2. Weʼej

«Taawanjeʼq weʼej» (MARCOS 13:8, SBG).

● Jun li winq nawulak chixkʼatq li tenamit Quaratadji (Níger) ut naroybʼeni naq tixtaw xtzekemq. Ebʼ li riitzʼin, li ras ut li rech-alal xeʼxkanabʼ chaq li xnaʼajebʼ xbʼaan naq numtajenaq li weʼej. Li winq aʼin kixkʼut ribʼ chiru chʼochʼ. Kʼaʼut? Laj Sidi li najolomink re li kʼalebʼaal naxye: «Xbʼaan naq li winq aʼin inkʼaʼ naru xwenteninkil li xjunkabʼal ut aʼin naxkʼe xxutaan».

KʼARU NAXKʼUT EBʼ LI ESIL? Saʼ chixjunil li ruuchichʼochʼ saʼ xyanq 7 li kristiʼaan 1 tana naxnumsi weʼej. Qʼaxal yibʼ wiʼ chik ru nakʼulmank saʼ África subsahariana xbʼaan naq saʼ xyanq 3 li kristiʼaan 1 rehebʼ naxnumsi weʼej. Re xtawbʼal ru chiʼus aʼin qakʼoxlaq rix jun li junkabʼal bʼarwiʼ wank li yuwaʼbʼej, li naʼbʼej ut jun li kʼuulaʼal. Wi kaʼajwiʼ re wiibʼ chi kristiʼaan wank li tzekemq ani inkʼaʼ twaʼaq: ma li naʼbʼej malaj li yuwaʼbʼej? Naabʼal ebʼ li junkabʼal nekeʼxkʼul aʼin rajlal kutan.

LI NEKEʼXYE. Li Ruuchichʼochʼ naxkʼe li tzekemq choʼq re chixjunilebʼ li kristiʼaan. Li naʼajmank aʼan naq tjekʼimanq chiʼus.

MA YAAL LI NEKEʼXYE? Ebʼ laj awinel nekeʼxqʼol ut nekeʼxjekʼi li tzekemq joʼ maajunwa ilbʼil chaq. Ebʼ li nekeʼjolomink re li tenamit tento raj teʼxjekʼi chiʼus li tzekemq saʼ chixjunil li Ruuchichʼochʼ re naq maakʼaʼaq chik li weʼej. Usta ak naabʼal chihabʼ nekeʼxyal xqʼe chi xbʼaanunkil aʼin inkʼaʼ nekeʼruuk xqʼaxbʼal ru li chʼaʼajkilal.

KʼARU NAKAAKʼOXLA? Ma yook chi tzʼaqlok ru li naxye Marcos 13:8? Usta wank naabʼal ebʼ li kʼanjelobʼaal li naʼoksimank re awk, ma toj wank li weʼej saʼ li Ruuchichʼochʼ?

Li hiik ut li weʼej naxkʼam chaq jalan chik li chʼaʼajkilal li naxkʼutbʼesi naq wanko saʼ rosoʼjikebʼ li kutan.

[Naxye]

«Kachʼin chik ma chixjunilebʼ li kokʼal li nekeʼkamk naru raj nekeʼkoleʼk chiru xyajel li pospoʼoy, li haʼkʼot malaj numeʼsaʼ ut jalan chik li yajel wi tzʼaqal raj xtzekemqebʼ». (ANN M. VENEMAN, EX DIRECTORA EJECUTIVA DE UNICEF)

[Li jalam u chalenaq]

© Paul Lowe/Panos Pictures