Li Santil Hu kixjalebʼ xyuʼam

KʼARU kitenqʼank re jun li winq li nabʼuulink tumin ut naʼelqʼak saʼebʼ li ochoch chi xkanabʼankil li naxbʼaanu? Qakanabʼaq naq aʼan tixseeraqʼi qe.

«Ninbʼuulink tumin naq nekeʼaanilak li kawaay» (RICHARD STEWART)

KIYOʼLAAK SAʼ LI CHIHABʼ: 1965

TENAMIT: JAMAICA

XTZʼAQOBʼ LI NAʼLEBʼ: NABʼUULINK TUMIN UT AJ ELQʼ

LI XINKʼUL CHAQ: Xinkʼiik Kingston, xteepal Jamaica, aʼan jun li tenamit nebʼaʼ bʼarwiʼ maakʼaʼ kʼanjel ut numtajenaq li kamsink. Ebʼ li kristiʼaan nekeʼxuwak xbʼaanebʼ laj kamsinel. Ut rajlal kutan nekeʼpuubʼak.

Wank wiibʼ li wiitzʼin, linnaʼ naxkamsi ribʼ chi kʼanjelak re naq maakʼaʼ tpaltoʼq qe, xooxtaqla ajwiʼ chi tzolok. Abʼan inkʼaʼ nawulak chiwu tzolok, nawulak bʼan chiwu xik rilbʼalebʼ li kawaay naq nekeʼaanilak. Rajlal inkʼaʼ ninxik saʼ li tzolebʼaal xbʼaan naq ninxik saʼ li naʼaj bʼarwiʼ nekeʼaanilak li kawaay. Wank sut xintaqeʼk saʼ xbʼeen wiibʼ oxibʼ li kawaay.

Xwulak chiwu xbʼuulinkil rix li tumin ut laaʼin aj ixq. Xinʼok xmayinkil li mariwaan. Ut re xbʼaanunkil aʼin, xinʼok chi elqʼak joʼkan naq wank naabʼal linpuubʼ. Us tana naq maaʼani xinkamsi naq xinʼelqʼak chaq!

Xineʼxchap ut xineʼxkʼe saʼ tzʼalam. Abʼanan naq xinʼelk xinʼok wiʼ chik xbʼaanunkil li yibʼru aj naʼlebʼ. Abʼan qʼaxal xyibʼoʼk wiʼ chik ru linnaʼlebʼ. Chanchan tawiʼ naq chaabʼilin abʼan josqʼink, ninpleetik ut ninhobʼok. Kaʼajwiʼ ninsikʼ li us choʼq we.

CHANRU KIXJAL LINYUʼAM LI SANTIL HU: Saʼebʼ li kutan naq yookin xbʼaanunkil chixjunil li maaʼusilal aʼin, linnaʼ kiʼok xtzolbʼal li Santil Hu rikʼinebʼ laj testiiw re li Jehobʼa. Naq xwil naq yook chi jalaak xnaʼlebʼ, xwaj xnawbʼal kʼaru yook xtzolbʼal. Joʼkan naq xinʼok chi aatinak rikʼinebʼ laj testiiw re li Jehobʼa chirix li Santil Hu.

Saʼ junpaat xinkʼe reetal naq li nekeʼxkʼut moko juntaqʼeet ta rikʼin li nekeʼxkʼut li junchʼol chik chi paabʼal, chixjunil li nekeʼxkʼut chalenaq saʼ li Santil Hu. Kaʼajwiʼ aʼanebʼ nekeʼxik chirekabʼlal chi aatinak chirix li Yos, joʼ keʼxbʼaanu chaq li xbʼeen aj paabʼanel (Mateo 28:19; Hechos 20:20). Li tzʼaqal rahok li nekeʼxkʼutbʼesi kixkʼut chiwu naq aʼanebʼ nekeʼxyuʼami li tzʼaqal paabʼal (Juan 13:35).

Naq yookin xtzolbʼal li Santil Hu xintaw ru naq tento tinjal chi junajwa linyuʼam. Li Jehobʼa xikʼ naril li koʼbʼeetak, joʼkan naq wi nawaj xsahobʼresinkil xchʼool, tento naq tintzʼeqtaana chixjunil li naxmux linjunxaqalil (2 Corintios 7:1; Hebreos 13:4). Xtochʼ inchʼool xnawbʼal naq naru tinsahobʼresi malaj tinrahobʼtesi xchʼool li Jehobʼa rikʼin linbʼaanuhom (Proverbios 27:11). Joʼkan naq xinkanabʼ roksinkil li puubʼ ut xmayinkil li marihuana, xinkʼe inqʼe re xchaabʼilobʼresinkil linyuʼam. Abʼan li qʼaxal xchʼaʼajkoʼk chiwu aʼan xkanabʼankil ebʼ li ixq ut xbʼuulinkil rix li tumin.

Saʼ xtiklajik inkʼaʼ raj nawaj naq ebʼ li wamiiw teʼxnaw naq yookin xtzolbʼal li Santil Hu rikʼinebʼ laj testiiw re li Jehobʼa. Abʼan xinjal linnaʼlebʼ naq xwil li kixye li Jesús saʼ Mateo 10:33, Li Santil Hu, Sociedad Bíblica de Guatemala, SBG: «Li taatzʼeqtaananq we chiruhebʼ li tenamit, tintzʼeqtaana ajwiʼ laaʼin chiru linchoxahil Yuwaʼ». Saʼ junpaat xinye rehebʼ li wamiiw li kʼaru yookin xbʼaanunkil. Aʼanebʼ mem xeʼkanaak: inkʼaʼ nekeʼxpaabʼ naq junaq winq joʼ laaʼin traj ok joʼ aj paabʼanel. Usta joʼkan, xinye rehebʼ naq twaj xjalbʼal linnaʼlebʼ.

KʼARU RUSILAL XINTAW: Kʼajoʼ kisahoʼk xchʼool linnaʼ naq kiril naq yookin xyuʼaminkil li naʼlebʼ li naxkʼe li Santil Hu. Moko yook ta chik xkʼaʼuxl chirix li ninbʼaanu. Nawulak chiqu aatinak chirix jun li naʼlebʼ li naqayuʼami: li qarahom chirix li Jehobʼa. Wank sut naq ninjultika li xinbʼaanu chaq, nasach inchʼool rilbʼal chanru xinxtenqʼa li Jehobʼa chi xjalbʼal linyuʼam. Inkʼaʼ chik naʼalaak saʼ inchʼool xmuxbʼal wibʼ chi moko xsikʼbʼal li bʼihomal.

Chʼolchʼo chiwu naq wi inkʼaʼ raj xintzol li Santil Hu maare wankin raj saʼ tzʼalam malaj kamenaqin raj. Abʼanan, saʼ xkʼabʼaʼ li xintzol sa inchʼool saʼ linjunkabʼal. Wank jun li wixaqil li nikinxtenqʼa ut jun li wabʼin li nikinroxloqʼi ut saʼ komonil naqaloqʼoni ru li Jehobʼa. Junelik ninbʼanyoxi naq xineʼxtzol rikʼin li Santil Hu. Joʼkan naq nawaj xkʼutbʼal chiruhebʼ li junchʼol li naxye li Santil Hu. Jwal ninbʼanyoxi re li Jehobʼa naq xinxkʼe chi tzʼaqonk saʼ li xtenamit bʼarwiʼ wank li rahok, abʼan li qʼaxal ninbʼanyoxi re aʼan naq xinxsikʼ ut xinxkʼam chaq rikʼin.

[Naxye]

«Xtochʼ inchʼool xnawbʼal naq naru tinsahobʼresi malaj tinrahobʼtesi xchʼool li Jehobʼa rikʼin linbʼaanuhom»

[Jalam u]

Naq xwil naq yook chi jalaak xnaʼlebʼ linnaʼ, xwaj xnawbʼal kʼaru yook xtzolbʼal

[Jalam u]

Rikʼin li wixaqil ut li wabʼin