Paabʼajel li naxye li Santil Hu chirix li us ut inkʼaʼ us
Moko chʼolchʼo ta chiqu wi us tooʼelq wi kaʼajwiʼ naqakʼojobʼ qachʼool rikʼin li naqakʼoxla ut rikʼin li nekeʼxye li junchʼol. Xbʼaan naq paabʼajel li Santil Hu aʼan nokooxtenqʼa chi rilbʼal kʼaru us ut inkʼaʼ us re naq sahaq saʼ qachʼool.
NAʼAJMANK XTENQʼ LI YOS
Li Santil Hu naxye naq ebʼ li kristiʼaan inkʼaʼ nekeʼruuk xbʼeresinkilebʼ ribʼ xjunes, naʼajmank bʼan li xtenqʼ li Jehobʼa a (Jeremías 10:23). Joʼkan naq kixkʼe qe li Santil Hu xbʼaan naq inkʼaʼ naraj naq tqakʼul li rahilal rikʼin li xqasikʼ xbʼaanunkil (Deuteronomio 5:29; 1 Juan 4:8). Aʼan laj Yobʼtesinel qe ut aʼan junelik naxkʼe qe li chaabʼil naʼlebʼ (Salmo 100:3; 104:24). Abʼan inkʼaʼ naxmin qu re naq tqapaabʼ.
Li Jehobʼa kixkʼe re laj Adán ut li xʼEva chixjunil re naq sahaqebʼ saʼ xchʼool (Génesis 1:28, 29; 2:8, 15). Kixkʼe ajwiʼ rehebʼ li naʼlebʼ re naq teʼabʼinq chiru abʼan moko kixminebʼ ta ru (Génesis 2:9, 16, 17). Ra xyeebʼal abʼan laj Adán ut li xʼEva inkʼaʼ xeʼabʼink chiru (Génesis 3:6). Ma us nokooʼelk naq naqasikʼ kʼaru xbʼaanunkil saʼ li qayuʼam? Inkʼaʼ, moko us ta nokooʼelk xbʼaan naq saʼ xnumikebʼ li chihabʼ xqil naq wi inkʼaʼ naqabʼaanu li naxye qe li Yos moko sa ta qachʼool (Eclesiastés 8:9).
Li Santil Hu nokooxtenqʼa xsikʼbʼal li us maakʼaʼ naxye bʼar chalenaqo (2 Timoteo 3:16, 17; chaawil li kaaxukuut « Jun li hu choʼq re chixjunil li kristiʼaan»). Qilaq chanru.
Tzol kʼaʼut naq li Santil Hu aʼan li Raatin li Yos (1 Tesalonicenses 2:13). Chaawil li bʼideo Ani aj kʼaʼuxl wank saʼ li Santil Hu? saʼ jw.org.
LI YOS NOKOORAATINA RIKʼIN LI SANTIL HU
Chisaʼ naxye chanru li Yos naxkʼam ribʼ rikʼinebʼ li kristiʼaan junxil. Chisaʼ wank chanru li Jehobʼa naril li us ut li inkʼaʼ us ut chanru tooruuq xtawbʼal li rusilal (Salmo 19:8, 12). Ebʼ li naʼlebʼ aʼin junelik nokooʼeʼxtenqʼa.
Jun eetalil, Proverbios 13:20 naxye: «Li narochbʼeenihebʼ li chaabʼilebʼ xnaʼlebʼ, tixtaw xnaʼlebʼ; abʼan li nawank rikʼinebʼ li jip, taasachq chi junwaakaj». Li xnaʼlebʼ li Santil Hu toj nakʼanjelak anaqwan (chaawil li kaaxukuut « Li xnaʼlebʼ li Santil Hu junelik nakʼanjelak»).
Maare nakaakʼoxla: «Chanru ninnaw naq li Santil Hu tinxtenqʼa?». Saʼ li jun chik tzolom tqil aʼin.
