Kʼaru taabʼaanu wi taawaj xik saʼ jun li naʼaj li inkʼaʼ nakaanaw bʼar wank?

1. 1. Kʼam saʼ li bʼe li nakaakʼoxla naq us.

2. 2. Taaqihebʼ li nekeʼxnaw li bʼe.

3. 3. Naru nakaawoksi li GPS malaj reetalil li tenamit ut xpatzʼbʼal re junaq laawamiiw li naxnaw li bʼe re naq tatxtenqʼa.

Wi taawoksi li xbʼeen malaj li xkabʼ naʼlebʼ naru tatwulaq saʼ junaq li naʼajej. Abʼan wi taawoksi li rox chʼolchʼo naq tatwulaq bʼarwiʼ taawaj wulak.

Li qayuʼam chanchan li bʼihaajik ut chiqajunilo naqaj naq tooxkʼam saʼ li sahil chʼoolejil. Aʼ yaal bʼar tqataw qatenqʼ re xsikʼbʼal kʼaru xbʼaanunkil saʼ li qayuʼam tixbʼaanu ma tqataw li sahil chʼoolejil malaj inkʼaʼ.

Naabʼal li naʼlebʼ li naqasikʼ xbʼaanunkil maakʼaʼ mas xwankil abʼan wank wiibʼ oxibʼ naxjal li qayuʼam. Ebʼ li naʼlebʼ aʼin naxkʼut kʼaru naqakʼoxla chirix li us ut li inkʼaʼ us. Ut aʼin naru nokooxtenqʼa joʼ junkabʼal malaj inkʼaʼ. Saʼin nekeʼokenk li naʼlebʼ aʼin:

• li wank saʼ wiibʼal ut li sumlaak

• xyeebʼal li yaal, kʼanjelak ut tumin

• xkʼiresinkilebʼ li kokʼal

• chanru rilbʼalebʼ li junchʼol

Chanru nakaanaw naq li nakaasikʼ xbʼaanunkil tixkʼam chaq li sahil chʼoolejil saʼ laajunkabʼal?

Chiqajunilo naru naqakʼoxla aʼin: «Kʼaru ttenqʼanq we chi xsikʼbʼal li nawaj xbʼaanunkil saʼ linyuʼam?».

Li hu aʼin tixchʼolobʼ kʼaʼut naq paabʼajel li naxye li Santil Hu chirix li us ut li inkʼaʼ us.