SAʼ chixjunil li ruuchichʼochʼ chi miyon ebʼ li qas qiitzʼin inkʼaʼ nekeʼxninqʼehi li Ralankil. Ma nekeʼrahoʼk xchʼool chirix aʼin? Ma toj naʼalaak saʼ xchʼoolebʼ xninqʼehinkil li Ralankil? Ma nekeʼxkʼoxla li alal kʼajolbʼej naq yookebʼ chi maqʼeʼk chiru xbʼaanunkil jun li chʼinaʼusil naʼlebʼ? Qilaq li nekeʼxye wiibʼ oxibʼ aj testiiw re li Jehobʼa li wankebʼ saʼ chixjunil li ruuchichʼochʼ.

Xjultikankil li Jesús. «Naq toj maajiʼ ninʼok joʼ aj Testiiw, joqʼeqil ninwulak saʼ iklees. Kaʼajwiʼ ninwulak saʼ xkutankil li Ralankil malaj li Paswa, abʼan moko junelik ta ajwiʼ ninwulak chi moko ninjultika li Jesús saʼebʼ li kutan aʼan. Anaqwan, naq inkʼaʼ ninninqʼehi li Ralankil, ninchʼutubʼ wibʼ rikʼin linchʼuut wiibʼ sut chiru li xamaan ut ninkʼut chiruhebʼ li poyanam li naxye li Santil Hu chirix li Jesús» (LI XʼEVE, AUSTRALIA).

Kʼehok maatan. «Qʼaxal nawulak chiwu naq nekeʼxkʼe junaq inmaatan li inkʼaʼ nawoybʼeni. Aʼin naxkʼe xsahil inchʼool! Nawulak ajwiʼ chiwu xyiibʼankil ebʼ li kokʼ tarjeet ut ebʼ li jalam u ut naq ninsi aʼin, qʼaxal sahebʼ saʼ xchʼool li junchʼol ut laaʼin ajwiʼ» (LAJ REUBEN, IRLANDA DEL NORTE).

Xtenqʼankilebʼ li wankebʼ saʼ rajbʼal ru. «Jwal nasahoʼk qachʼool xkʼubʼankil li tzekemq choʼq rehebʼ li yaj. Wank sut naqakʼam xsaaʼusebʼ, uutzʼuʼuj malaj junaq chik li maatan li naxsahobʼresi xchʼoolebʼ. Ut aʼin naru nabʼaanumank yalaq joqʼe» (LI XʼEMILY, AUSTRALIA).

Xchʼutubʼankil qibʼ rikʼinebʼ li qajunkabʼal. «Naq li qajunkabʼal nekeʼxchʼutubʼ ribʼ bʼarwiʼ sa nekeʼrekʼa ribʼ, ebʼ li kokʼal nekeʼruuk xnawbʼal ru ebʼ li rikan, li xnaʼchin xyuwaʼchin ut jalan chik li xkomonebʼ. Xbʼaan naq inkʼaʼ naqabʼaanu ebʼ li ninqʼe, naq nokoowulak rikʼinebʼ li qakomon aʼanebʼ nekeʼxnaw naq naqabʼaanu saʼ xkʼabʼaʼ naq naqarahebʼ ut maawaʼ naq yal minbʼil qu» (LI XWENDY, ISLAS CAIMÁN).

Xsikʼbʼal li tuqtuukilal. «Jwal laatzʼ wu saʼ xkutankil li Ralankil, joʼkan naq moko wank ta inhoonal chi xsikʼbʼal li tuqtuukilal. Anaqwan xintzol li naxyeechiʼi li Santil Hu choʼq rehebʼ li kristiʼaan ut xintaw li tzʼaqal tuqtuukilal. Ninnaw naq li walal inkʼajol teʼwanq saʼ jun li chʼinaʼusil naʼajej» (LI XSANDRA, ESPAÑA).