Li Santil Hu kixjalebʼ xyuʼam

KʼARU kiʼekʼasink re jun li winq sutqʼiik wiʼ chik saʼ li paabʼal bʼarwiʼ kiwank chaq saʼ li xkachʼinal? Chanru kixtaw jun li saaj winq ruuchil xyuwaʼ li jwal naxrahi raj chaq ru? Qakanabʼaq naq aʼanebʼ teʼxchʼolobʼ.

«Naʼajmank chiwu sutqʼiik rikʼin li Jehobʼa» (ELIE KHALIL)

KIYOʼLAAK SAʼ LI CHIHABʼ: 1976

TENAMIT: CHIPRE

XTZʼAQOBʼ LI NAʼLEBʼ: LI ALALBʼEJ LI KIXKANABʼ LI ROCHOH

LI XINKʼUL CHAQ: Xinyoʼlaak saʼ li tenamit Chipre, abʼan xinkʼiik saʼ li tenamit Australia. Linnaʼ inyuwaʼ ebʼ aj testiiw re li Jehobʼa ut xeʼxyal xqʼe re xkʼutbʼal chiwu xraabʼal li Yos ut li Santil Hu. Abʼan, naq xinkʼiik ut xinsaajoʼk inkʼaʼ chik xinʼabʼink chiruhebʼ. Ninʼelelik ut ninxik saʼ bʼe chiru li qʼoqyink, ninxik chi elqʼank bʼelebʼaal chʼiichʼ wochbʼeenebʼ li wamiiw ut kokʼaj xsaʼ ninchʼik wibʼ saʼ chʼaʼajkilal.

Naq xintikibʼ ninbʼaanu raj saʼ muqmu re naq inkʼaʼ teʼpoʼq linnaʼ inyuwaʼ, abʼanan timil timil kiʼok chi elk linxiw. Ebʼ li wamiiw cheekebʼ chiwu ut inkʼaʼ nekeʼxra li Jehobʼa. Rochbʼeninkilebʼ kixpoʼ linnaʼlebʼ . Yal jun naq xinye rehebʼ linnaʼ inyuwaʼ naq maakʼaʼ chik nawaj xnawbʼal chirix li xpaabʼalebʼ. Usta xeʼxyal intenqʼankil saʼ tuulanil, laaʼin maakʼaʼ xwaj re. Jwal ra xeʼrekʼa.

Xinʼelk saʼ wochoch ut xinʼok xketbʼal li bʼan li nakanobʼresink u. Xinʼok rawbʼal naabʼal li mariwaan ut xkʼayinkil. Ninkoʼbʼeetak ut nawulak chiwu wank saʼebʼ li naʼaj bʼar nekeʼkalaak ut nekeʼxajok. Joʼkan ajwiʼ, kʼajoʼ nachalk injosqʼil naq nekeʼxye we malaj naq nekeʼxbʼaanu junaq li naʼlebʼ li inkʼaʼ nawulak chiwu. Ninchap hobʼok ut wank sut naq ninsakʼebʼ. Ninbʼaanu chixjunil li yibʼru aj naʼlebʼ li inkʼaʼ raj tixbʼaanu jun laj paabʼanel joʼ xeʼxkʼut chaq chiwu.

CHANRU KIXJAL LINYUʼAM LI SANTIL HU: Xwamiiwi jun li winq li naxket li bʼan li nakanobʼresink u li xkanaak chi maakʼaʼ xyuwaʼ chalen chaq saʼ xkachʼinal. Wank sut nokoonajtoʼk qʼoqyink chi seeraqʼik. Naabʼal sut kixye we naq qʼaxal naxkʼoxla li xyuwaʼ. Saʼ xkʼabʼaʼ naq saʼ inkachʼinal xintzol chirix li wakliik chi yoʼyo, inkʼaʼ xinbʼayk xchʼolobʼankil re li wamiiw naq li Jesús kixwaklesihebʼ wiʼ chik chi yoʼyo ebʼ li kamenaq ut naq naxyeechiʼi naq saʼ jun kutan tixbʼaanu wiʼ chik (Juan 5:28, 29). Ninye chaq re: «Kʼoxlan chirix aʼin, naru taawil wiʼ chik ru chi yoʼyo laayuwaʼ ut chiqajunilo naru toowanq saʼ jun li chʼinaʼusil naʼajej arin saʼ Ruuchichʼochʼ». Li naʼlebʼ aʼin kixtochʼ xchʼool.

Wank sut li wamiiw naʼaatinak chirix li rosoʼjikebʼ li kutan malaj li yos oxibʼ chiribʼil. Ninkʼut chiru saʼ li xSantil Hu naabʼal ebʼ li raqal bʼarwiʼ naxchʼolobʼ li yaal chirix li Jehobʼa, li Jesús ut li rosoʼjikebʼ li kutan (Juan 14:28; 2 Timoteo 3:1-5). Naq rajlal ninʼaatinak rikʼin li wamiiw chirix li Yos, ninʼok ajwiʼ xkʼoxlankil rix li Jehobʼa.

Chi kachʼinqil xʼok chi kʼiik wiʼ chik li yaal saʼ li waanm li xeʼxkʼe xchʼool chi xkʼutbʼal chiwu linnaʼ linyuwaʼ. Wank sut naq wankin rikʼinebʼ li wamiiw saʼ junaq li ninqʼe ut yooko xketbʼal li bʼan li nakanobʼresink u, saʼ junpaat nanaq saʼ inchʼool li Jehobʼa. Usta naabʼalebʼ li wamiiw nekeʼxye naq nekeʼxra li Yos, moko nekeʼxkʼutbʼesi ta rikʼin li xbʼaanuhomebʼ. Xinkʼe reetal naq tento tinsutqʼiiq wiʼ chik rikʼin li Jehobʼa wi inkʼaʼ nawaj wank joʼ aj kaʼpakʼal u.

Abʼanan, usta ninnaw kʼaru tento tinbʼaanu, kʼajoʼ kichʼaʼajkoʼk chiwu xkanabʼankil wiibʼ oxibʼ li naʼlebʼ. Abʼan wank li inkʼaʼ kichʼaʼajkoʼk chiwu joʼ li bʼan li nakanobʼresink u, xkanabʼankilebʼ li wamiiw ut xtzolbʼal li Santil Hu rikʼin jun li cheekel winq.

Abʼan wank ajwiʼ li qʼaxal kichʼaʼajkoʼk chiwu joʼ xjalbʼal naq saʼ junpaat nikinjosqʼoʼk. Wank sut naq chiru jun qʼehil ninruuk xbʼaanunkil, abʼan nikinjosqʼoʼk wiʼ chik saʼ junpaat ut naq ninkʼul aʼin nachʼinaak inchʼool ut nawekʼa naq maakʼaʼ ninʼok wiʼ. Naq ra linchʼool xbʼaan aʼin, ninseeraqʼi li yookin xkʼulbʼal re laj Testiiw li nakʼehok intzolom. Saʼ xkʼabʼaʼ naq li hermaan tuulan ut wank xkuyum junelik naxwaklesi inchʼool. Saʼ jun kutan kixye we naq twil jun li naʼlebʼ saʼ li hu Laj Kʼaakʼalehom chirix naq wank xwankil naq inkʼaʼ tqakanabʼ xyalbʼal qaqʼe. a Xqatzʼil rix junjunq li naʼlebʼ li naru tinbʼaanu naq nawekʼa naq nachalk injosqʼil. Naq wank saʼ inchʼool li xwil saʼ li tzolom ut rikʼin xtenqʼ li tij, timil timil xinʼok xkotzbʼal linjosqʼil. Joʼkan naq, chiru li po abril re li chihabʼ 2000 xkubʼeek inhaʼ joʼ aj testiiw re li Jehobʼa. Ut kʼajoʼ naq xeʼsahoʼk xchʼool linnaʼ linyuwaʼ.

KʼARU RUSILAL XINTAW: Sa inchʼool ut saq ajwiʼ ru linkʼaʼuxl, xbʼaan naq inkʼaʼ chik nintzʼajni linjunxaqalil rikʼin li bʼan li nakanobʼresink u chi moko rikʼin li muxuk ibʼ. Maakʼaʼ naxye li yookin xbʼaanunkil ma kʼanjelak, xik saʼebʼ li chʼutam malaj rajsinkil wu, qʼaxal sa chik linchʼool ut chaabʼil chik ninnaʼlebʼak saʼ linyuʼam.

Ninbʼanyoxi re li Jehobʼa naq linnaʼ linyuwaʼ, maajunwa xeʼxkʼoxla naq inkʼaʼ tinjal linnaʼlebʼ. Joʼkan ajwiʼ ninkʼoxla rix li raatin li Jesús li natawmank saʼ Juan 6:44, Li Santil Hu, Sociedad Bíblica de Guatemala, SBG: «Maaʼani naru nachalk wikʼin, wi inkʼaʼ kʼambʼil chaq xbʼaan li Yuwaʼbʼej li kitaqlank chaq we». Qʼaxal nasahoʼk saʼ inchʼool xkʼoxlankil naq xinruuk chi sutqʼiik wiʼ chik rikʼin li Jehobʼa xbʼaan naq aʼan kikʼamok chaq we.

«Ninrahi ru naq twanq junaq inyuwaʼ» (MARCO ANTONIO ALVAREZ SOTO)

KIYOʼLAAK SAʼ LI CHIHABʼ: 1977

TENAMIT: CHILE

XTZʼAQOBʼ LI NAʼLEBʼ: NATZʼAQONK SAʼ JUN LI CHʼUUT RE LI SOON HEAVY-METAL

LI XINKʼUL CHAQ: Xinkʼiik rikʼin linnaʼ saʼ li teep Punta Arenas re li tenamit Magallanes, bʼarwiʼ sa wank. Linnaʼ linyuwaʼ keʼxkanabʼ ribʼ naq wank oobʼ chihabʼ we, li kixbʼaanu naq twekʼa naq tzʼeqtaananbʼilin. Nawaj raj naq wanq junaq inyuwaʼ.

Linnaʼ naxtzol li Santil Hu rikʼinebʼ laj testiiw re li Jehobʼa ut nikinxkʼam raj saʼ li Chʼutlebʼaal Kabʼl saʼebʼ li chʼutam. Abʼan laaʼin moko nawulak ta chiwu xik ut rajlal ninpoʼk saʼ bʼe. Xinkanabʼ xik naq wank 13 chihabʼ we.

Saʼebʼ li kutan aʼan qʼaxal nawulak chiwu li bʼichank ut xinkʼe reetal naq seebʼ inchʼool chi xbʼaanunkil. Naq wank 15 chihabʼ we ninkʼe li soon chirix li heavy-metal saʼebʼ li ninqʼe, saʼebʼ li naʼajej bʼarwiʼ nekeʼkʼayink haʼ li nakaltesink ut saʼebʼ li ninqʼe li naxkʼubʼ junaq li kristiʼaan. Nawochbʼeenihebʼ li nekeʼxnaw chiʼus bʼichank ut aʼin kixbʼaanu naq twulaq chiwu jalan chik ebʼ li bʼich. Xinʼok chi tzolok saʼ jun li tzolebʼaal re soon bʼarwiʼ wankin. Naq wank chaq 20 chihabʼ we xinqʼaxonk Santiago xjolomil li tenamit re xkʼebʼal xkomon lintzolbʼal. Ninwajbʼak ajwiʼ saʼ xyanqebʼ li nekeʼxkʼe li soon heavy-metal.

Usta joʼkan, junelik nawekʼa wibʼ injunes. Re naq inkʼaʼ twekʼa wibʼ chi joʼkaʼin, ninkalaak ut ninket li bʼan li nakanobʼresink u rikʼinebʼ li nawochbʼeenihebʼ chi wajbʼak li nawilebʼ joʼ li junkabʼal. Moko chaabʼil ta linnaʼlebʼ ut aʼin naxkʼutbʼesi chanru nintiqibʼ wibʼ: junes qʼeq li tʼikr nawoksi, cham linmach ut li wismal jayeʼq nawulak saʼ linyiitoq.

Linnaʼlebʼ junelik naxbʼaanu naq tinchʼik wibʼ saʼ chʼaʼajkilal joʼ ajwiʼ ninchʼik wibʼ saʼ chʼaʼajkilal rikʼinebʼ li polisiiy. Saʼ jun kutan, jun chʼuut li nekeʼxkʼayi li bʼan li nakanobʼresink u yookebʼ xchʼiʼchʼiʼinkil ebʼ li wamiiw ut laaʼin ajwiʼ. Saʼ xkʼabʼaʼ naq yook inkalajik, xinkʼehebʼ xlobʼ ut ebʼ aʼan kʼajoʼ naq xineʼxrahobʼtesi ut keʼxtoq xbʼaqel li we.

Abʼanan, li qʼaxal xinxrahobʼtesi aʼan li xinkʼul saʼ ruqʼebʼ li nekeʼxkʼe ribʼ choʼq wamiiw. Saʼ jun kutan xinkʼe reetal naq li xsumwaanm yook xmuxbʼal ribʼ rikʼin li wamiiw li qʼaxal ninra ut naq ebʼ li junchʼol chik li wamiiw nekeʼxmuq chiwu. Aʼin tzʼaqal kixrahobʼtesi inchʼool.

Xinsutqʼiik chaq Punta Arenas ut xinʼok chi kʼanjelak re xkʼutbʼal li soon ut xchʼeʼbʼal li violonchelo. Toj ninwajbʼak ajwiʼ rikʼinebʼ li chʼuut li nekeʼxkʼe li soon heavy-metal. Saʼebʼ li kutan aʼan xinnaw ru li xSussan, jun li chʼinaʼusil tuqʼixq li xinkam choʼq wixaqil. Saʼ xnumikebʼ li kutan, li xSussan kixnaw naq li xnaʼ naxpaabʼ li yos oxibʼ chiribʼil ut laaʼin inkʼaʼ, joʼkan naq kixpatzʼ we: «Bʼar wank li yaal?». Xinye re naq li naʼlebʼ aʼan moko yaal ta, usta inkʼaʼ ninruuk xkʼutbʼal chiru rikʼin li Santil Hu, abʼan ninnaw ani teʼruuq xkʼutbʼal chiʼus. Xinye re naq ebʼ laj testiiw re li Jehobʼa teʼruuq xchʼolobʼankil chiru rikʼin li Santil Hu. Moqon xinbʼaanu jun li naʼlebʼ li inkʼaʼ raj inbʼaanuhom chiru naabʼal chihabʼ: xintijok chiru li Yos re xpatzʼbʼal intenqʼankil.

Wiibʼ oxibʼ kutan chirix aʼin xwil ru jun li winq li chanchan ninnaw ru ut xinpatzʼ re ma aj testiiw re li Jehobʼa. Usta yook xxiw chirix chanru nintiqibʼ wibʼ, kixsume saʼ tuulanil linpatzʼom chirix ebʼ li chʼutam saʼ li Chʼutlebʼaal Kabʼl. Chʼolchʼo chiwu naq aʼan tzʼaqal xsumenkil lintij. Xkohin saʼ li Chʼutlebʼaal Kabʼl ut xinchunlaak toj chirix re naq maaʼani tnawoq wu. Abʼanan, naabʼalebʼ xeʼnawok wu xbʼaan naq ninwulak naq toj kachʼinin chaq. Xineʼxkʼul chi sahebʼ saʼ xchʼool, xineʼxqʼalu ut qʼaxal nim li tuqtuukilal xwekʼa. Chanchan tawiʼ naq xinsutqʼiik wiʼ chik saʼ li wochoch. Naq xwil ru laj testiiw li nakʼehok intzolbʼal naq toj kachʼinin chaq, xinpatzʼ wiʼ chik intzolbʼal re.

CHANRU KIXJAL LINYUʼAM LI SANTIL HU: Saʼ jun kutan xinyaabʼasi Proverbios 27:11, SBG, bʼarwiʼ naxye: «Chaabʼilaq laanaʼlebʼ, at walal, ut taasahoʼq linchʼool». Xsach inchʼool xkʼoxlankil naq jun yal winq naru tixsahobʼresi xchʼool laj Yobʼtesinel re li choxachʼochʼ. Tojaʼ naq xintaw ru naq li Jehobʼa aʼan li yuwaʼbʼej li yookin chaq xsikʼbʼal saʼ chixjunil linyuʼam.

Nawaj raj chaq xsahobʼresinkil xchʼool linchoxahil Yuwaʼ ut xbʼaanunkil li rajom, abʼan xwulak chiwu li bʼan li nakanobʼresink u ut li haʼ li nakaltesink chiru naabʼal chihabʼ. Xintaw ru li kiraj xyeebʼal li Jesús saʼ Mateo 6:24, SBG, bʼarwiʼ naxye naq «maaʼani naruhank chi kʼanjelak chiru wiibʼaq aj eechal re». Naq yookin xkʼebʼal inqʼe chi xchaabʼilobʼresinkil linyuʼam, li raqal 1 Corintios 15:33, SBG, jwal kinxtenqʼa: «Ebʼ li yibʼ aj seeraqʼ nekeʼxpoʼ ru li chaabʼil naʼlebʼ». Xinkʼe reetal naq inkʼaʼ tinruuq xjalbʼal linnaʼlebʼ wi inkʼaʼ ninkanabʼ xik saʼebʼ li naʼaj bʼarwiʼ inkʼaʼ us xik ut rochbʼeeninkilebʼ li wamiiw. Chʼolchʼo ru li naʼlebʼ li naxkʼe li Santil Hu: wi nawaj kʼanjelak chiru li Yos tento naq tinjal wiibʼ oxibʼ li naʼlebʼ li jwal chʼaʼaj saʼ linyuʼam (Mateo 5:30).

Li qʼaxal kichʼaʼajkoʼk chiwu aʼan xkanabʼankil li bʼich heavy-metal, xbʼaan naq aʼin qʼaxal nawulak chiwu. Abʼan rikʼin xtenqʼ ebʼ li wamiiw saʼ li chʼuut, xinruuk xkanabʼankil. Inkʼaʼ chik ninkalaak ut inkʼaʼ chik ninket li bʼan li nakanobʼresink u, xinset li wismal, xinjo linmach ut moko junes qʼeq ta chik li tʼikr nawoksi. Naq xinye re li xSussan naq tinset li wismal, aʼan kiraj xnawbʼal kʼaʼut ut kixye we: «Tinxik chaawix saʼ li Chʼutlebʼaal Kabʼl. Nawaj rilbʼal kʼaru nabʼaanumank aran». Kʼajoʼ naq kiwulak chiru joʼkan naq kiʼok xtzolbʼal li Santil Hu. Moqon xoosumlaak ut saʼ li chihabʼ 2008 kikʼubʼeek qahaʼ joʼ aj testiiw re li Jehobʼa. Anaqwan sa inchʼool chi kʼanjelak chiru li Jehobʼa wochbʼeen li wixaqil ut linnaʼ.

KʼARU RUSILAL XINTAW: Xinkanabʼ ebʼ li wamiiw aj kaʼpakʼal u ut xinkanabʼ xsikʼbʼal saʼ li ruuchichʼochʼ aʼin li sahil chʼoolejil li yal pakʼbʼil. Toj nawulak chiwu ebʼ li bʼich, abʼan anaqwan toj ninsikʼ ru chiʼus li nawabʼi. Li xinkʼul nawoksi re xtenqʼankilebʼ li junchʼol, linkomon ut qʼaxal chik ebʼ li saaj. Nawaj xtenqʼankilebʼ re naq teʼxtaw ru naq usta chanchan chʼinaʼus li naxyeechiʼi li ruuchichʼochʼ aʼin, abʼan «yal mul aj chik» (Filipenses 3:⁠8, SBG).

Naq xinnachʼok rikʼin li Yos xintaw ebʼ li chaabʼil amiiw saʼ li chʼuut, bʼarwiʼ wank li rahok ut li tuqtuukilal. Abʼan, li qʼaxal naxkʼe xsahil inchʼool aʼan naq xintaw linyuwaʼ li ninrahi chaq ru: aʼ li Jehobʼa.

[Kʼe reetal]

[Naxye]

«Xinruuk wiʼ chik chi nachʼok rikʼin li Jehobʼa, xbʼaan naq aʼan kikʼamok chaq we»