Xpatzʼom ebʼ laj ilol hu

Chirix ani yook chi aatinak laj Pablo saʼ 2 Corintios 6:14, Li Santil Hu, Sociedad Bíblica de Guatemala, SBG, naq kixye ebʼ li «maakʼaʼ nekeʼxpaabʼ»?

Saʼ 2 Corintios 6:14 naxye, SBG: «Meelaqʼabʼ eeribʼ rikʼinebʼ li maakʼaʼ nekeʼxpaabʼ». Li xkomon li naʼlebʼ naxkʼut naq laj Pablo yook chaq chi aatinak chirixebʼ li kristiʼaan li maawaʼebʼ aj paabʼanel. Jalan chik ebʼ li xraqal li Santil Hu naxkʼut naq li apóstol kiroksi li aatin «maakʼaʼ» naxpaabʼ malaj «maakʼaʼ nekeʼxpaabʼ» naxkʼut kʼaru naraj xyeebʼal li aatin aʼin.

Jun eetalil, laj Pablo kixqʼusebʼ ebʼ laj paabʼanel xbʼaan naq yookebʼ xkʼambʼal ebʼ li rechpaabʼanelil «saʼ xraqlebʼaal aatin ebʼ li inkʼaʼ nekeʼpaabʼank» (1 Corintios 6:6, SBG). Saʼebʼ chaq li kutan aʼan, ebʼ li inkʼaʼ nekeʼpaabʼank aʼanebʼ chaq laj raqol aatin saʼ li tenamit Corinto. Saʼ li xkabʼ esil hu li kixtzʼiibʼa laj Pablo, naxye naq laj Tza «xmutzʼoʼbʼresi li xkʼaʼuxebʼ» li maakʼaʼ nekeʼxpaabʼ re naq inkʼaʼ tsaqenkoʼq chiruhebʼ li chaabʼil esil. Ebʼ li kristiʼaan aʼin inkʼaʼ nekeʼxkʼutbʼesi naq nekeʼraj kʼanjelak chiru li Jehobʼa, xbʼaan naq li apóstol kixchʼolobʼ saʼ wiibʼ oxibʼ li raqal rubʼelaj: Naq naʼuxk sutqʼiik rikʼin li Jehobʼa «aran taaʼisiiq li tʼikr» (2 Corintios 3:16, SBG; 4:4, SBG).

Wiibʼ oxibʼ li maakʼaʼ nekeʼxpaabʼ nekeʼxbʼaanu li yibʼ aj naʼlebʼ malaj xloqʼoninkil li pechʼbʼil yos (2 Corintios 6:15, 16). Abʼanan, moko chixjunilebʼ ta xikʼ nekeʼilok re ebʼ laj kʼanjel chiru li Yos. Wankebʼ nekeʼraj xnawbʼal li yaal. Naabʼalebʼ wankebʼ xsumʼaatin aj paabʼanelebʼ ut inkʼaʼ nekeʼxkanabʼ (1 Corintios 7:12-14; 10:27; 14:22-25; 1 Pedro 3:1, 2). Abʼanan laj Pablo, kiroksi li aatin «maakʼaʼ naxpaabʼ» re aatinak chirixebʼ li inkʼaʼ nekeʼtzʼaqonk saʼ li chʼuut bʼarwiʼ wankebʼ li nekeʼxpaabʼ «li Qaawaʼ» (Hechos 2:41; 5:14, SBG; 8:12, 13).

Li naʼlebʼ li natawmank saʼ 2 Corintios 6:14 aʼan jun li chaabʼil naʼlebʼ choʼq rehebʼ laj paabʼanel saʼ yalaq kʼaru chi naʼlebʼil ut kokʼaj xsaʼ nayemank rehebʼ li nekeʼraj sumlaak (Mateo 19:4-6). Laj paabʼanel li xqʼaxtesi xyuʼam chiru li Jehobʼa ut xkubʼeek xhaʼ tento naq tnaʼlebʼaq chiʼus ut moko tixsikʼ ta junaq xsumʼaatin saʼ xyanqebʼ li maakʼaʼ nekeʼxpaabʼ xbʼaan naq li xnaʼlebʼ, li naxsikʼ xbʼaanunkil ut li naxpaabʼ moko juntaqʼeeta ta rikʼin li naxbʼaanu junaq tzʼaqal aj paabʼanel.

Abʼan, kʼaru nayeemank chirixebʼ li nekeʼxtzol li Santil Hu ut nekeʼwulak saʼ li chʼuut? Ut ebʼ laj puktesinel li maajiʼ nekeʼxsubʼ ribʼ saʼ haʼ? Ma chixjunilebʼ aʼan maakʼaʼ nekeʼxpaabʼ? Inkʼaʼ. Ebʼ li xeʼxkʼulubʼa li yaal chirix li chaabʼil esilal ut yookebʼ chi kʼiik re naq teʼkubʼeeq xhaʼ inkʼaʼ naru naqaye naq maakʼaʼ nekeʼxpaabʼ (Romanos 10:10; 2 Corintios 4:13). Naq toj maajiʼ nakubʼeek xhaʼ, laj Cornelio nawbʼil chaq ru joʼ jun li winq «chaabʼil xchʼool ut naxpaabʼ li Yos» (Hechos 10:2, SBG).

Saʼ xkʼabʼaʼ li naʼlebʼ li natawmank saʼ 2 Corintios 6:14 ma inkʼaʼ naru junaq laj paabʼanel li ak xqʼaxtesi xyuʼam re li Jehobʼa naq twanq saʼ aatin ut tsumlaaq rikʼin junaq li xkʼulubʼa wank joʼ aj puktesinel li maajiʼ naxsubʼ ribʼ saʼ haʼ? Inkʼaʼ. Kʼaʼut? Joʼ naxye li naʼlebʼ li kixkʼe li apóstol Pablo choʼq rehebʼ li nebʼaʼ ixq. Kixtzʼiibʼa: «Achʼabʼanbʼil chik li ixq chi sumlaak rikʼin jalan chik li tixkʼul wiʼ xchʼool, abʼan kaʼajwiʼ joʼ naraj li Qaawaʼ» (1 Corintios 7:39, SBG). Saʼ xkʼabʼaʼ li naʼlebʼ aʼin nayemank rehebʼ laj paabʼanel li kubʼenaqebʼ xhaʼ naq kaʼajwiʼ teʼxsikʼ li sumʼaatin «saʼ xkʼabʼaʼ li Qaawaʼ».

Kʼaru naraj xyeebʼal li aatin «saʼ xkʼabʼaʼ li Qaawaʼ» ut «saʼ xkʼabʼaʼ li Kriist»? Saʼ Romanos 16:8-10, SBG ut Colosenses 4:7, laj Pablo kiʼaatinak chirixebʼ li kristiʼaan li wankebʼ «saʼ xkʼabʼaʼ li Kriist» malaj «saʼ xkʼabʼaʼ li Qaawaʼ». Naq naqil ebʼ li raqal aʼin, naqakʼe reetal naq ebʼ li kristiʼaan aʼin aʼanebʼ «aj tenqʼ», «kʼulubʼanbʼilebʼ xbʼaan li Yos», «qaraarokil hermaan», «chaabʼil aj kʼanjel» ut «qech moosil».

Joqʼe naʼok junaq li qas qiitzʼin joʼ qech «moosil chiru li Qaawaʼ»? Naq junaq naxbʼaanu chi anchal xchʼool li naxbʼaanu junaq li moos ut naxkanabʼ li nawulak chiru. Li Jesús kixye: «Wi ani naraj intaaqenkil, mixra ribʼ, chixchapaq li xkrus [“li xcheʼ”, TNM] ut chinxtaaqehaq» (Mateo 16:24, SBG). Li kristiʼaan aʼin naxtaqe li Kriist naq naxbʼaanu li rajom li Yos ut naxqʼaxtesi li xyuʼam chiru. Moqon, naxsubʼ ribʼ saʼ haʼ ut naʼok joʼ aj kʼanjel chiru li Jehobʼa. a Joʼkan bʼiʼ, «sumlaak joʼ naraj li Qaawaʼ» naraj xyeebʼal sumlaak rikʼin li naxkʼutbʼesi naq aʼan jun tzʼaqal aj paabʼanel ut «aj kʼanjel chiru li Yos ut chiru li Qaawaʼ Jesukriist» (Santiago 1:1, SBG).

Li kristiʼaan li yook xtzolbʼal li Santil Hu rikʼinebʼ laj testiiw re li Jehobʼa ut yook chi kʼiik saʼ li xpaabʼal xkʼulubʼ naq tqakʼe xsahil xchʼool. Abʼanan, toj maajiʼ naxqʼaxtesi li xyuʼam chiru li Jehobʼa ut maajiʼ naxkʼulubʼa kʼanjelak chiru. Toj yook xjalbʼal li xnaʼlebʼ ut toj wank xkomon li tento tixjal li nakʼanjelak re naq t-oq joʼ tzʼaqal aj paabʼanel, tixqʼaxtesi li xyuʼam chiru li Jehobʼa ut tkubʼeeq xhaʼ, naq toj maajiʼ naxbʼaanu junaq li naʼlebʼ li wank xwankil saʼ li xyuʼam, joʼ li sumlaak.

Ma us naq junaq laj paabʼanel tixtikibʼ wank saʼ aatin rikʼin junaq li yook chi kʼiik saʼ li xpaabʼal ut naroybʼeni naq tixsubʼ ribʼ saʼ haʼ re naq kokoo tsumlaaq rikʼin? Inkʼaʼ. Li naraj xbʼaanunkil li yook chi tzolok chirix li Santil Hu moko chʼolchʼooq ta ru wi naxnaw naq junaq li hermaan li ak xqʼaxtesi xyuʼam chiru li Jehobʼa naraj sumlaak rikʼin abʼan inkʼaʼ naxbʼaanu xbʼaan naq toj maajiʼ nakubʼeek xhaʼ.

Ak re naq li natzolok chirix li Santil Hu toj nawank joʼ aj puktesinel li toj maajiʼ naxsubʼ ribʼ saʼ haʼ, toj tixkʼutbʼesi naq kikʼiik saʼ li xpaabʼal re naq tkubʼeeq xhaʼ. Joʼkan naq, li naʼlebʼ li natawmank chirix naq kaʼajwiʼ teʼsumlaaq saʼ xkʼabʼaʼ li Qaawaʼ wank xyaalal. Ut kʼaru nakʼulmank rikʼin junaq li ak wank chik xchihabʼ re sumlaak, kikʼiik saʼ li paabʼal, nakʼanjelak saʼ li chʼuut chiru naabʼal chihabʼ ut wank joʼ aj puktesinel li toj maajiʼ nakubʼeek xhaʼ? Wi joʼkan nakʼulmank, kʼaru naramok chiru xqʼaxtesinkil li xyuʼam chiru li Jehobʼa? Kʼaʼut naq toj maajiʼ naxbʼaanu? Kʼaru nakʼehok re xkʼaʼuxl? Usta moko aʼan ta jun rehebʼ li maakʼaʼ nekeʼxpaabʼ inkʼaʼ naru naqaye naq wank «saʼ xkʼabʼaʼ li Qaawaʼ».

Li naʼlebʼ li kixkʼe li apóstol Pablo chirix li sumlaak naxkʼam chaq rusilal saʼ li qayuʼam (Isaías 48:17). Naq saʼ xkabʼichalebʼ li nekeʼxkʼoxla sumlaak ak xqʼaxtesihomebʼ li xyuʼam chiru li Jehobʼa, kawaq li xsumlajikebʼ ut li xpaabʼalebʼ. Naq junajebʼ ru li xnaʼlebʼ ut li nekeʼxsikʼ xbʼaanunkil naxbʼaanu naq qʼaxal sahaqebʼ saʼ xchʼool. Joʼkan ajwiʼ, naq «nokoosumlaak joʼ naraj li Qaawaʼ», naqakʼutbʼesi naq tiik qachʼool chiru ut aʼin naxkʼam chaq naabʼal li osobʼtesihom xbʼaan naq li Yos naruxtaana ru «li naʼuxtaanank u» (Salmo 18:26, SBG).

[Kʼe reetal]

[Jalam u]

Li Yos naruxtaana ru «li naʼuxtaanank u»