Li tijok: Bʼar ut joqʼe tootijoq?
SAʼ CHIXJUNIL ebʼ li bʼalaqʼil paabʼal nekeʼxxaqabʼ jun li naʼaj ut li hoonal re tijok. Abʼan ma aʼan ajwiʼ naxye li Santil Hu?
Yaal naq naxye naq wank li hoonal li tooruuq chi tijok, li Jesús kitijok naq toj maajiʼ nawaʼak (Lucas 22:17). Ebʼ li xtzolom nekeʼtijok ajwiʼ naq nekeʼxchʼutubʼ ribʼ chi loqʼonink. Aʼin moko jun ta akʼ naʼlebʼ ak nekeʼxbʼaanu saʼebʼ li xchʼutlebʼaal kabʼl laj judiiy ut saʼ li rochoch li Yos aran Jerusalén bʼarwiʼ li Yos kiraj naq aʼanaq li rochoch re «tijok choʼq re chixjunilebʼ li tenamit» (Marcos 11:17, SBG).
Li Yos naraj naq ebʼ laj kʼanjel chiru teʼxchʼutubʼ ribʼ, junaj ru li xkʼaʼuxebʼ naq teʼtijoq ut naq tixchap ribʼ rikʼin li naʼlebʼ li wank saʼ li Santil Hu. Ebʼ li tij aʼin naru naxbʼaanu naq junaq tixbʼaanu junaq li naʼlebʼ li maajunwa kixkʼoxla xbʼaanunkil (Hebreos 13:18, 19). Joʼkan naq ebʼ laj testiiw re li Jehobʼa nekeʼtijok saʼ chixjunil ebʼ li xchʼutam. Wi taawaj rabʼinkil li xtijebʼ naru nakatwulak saʼ li Chʼutlebʼaal Kabʼl rehebʼ laj Testiiw li nachʼ wank chaakʼatq.
Abʼanan li Santil Hu moko naxye ta naq wank junaq li hoonal malaj li naʼaj re tijok, li naxye bʼan aʼan naq ebʼ laj kʼanjel chiru nekeʼtijok yalaq kʼaru hoonal ut naʼaj. Li Jesús kixye: «Aʼut laaʼat, naq tattijoq, okan saʼ laawochoch, tzʼap li okebʼaal ut tijon chiru laaYuwaʼ li wank saʼ muqmu; ut laaYuwaʼ li naril li kʼaru wank saʼ muqmu, tatxqʼajkamu» (Mateo 6:6, SBG).
Naru nokootijok chiru li Yos yalaq joqʼe hoonal ut yalaq bʼar
Peʼyaal naq kʼajoʼ xchaabʼilal xnawbʼal naq naru nokootijok chiru laj Yobʼtesinel ut aʼan toorabʼi maakʼaʼ naxye joqʼe ut bʼar tootijoq? Aʼin naxchʼolobʼ kʼaʼut naq li Jesús kixsikʼ xhoonal re tijok naq wank xjunes. Jun sut kitijok chiru jun qʼoqyink naq tento kixbʼaanu jun li naʼlebʼ li jwal wank xwankil chiru (Lucas 6:12, 13).
Wankebʼ ajwiʼ winq ut ixq li maajunwa xeʼxtzʼeqtaana li Jehobʼa xeʼtijok chiru naq xeʼxsikʼ kʼaru xbʼaanunkil saʼebʼ li xyuʼam ut naq wankebʼ saʼ chʼaʼajkilal. Maakʼaʼ naxye ma xeʼtijok saʼ kawil kuxej malaj saʼ xchʼoolebʼ, saʼ chʼuutal malaj xjunesebʼ, li wank xwankil aʼan naq xeʼtijok. Li Jehobʼa kixye: «Junelik chextijoq» (1 Tesalonicenses 5:17, SBG). Li Jehobʼa narabʼihebʼ li xtij ebʼ laj kʼanjel chiru maakʼaʼ naxye jarubʼ sut nekeʼxbʼaanu. Peʼyaal naq aʼin jun li chaabʼil naʼlebʼ li naxkʼe qe li Jehobʼa.
Usta joʼkan naabʼalebʼ nekeʼxkʼoxla, ma wank tawiʼ xwankil li tijok? Maare joʼkan ajwiʼ nakaakʼoxla laaʼat.
Maare twulaq ajwiʼ chaawu
LAJ KʼAAKʼALEHOM
Li tijok: Kʼaru aj e naq tootijoq?
Li tijok naxkʼam chaq rusilal choʼq re li qajunxaqalil, re naq sa tqekʼa qibʼ ut re naq kaw wanqo saʼ li qapaabʼal