʼoxla naq wi tinmux wibʼ tintaw li sahil chʼoolejil, abʼan moko joʼkan ta, qʼaxal yook bʼan inkʼaʼuxl ut nawekʼa naq moko rabʼilin ta».
Li xKylie kiʼok xyuʼaminkil li naʼlebʼ li naxkʼe li Santil Hu. Aʼan naxye: «Li Yos inkʼaʼ naraj naq tqakʼul li rahilal ut li chʼaʼajkilal, anaqwan nawekʼa naq rabʼilin xbʼaan linbʼeelom, xbʼaan naq yooko xbʼaanunkil li nawulak chiru li Jehobʼa. Sa nawekʼa wibʼ xbʼaan naq nikinxtenqʼa li Santil Hu».
Wi taawaj xnawbʼal xkomon chirix aʼin, sikʼ li naʼlebʼ «Kʼaru naxye li Santil Hu chirix li kaʼajwiʼ nekeʼxlaqʼabʼ ribʼ?», saʼ jw.org.
Li Jehobʼa naxye qe bʼar wank li us ut li inkʼaʼ us. Usta wank sut nachʼaʼajkoʼk chiqu xpaabʼankil, abʼan wank rusilal. Xbʼaan naq wi tooʼabʼinq chiru sahaq saʼ qachʼool chi junelik.
