Resil xyuʼamebʼ laj kʼanjel chirix li Xʼawabʼejilal li Yos

Kixtaw xyaalal li xyuʼam

Li Jesús kixye naq naxnawebʼ ru chiʼus li xkarneer (Juan 10:14). Wi junaq li poyanam chaabʼil xchʼool ut naxra li tuqtuukilal ut li tiikilal t-aalaq saʼ xchʼool xtaqenkil li Jesús. Tixtaw rusilal li xyuʼam joʼ kixkʼul jun li ixq aj Bélgica. Aʼin li resil li xyuʼam:

«Naq ebʼ laj testiiw re li Jehobʼa xeʼwulak saʼ wochoch jwal ra inchʼool ut xwaj raj xkamsinkil wibʼ. Jwal kiwulak chiwu li keʼxye chirix chanru ttuqubʼamanq ru li chʼaʼajkilal li wank saʼ xbʼeen li ruuchichʼochʼ, abʼanan moko xwulak chiwu naq aʼin kaʼajwiʼ li Yos truuq xbʼaanunkil. Waqxaqibʼ chihabʼ wokik chi xkanabʼankil li paabʼal xbʼaan naq xikʼ nawil naq ebʼ laj paabʼanel aj kaʼpakʼal u. Abʼanan, xwil chiʼus naq ebʼ laj testiiw re li Jehobʼa nekeʼxye li yaal. Ut rikʼin li xeʼxye we xintaw ru naq jwal chʼaʼaj linwanjik wi maakʼaʼ li Yos saʼ linyuʼam.

»Wiibʼ oxibʼ sut ajwiʼ xinʼaatinak rikʼinebʼ laj testiiw re li Jehobʼa ut moqon inkʼaʼ chik xinruuk. Rikʼin aʼin moko sa ta xwekʼa wibʼ. Joʼkan naq xinʼok xmayinkil wiibʼ pakeet li may chiru jun kutan ut xinʼok ajwiʼ roksinkil li bʼan li nakanobʼresink u. Saʼ xkʼabʼaʼ naq nawaj aatinak rikʼin linyuwaʼchin li ak kamenaq chik, xinʼok roksinkilebʼ laj qʼe. Kʼajoʼ xyibʼal ru li xinkʼul! Chiru qʼoqyink nikineʼxrahobʼtesi li maaʼus aj musiqʼej ut aʼin xinkʼul chiru naabʼal po. Joʼkan naq kʼajoʼ naxkʼe inxiw naq ninkanaak injunes.

»Saʼ jun kutan naq xinʼelk chi bʼeek xinchap jalan chik li bʼe ut xinwulak bʼarwiʼ yookebʼ xkabʼlankil jun li nimla ochoch. Xsach inchʼool rilbʼalebʼ naabʼal li qas qiitzʼin li yookebʼ chi kabʼlak. Naq xinjilok chi rilbʼalebʼ xinkʼe reetal naq aʼanebʼ laj testiiw re li Jehobʼa li yookebʼ xkabʼlankil jun li Chʼutlebʼaal Kabʼl. Xnaq saʼ inchʼool naq nikineʼrulaʼani saʼ wochoch ut xinkʼoxla naq jwal chʼinaʼus raj naq chixjunilebʼ li qas qiitzʼin teʼwanq raj joʼebʼ aʼan.

»Kʼajoʼ ninrahi naq tineʼrulaʼani wiʼ chik joʼkan naq xinʼaatinak rikʼin wiibʼ oxibʼ rehebʼ li yookebʼ chi xkabʼlankil li Chʼutlebʼaal Kabʼl. Xintijok chiru li Yos ut lajeebʼ kutan chirix aʼin xwulak saʼ wochoch li ak naʼulaʼanink ajwiʼ we. Kixyeechiʼi intzolbʼal ut chi anchal inchʼool xinkʼulubʼa. Chirix chik aʼan, xineʼxbʼoq saʼebʼ li chʼutam ut xinkʼulubʼa xik. Xsach inchʼool naq xwil chanruhebʼ! Junxil wokik xsikʼbʼalebʼ li kristiʼaan li sahaqebʼ saʼ xchʼool ut nekeʼxra ribʼ chiribʼilebʼ ribʼ ut toj aran xintawebʼ.

»Xintikibʼ xik saʼebʼ li chʼutam chi rajlal. Wiibʼ oxibʼ xamaan chirix aʼin xinkanabʼ mayibʼk. Xinkut chi najt li tasal hu re qʼehink ut ebʼ li bʼich li naʼaatinak chirix laj Tza ut aʼin xbʼaanu naq ebʼ li maaʼus aj musiqʼej teʼxkanabʼ inrahobʼtesinkil. Xinʼok xyuʼaminkil li naʼlebʼ li naxkʼe li Santil Hu, oxibʼ po chirix aʼin, xinʼok xkʼebʼal chi naweʼk li chaabʼil esil. Waqibʼ po chik chirix aʼin, xkubʼeek inhaʼ ut wiibʼ kutan chirix xkubʼik inhaʼ, xinʼok xkʼebʼal 50 hoor saʼ li puktesink.

»Jwal ninbʼanyoxi re li Jehobʼa chixjunil li kixbʼaanu chiwix. Xintaw xyaalal linyuʼam. Relik chi yaal li xkʼabʼaʼ li Jehobʼa aʼan jun li kawubʼresinbʼil ochoch bʼarwiʼ xintaw li kolbʼa ibʼ (Proverbios 18:10). Nawekʼa wibʼ joʼ laj Salmiist naq kixye: “Jwal us choʼq we li wank jun kutanaq saʼ xnebʼaal laamuhebʼaal chiru linwanjik saʼ li wochoch chiru kʼiila chihabʼ; qʼaxal ninrahi ru hilank saʼ xmu rochoch linYos chiru li wank saʼ xmuhebʼaalebʼ li inkʼaʼ usebʼ xchʼool”».

Li ixq aʼin li tuulan xchʼool kixtaw rusilal li xyuʼam. Joʼkan ajwiʼ tixtaw rusilal xyuʼam yalaq ani li kristiʼaan li tixsikʼ li Jehobʼa chi anchal xchʼool.