4. Maakʼaʼ chik li rahok saʼ li junkabʼal

«Ebʼ li kristiʼaan [...]. Maakʼaʼaq rahok rikʼinebʼ» (2 TIMOTEO 3:1-3, LI SANTIL HU, WYCLIFFE BIBLE TRANSLATORS. AKʼ TZʼIIBʼ).

● Li xChris wank saʼ norte re Gales ut nakʼanjelak saʼ jun li molam bʼarwiʼ nekeʼxtenqʼa ebʼ li nekeʼsakʼek saʼebʼ li rochoch. Aʼan naxye: «Jultik we naq saʼ jun kutan kikʼulunk jun li ixq ut kichʼaʼajkoʼk chiwu xnawbʼal ru xbʼaan naq qʼaxal kisakʼek malaj kiteniik. Junchʼol chik ebʼ li ixq yal nekeʼxlumubʼ ribʼ xbʼaan naq nekeʼyeheʼk re naq maakʼaʼ nekeʼok wiʼ».

KʼARU NAXKʼUT EBʼ LI ESIL? Saʼ jun li tenamit re África, saʼ xyanq 3 ebʼ li ixq 1 tana namuxeʼk ru saʼ xkachʼinal. Naq kipatzʼmank rehebʼ li winq aran África ma us xsakʼbʼal li ixaqilbʼej kachʼin chik ma li xyijachil keʼxye naq maakʼaʼ reekʼ. Abʼanan moko kaʼaj tawiʼ ebʼ li ixq nekeʼketeʼk. Saʼ li tenamit Canadá, saʼ xyanq 10 li winq 3 tana nekeʼrahobʼtesiik malaj nekeʼsakʼek xbʼaan li ixaqilbʼej.

LI NEKEʼXYE. Ak junxil naʼabʼimank chaq chirix aʼin abʼan anaqwan najitmank chik.

MA YAAL LI NEKEʼXYE? Naabʼal ebʼ li kristiʼaan nekeʼaatinak chirix aʼin, abʼan ma naraj xyeebʼal aʼin naq inkʼaʼ chik nekeʼsakʼek saʼebʼ li rochoch? Moko joʼkan ta. Yalaq bʼar naʼilmank naq maakʼaʼ chik li rahok saʼ li junkabʼal.

KʼARU NAKAAKʼOXLA? Ma yook chi tzʼaqlok ru li naxye 2 Timoteo 3:1-3? Ma nakaakʼe reetal naq saʼ li junkabʼal inkʼaʼ chik nekeʼxrahatq ribʼebʼ?

Li roʼ propesiiy li tqatzʼil rix naʼaatinak chirix: li Ruuchichʼochʼ. Qilaq li naxye li Santil Hu.

[Naxye]

«Li nekeʼsakʼek ut li nekeʼmuxeʼk ru inkʼaʼ nekeʼxjit li nekeʼxkʼul. Jun li ixq naxkuy tana naq tsakʼeʼq 35 sut tojaʼ naq naxik chi jitok rikʼin li polisiiy». (LI NAXYE RESIL EBʼ LI NEKEʼSAKʼEK UT LI NEKEʼMUXEʼK RU ARAN GALES)