WANK naabʼal li tij, abʼan wank jun li rajlal nayeemank: li tij li kixkʼut li Jesús ut moko naabʼalebʼ ta nekeʼxtaw ru kʼaru naraj xyeebʼal. Chi miyon li kristiʼaan nekeʼxye li tij aʼin naabʼal sut chiru li kutan. Abʼan moko aʼin ta li kixkʼut li Jesús, chanru naqanaw aʼin?

Naq toj maajiʼaq xkutbʼal kixye aʼin: «Naq textijoq, meeye kʼiila aatin» (Mateo 6:7, SBG). Li Jesús moko kixjalpaqi ta ribʼ naq moqon kixkʼut jun li tij li tento teʼxtzol ut teʼxye wulaj wulaj li kiraj bʼan xkʼutbʼal aʼan chirix kʼaru tootijoq. Joʼkan bʼiʼ qatzʼilaq rix li junjunq chi naʼlebʼ li wank saʼ li tij li natawmank saʼ Mateo 6:9-13.

Li Jesús kixjultika rehebʼ li xtzolom naq teʼtijoq, tento teʼxbʼaanu chiru li Xyuwaʼ, li Jehobʼa. Abʼan, kʼaʼut kiyeemank naq tsantobʼresiiq li xkʼabʼaʼ?

Chalen chaq saʼ xtiklajik kiyeemank naabʼal li tikʼtiʼ chirix li xkʼabʼaʼ li Yos. Laj Tza li xikʼ naʼilok re li Jehobʼa naxye naq Yos aj tikʼtiʼ, aj pix ut naq inkʼaʼ naxnaw awabʼejink saʼ xbʼeen li xyobʼtesihom (Génesis 3:1-6). Li nekeʼxtaqe laj Tza nekeʼxkʼut naq li Yos narahobʼtesink, naʼeqajunk ut moko nekeʼxkʼulubʼa ta naq aʼan kiyobʼtesink re chixjunil. Wankebʼ ajwiʼ xeʼrisi li xkʼabʼaʼ saʼ li Santil Hu ut nekeʼxram chiruhebʼ li kristiʼaan re naq inkʼaʼ teʼroksi.

Abʼan li Santil Hu naxye naq li Yos chi seebʼ tixsach chixjunil aʼin (Ezequiel 39:⁠7). Ut naq tixbʼaanu, tixtuqubʼ ru chixjunil ebʼ li chʼaʼajkilal. Chanru tixbʼaanu? Li Jesús kixchʼolobʼ naq kixye ebʼ li aatin aʼin.

Saʼebʼ li qakutan, ebʼ laj kʼamolbʼe saʼebʼ li bʼalaqʼil paabʼal inkʼaʼ nekeʼxkʼe ribʼ saʼ aatin chirix kʼaru li Xʼawabʼejilal li Yos. Moko kikʼulmank ta aʼin naq li Jesús kiwank saʼ Ruuchichʼochʼ. Ebʼ laj judiiy nekeʼxnaw jun li propesiiy li naʼaatinak chirix li Mesiiy, li Sikʼbʼil ru xbʼaan li Yos, li tixjolomi jun li Awabʼejilal li tixchaabʼilobʼresi chixjunil li Ruuchichʼochʼ (Isaías 9:6, 7; Daniel 2:44). Li Awabʼejilal aʼin tixsantobʼresi li xkʼabʼaʼ li Jehobʼa naq trisi chi kutankil li xtikʼtiʼ laj Tza, tixsach laj Tza ut chixjunil li xkʼanjel. Tixsach ajwiʼ li yalok u, li yajel, li weʼej ut li kamk (Salmo 46:10; 72:12-16; Isaías 25:8; 33:24). Joʼkan bʼiʼ, naq naqatzʼaama re li Yos naq tchalq li Xʼawabʼejilal yooko xyeebʼal re, naq tqaj naq ttzʼaqloq ru ebʼ li yeechiʼom aʼin.

Ebʼ li aatin aʼin naxkʼutbʼesi naq li rajom li Yos ttzʼaqloq ru saʼ Ruuchichʼochʼ joʼ chanru xtzʼaqlok ru saʼ choxa naq li Jesús kirisi chaq laj Tza ut ebʼ li maaʼus aj musiqʼej ut kixkutebʼ chaq saʼ Ruuchichʼochʼ (Apocalipsis 12:​9-12). Li oxibʼ chi naʼlebʼ li ak xqil naxjultika chiqu naq tqakʼe qachʼool chirix li rajom li Yos ut maawaʼ chirix li kʼaru naqaj. Xbʼaan naq chiqajunilo tqataw rusilal naq ttzʼaqloq ru li rajom li Yos. Ut aʼin chʼolchʼo chiru li Jesús joʼkan naq kixye: «Inkʼaʼ chiʼuxmanq li nawaj laaʼin, aʼ bʼan laawajom laaʼat» (Lucas 22:42, SBG).

Li Jesús kixye ajwiʼ naq naru tootijoq chirix li naʼajmank chiqu. Joʼ naqakʼe reetal maakʼaʼ reekʼ naq tqapatzʼ re li Yos naq tooxtenqʼa rikʼin li naʼajmank chiqu rajlal kutan. Naq naqabʼaanu aʼin chʼolchʼo chiqu naq li Jehobʼa aʼan «li nakʼehok re li qayuʼam chiqajunilo, li qamusiqʼ ut chixjunil li kʼaʼaq re ru» (Hechos 17:25, SBG). Li Santil Hu naxjuntaqʼeeta rikʼin jun li chaabʼil yuwaʼbʼej li naxkʼe rehebʼ li ralal xkʼajol li naʼajmank chiruhebʼ ut moko tixkʼe ta rehebʼ li kʼaru tixkʼe saʼ xiwxiwal li xyuʼamebʼ.

Kʼaru qamaak wank chiru li Jehobʼa? Ut kʼaʼut naʼajmank naq tixkuy qamaak? Wankebʼ inkʼaʼ chik nekeʼxnaw kʼaru li maak abʼan li Santil Hu naxye naq aʼan xxeʼil chixjunil li qachʼaʼajkilal saʼ xyanq aʼin wank li kamk. Xbʼaan naq ak maakobʼk rajlal nokoomaakobʼk chiru li Yos. Joʼkan bʼiʼ wi naqaj wank chi junelik aajel ru naq li Yos tixkuy qamaak (Romanos 3:23; 5:12; 6:23). Abʼan li Santil Hu naxye naq li Jehobʼa chaabʼil ut naraj xkuybʼal qamaak (Salmo 86:5).

Aajel ru naq li Jehobʼa tooxkol. Naabʼalebʼ inkʼaʼ nekeʼxpaabʼ naq wank li maaʼus, aʼ laj Tza. Abʼan chiru li Jesús chʼolchʼo chiru naq wank joʼkan naq kixkʼabʼaʼi «laj Taqlanel saʼ xbʼeen li ruuchichʼochʼ» (Juan 12:31; 16:11, SBG). Laj Tza moko kʼojkʼo ta xchʼool rikʼin bʼalaqʼink ut xbʼaanunkil li kʼaru naraj saʼ ruuchichʼochʼ naraj ajwiʼ qabʼalaqʼinkil ut xbʼaanunkil naq toonajtoʼq rikʼin li Jehobʼa (1 Pedro 5:8). Maakʼaʼ aj e naq tooxuwaq chiru laj Tza xbʼaan naq li Yos qʼaxal kaw ribʼ ut naxkolebʼ li nekeʼrahok re.

Wank ajwiʼ jalan chik li naʼlebʼ li tooruuq xyeebʼal saʼ li qatij. Saʼ 1 Juan 5:14, SBG, naxye: «Aʼan nokoorabʼi wi wank kʼaru tqatzʼaama chiru joʼ chanru naraj Aʼan». Aʼin naraj xyeebʼal naq naru tqaye re li Jehobʼa li xkʼaʼuxl wiʼ qachʼool ut chʼolchʼooq chiqu naq li Yos moko tril ta joʼ toontil naʼlebʼ (1 Pedro 5:7).

Ma wank tawiʼ junaq li hoonal ut li naʼaj re naq tootijoq? Ma wank kʼaru naxye li Santil Hu chirix aʼin? Tqasume ebʼ li patzʼom aʼin saʼ li jun chik tzolom.