Ma chixjunilebʼ laj paabʼanel nekeʼxtaqe li Jesús?

MA nakaanaw joʼkʼihal aj paabʼanel wank saʼ li ruuchichʼochʼ? Li hu Atlas of Global Christianity, naxye naq saʼ li chihabʼ 2010 kachʼin ma 2,300 miyon aj paabʼanel abʼan jachbʼilebʼ saʼ 41,000 chi paabʼal, ak xkʼutum ut xchaqʼrabʼebʼ li junjunq. Saʼ xkʼabʼaʼ naq wank naabʼal li chʼuut li nekeʼxye naq ebʼ «aj paabʼanel» naqataw ru kʼaʼut wankebʼ nekeʼchʼinaak xchʼool. Joʼkan naq nekeʼxkʼoxla: «Ma chixjunilebʼ tawiʼ ebʼ aj paabʼanel?».

Re xtawbʼal ru aʼin qilaq jun eetalil. Wi taawaj bʼihajik saʼ jalan chik tenamit moko tzʼaqal ta rikʼin xyeebʼal anihat, tento taakʼut naq yaal li nakaaye maare taakʼut laapasaporte malaj jalan chik li hu. Joʼkan ajwiʼ nakʼulmank rikʼin jun tzʼaqal aj paabʼanel, moko tzʼaqal ta rikʼin xyeebʼal naq naxpaabʼ li Kriist tento bʼan tixkʼutbʼesi naq yaal li naxye. Chanru truuq xkʼutbʼesinkil aʼin?

Ak lajeebʼ chihabʼ tana chik xkamik li Jesús naq keʼok roksinkil li aatin paabʼanel. Naq laj Lucas li naxtzʼil rix li kikʼulmank kixye naq «aran Antiokía ebʼ li xtzolom li Jesus keʼxtikibʼ kʼabʼaʼiik “kristiyan”» (Hechos 11:26, Li Santil Hu, Sociedad Bíblica de Guatemala, SBG). Joʼkan naq ebʼ laj paabʼanel tento teʼwanq joʼ xtzolom li Kriist. Abʼan, kʼaru naraj xyeebʼal aʼin? Jun li hu naxye: «Re naq toowanq joʼ xtzolom li Kriist tento naq tqabʼaanu chixjunil li wank saʼ quqʼ re xkʼambʼal qe rikʼin [...] toj saʼ qakamik» (Diccionario Teológico del Nuevo Testamento). Joʼkan bʼiʼ, jun tzʼaqal aj paabʼanel naxyuʼami chixjunil li xkʼutum li Jesús li kixaqabʼank re li tzʼaqal paabʼal.

Ma wankebʼ li tzʼaqal aj paabʼanel saʼebʼ li qakutan? Chanru kixye li Jesús naq teʼnaweʼq ru ebʼ li xtzolom? Re xnawbʼal kʼaru naxkʼut li Santil Hu tzʼil rix li oobʼ chi tzolom aʼin. Saʼ li junjunq chi tzolom tqil jun li naʼlebʼ li kixye li Jesús naq tkʼutbʼesinq re anihebʼ li xtzolom. Tqil ajwiʼ chanru ebʼ li xbʼeen aj paabʼanel keʼxyal xqʼe chi xkʼambʼal re rikʼin li Jesús ut moqon tqil anihebʼ nekeʼxkʼam re rikʼin li Jesús saʼebʼ li qakutan.