5. Yook chi sachmank li ruuchichʼochʼ

Li Yos tixsachebʼ «li nekeʼsachok re li ruuchichʼochʼ» (APOCALIPSIS 11:18, SBG).

● Laj Pirri naxkʼayi chaq li bʼiin re palma (palm-wine) aran Kpor (Nigeria) inkʼaʼ chik naru kʼanjelak xbʼaan naq keʼkamk li cheʼ naq kikutmank petróleo saʼ li nimaʼ delta del Níger. Aʼan naxye: «Naxkamsihebʼ li kar, naxkʼat li qatzʼumal ut naxtzʼajni ebʼ li nimaʼ, xinkanaak chi maakʼaʼ inkʼanjel».

KʼARU NAXKʼUT EBʼ LI ESIL? Li nekeʼxtzʼil rix aʼin nekeʼxye naq rajlal chihabʼ kʼajoʼ xkʼihal li mul nekeʼxkut saʼ li palaw. Li xyijachil li mul aʼin junes nahil li naxkʼam naabʼal siʼeent chihabʼ re naq t-osoʼq. Moko kaʼaj tawiʼ nekeʼxtzʼajni li Ruuchichʼochʼ, saʼ junpaat ajwiʼ yookebʼ xtzekankil li tzakahemq. Ebʼ li nekeʼxtzʼil rix aʼin nekeʼxye naq naʼajmank 17 po re naq li Ruuchichʼochʼ tixkʼe wiʼ chik reqaj li nekeʼxtzeka ebʼ li kristiʼaan chiru jun chihabʼ. Li hu Sydney Morning Herald re Australia naxye: «Wi yookebʼ chi tamk ebʼ li kristiʼaan ut naabʼal chik nekeʼxtzeka, saʼ li chihabʼ 2035 t-ajmanq wiibʼ li Ruuchichʼochʼ re naq tixkʼe li tzakahemq li naʼajmank chiqu».

LI NEKEʼXYE. Wank xseebʼalebʼ li kristiʼaan re xtuqubʼankil ru li chʼaʼajkilal aʼin ut xkolbʼal li Ruuchichʼochʼ.

MA YAAL LI NEKEʼXYE? Naabʼalebʼ li kristiʼaan yookebʼ xbʼaanunkil chixjunil li wank saʼ ruqʼebʼ re naq inkʼaʼ chik teʼxtzʼajni li Ruuchichʼochʼ. Abʼan aʼin inkʼaʼ nakʼanjelak re xtuqubʼankil ru li chʼaʼajkilal.

KʼARU NAKAAKʼOXLA? Ma naʼajmank naq li Yos t-okenq re xkolbʼal li Ruuchichʼochʼ joʼ kixye chaq?

Li Santil Hu moko kaʼaj tawiʼ naʼaatinak chirix oobʼ li propesiiy, naxye ajwiʼ naq tchaabʼiloʼq wiibʼ oxibʼ li naʼlebʼ saʼ rosoʼjikebʼ li kutan. Qilaq jun eetalil.

[Naxye]

«Junxil xwekʼa naq chaabʼil linnaʼaj abʼan anaqwan yal nujenaq chi mul». (ERIN TAMBER, LI WANK CHIXKʼATQ LI PALAW RE ESTADOS UNIDOS NAXYE LI KIKʼULMANK SAʼ LI CHIHABʼ 2010 NAQ KIKUTMANK LI PETRÓLEO SAʼ LI GOLFO RE MÉXICO)

[Kaaxukuut]

Ma li Yos wank re li naqakʼul?

Saʼ xkʼabʼaʼ naq ak kitzʼiibʼamank saʼ li Santil Hu li tkʼulmanq saʼebʼ li qakutan, ma naraj xyeebʼal aʼin naq li Yos wank re naq naqakʼul li rahilal? Taataw xsumenkil saʼ li tzolom 11 re li tasal hu Kʼaru naxchʼolobʼ li Santil Hu?, kʼubʼanbʼil xbʼaanebʼ laj testiiw re li Jehobʼa.

[Li jalam u chalenaq]

U.S. Coast Guard photo