Heeheʼ, saʼ xyanqebʼ laj testiiw re li Jehobʼa chi miyon ebʼ li ixq nekeʼxye resil li chaabʼil esil chirix li Xʼawabʼejilal li Yos, joʼ naxye Salmo 68:11, La Biblia. Traducción del Nuevo Mundo, 2019 saʼ español, bʼarwiʼ li Jehobʼa naxye: «Ebʼ li ixq li nekeʼxkʼe chi naweʼk li chaabʼil esil chanchanebʼ laj puubʼ».

Ebʼ li ixq aj testiiw re li Jehobʼa jalan nekeʼxbʼaanu li xkʼanjel chiruhebʼ li ixq saʼebʼ li junchʼol chi paabʼal. Kʼaru li xjalanilebʼ?

Jalan jalanq li xkʼanjelebʼ. Ebʼ li ixq rehebʼ li junchʼol chik chi paabʼal nekeʼtaqlank saʼebʼ li xpaabʼal, li naraj xyeebʼal naq nekeʼtaqlank saʼ xbʼeenebʼ li nekeʼwulak aran. Abʼan ebʼ li ixq aj Testiiw nekeʼxkʼe chi naweʼk li chaabʼil esil chirekabʼlal malaj saʼ jalan jalanq li naʼajej.

Jun chik li naʼlebʼ li najalanink rehebʼ li xkʼanjel aʼan naq ebʼ li ixq rehebʼ li junchʼol chik chi paabʼal nekeʼbʼeresink ut nekeʼkʼutuk saʼebʼ li xʼiklees. Abʼan ebʼ li ixq aj Testiiw inkʼaʼ nekeʼkʼutuk naq wank jun li hermaan winq li ak kubʼenaq xhaʼ. Kaʼajwiʼ ebʼ li cheekel winq li ak xaqabʼanbʼilebʼ nekeʼkʼutuk saʼ li chʼuut (1 Timoteo 3:2; Santiago 3:1).

Saʼ li Santil Hu naxye naq kaʼajwiʼ li winq nekeʼbʼeresink re li chʼuut. Chʼolchʼo ru kikanaak aʼin naq li apóstol Pablo kixye ebʼ li aatin aʼin re laj Tito. «Aʼin aj e naq xatinkanabʼ chaq Kreta, re naq [...] taaxaqabʼebʼ aj jolominel tenamit saʼ li junjunq chi tenamit» (Tito 1:5, Li Santil Hu, Sociedad Bíblica de Guatemala, SBG). Kixye ajwiʼ «jun sut ajwiʼ sumsuuq, […] ut maakʼaʼaq xjitbʼalebʼ chirix wank chi joʼmaajoʼ» (Tito 1:⁠6, SBG). Laj Pablo kixtaqla re laj Timoteo jun li esilhu choʼq re li chʼuut li naxye: «Wi wank junaq naʼalaak saʼ xchʼool wank choʼq aj ilol re xtenamit li Yos, chaabʼil kʼanjel li yo chi xrahinkil ru. Laj ilol re xtenamit li Yos tento naq maakʼaʼaq xqʼusbʼal, jun sut ajwiʼ sumsuuq, […] seebʼaq xchʼool chi kʼutuk» (1 Timoteo 3:1, 2, SBG).

Kʼaʼut naq kaʼajwiʼ li winq nekeʼruuk chi wanq joʼ cheekel winq saʼ li chʼuut? Laj Pablo kixye: «Inkʼaʼ nawaj naq ebʼ li ixq cheʼxtzolebʼ li winq chi moko cheʼxkʼe xwankil saʼ xbʼeenebʼ; nawaj bʼan naq wanqebʼ saʼ qʼunil chʼoolej. Xbʼaan naq xbʼenwa kiyoobʼtesiik laj Adán ut moqon chik lix Eva» (1 Timoteo 2:12, 13, SBG). Joʼ chanru li Yos kixyobʼtesi li xbʼeen winq ut ixq naxkʼut ani naraj naq tbʼeresinq ut tkʼutuq.

Li Jesukriist aʼan li najolomink rehebʼ laj kʼanjel chiru li Jehobʼa ut ebʼ aʼan nekeʼxkʼam re rikʼin. Laj Lucas kixye naq: «Li Jesus kixbʼeenihebʼ li tenamit ut ebʼ li kʼalebʼaal, yo chi xpuktesinkil li xchaabʼil esil li xnimajwal awabʼejihom li Yos». Kʼaru keʼxbʼaanu ebʼ li xtzolom naq keʼtaqlaak chi xbʼaanunkil li kʼanjel aʼin? «Keʼxbʼeeni ebʼ li tenamit, yookebʼ chi xpuktesinkil li Chaabʼil Esilal» (Lucas 8:1, SBG; 9:2-6, SBG).

Joʼkan ajwiʼ ebʼ li winq ut ixq li nekeʼkʼanjelak chiru li Jehobʼa, chi anchalebʼ xchʼool nekeʼtzʼaqonk re naq ttzʼaqloq ru li naxye Mateo 24:14, SBG. Aran li Jesús kixye: «Taapuktesimanq li chaabʼil esilal aʼin chirix li xnimajwal wankilal li choxa saʼ chixjunil li ruuchichʼochʼ re xchʼolobʼankil li yaal chiruhebʼ chixjunil li tenamit: tojaʼ naq taachalq li rosoʼjik».