Chalen chaq saʼ linkachʼinal kʼajoʼ nawulak chiwu li yobʼtesihom. Rikʼin linjunkabʼal rajlal nokooxik chi bʼeek saʼebʼ li kʼicheʼ ut ebʼ li haʼ li nasutunk re li tenamit Jyväskylä li wank Finlandia. Kʼajoʼ ajwiʼ nawulak chiwu ebʼ li xul. Naq kachʼinin chaq nawulak chiqu xqʼalunkil ebʼ li mes ut ebʼ li tzʼiʼ. Saʼ xnumikebʼ li chihabʼ kʼajoʼ narahok saʼ inchʼool rilbʼal naq nekeʼrahobʼtesiik ebʼ li xul joʼkan naq xinʼokenk saʼ jun li chʼuut li naxkolebʼ rix li xul. Aran xinnaw ru ebʼ li kristiʼaan li nekeʼkʼoxlak joʼ laaʼin ut nekeʼraj tenqʼank.

Xqabʼaanu jalan jalanq li naʼlebʼ re xkolbʼalebʼ li xul. Naqajekʼi ebʼ li hu ut nokooʼelk chi bʼeek saʼ li tenamit re xyeebʼal naq inkʼaʼ naqakʼulubʼa ebʼ li naʼaj bʼarwiʼ nekeʼxkʼayi ebʼ li tʼikr li yiibʼanbʼil rikʼin rix xul ut ebʼ li naʼaj bʼarwiʼ nekeʼroksi ebʼ li xul re xyalbʼal li jalan jalanq chi bʼan. Joʼkan naq xqakʼubʼ jun li chʼuut bʼarwiʼ naqakolebʼ rix li xul. Ebʼ li naʼlebʼ li naqabʼaanu rajlal nokooxchʼik saʼ chʼaʼajkilal rikʼinebʼ li nekeʼtaqlank saʼ li tenamit. Naabʼal sut xineʼxchap ut xineʼxkʼe saʼ tzʼalam.

Joʼkan ajwiʼ, moko kaʼaj tawiʼ naxik inchʼool chirix ebʼ li xul, naxik ajwiʼ inchʼool chirix li jalan jalanq chi chʼaʼajkilal li wank saʼ ruuchichʼochʼ. Joʼkan naq xinʼokenk saʼ ebʼ li molam Amnistía Internacional ut Greenpeace, ut xinkʼe chixjunil linhoonal ut inmetzʼew re tenqʼank. Joʼkan ajwiʼ nintenqʼahebʼ li nebʼaʼ, li maakʼaʼebʼ xwa ut jalan chik li nekeʼraj xtenqʼ.

Abʼan saʼ xnumikebʼ li chihabʼ xinkʼe reetal naq inkʼaʼ tinruuq xjalbʼal li ruuchichʼochʼ. Wank sut nokooʼelk chiʼubʼej saʼebʼ li kokʼ chʼaʼajkilal abʼan ebʼ li ninqi chʼaʼajkilal maajunwa nokooruuk xtuqubʼankil ru. Chanchan tawiʼ naq ebʼ li kristiʼaan maakʼaʼ nekeʼraj re li maaʼusilal li yook chi numtaak saʼ ruuchichʼochʼ. Xwekʼa naq maakʼaʼ ninruuk xbʼaanunkil.

Ra inchʼool xbʼaan naq maakʼaʼ chik ninruuk xbʼaanunkil, joʼkan naq xinʼok xkʼoxlankil li Yos ut li Santil Hu. Usta junxil xintzolok rikʼin ebʼ laj testiiw re li Jehobʼa ut kʼajoʼ kiwulak chiwu naq nekeʼxkʼe xchʼool chiwix ut naq chaabʼilebʼ. Abʼan saʼ li hoonal aʼan toj maajiʼ raj nawaj xjalbʼal linwanjik. Abʼan anaqwan xinjal linkʼaʼuxl.

Joʼkan naq xinsikʼ linSantil Hu ut xintikibʼ rilbʼal xsaʼ. Kʼajoʼ xkʼojobʼ inchʼool li xinyaabʼasi. Xintaw naabʼal ebʼ li raqal bʼarwiʼ naxye naq inkʼaʼ tqarahobʼtesi ebʼ li xul. Jun rehebʼ xintaw saʼ Proverbios 12:10, Li Santil Hu, Sociedad Bíblica de Guatemala, li naxye: «Li tiik xchʼool naxnaw xchʼoolaninkilebʼ li xketomq». Xinkʼe ajwiʼ reetal naq moko li Yos ta wank re naq kʼajoʼ li maaʼusilal saʼ ruuchichʼochʼ. Xnumtaak bʼan, xbʼaan naq ebʼ li kristiʼaan inkʼaʼ nekeʼxpaabʼ li xchaqʼrabʼ li Jehobʼa. Xtochʼ inchʼool rilbʼal naq li Jehobʼa nim xrahom ut wank xkuyum qikʼin (Salmo 103:​8-14).

Saʼebʼ li kutan aʼan xintaw jun li hu chirix li tasal hu Kʼaru tzʼaqal naxchʼolobʼ li Santil Hu? ut xintaqla xpatzʼbʼal li hu aʼin. Moqon jun sumal aj Testiiw xineʼrulaʼani ut xeʼxyeechiʼi intzolbʼal rikʼin li Santil Hu. Saʼ junpaat xinkʼulubʼa. Joʼkan ajwiʼ, xinʼok chi wulak saʼebʼ xchʼutam ebʼ laj Testiiw. Saʼ xnumikebʼ li kutan, xwulak saʼ inchʼool li yookin xtzolbʼal saʼ li Santil Hu.

Rikʼin li xintzol saʼ li Santil Hu xinruuk xjalbʼal linyuʼam. Xinkanabʼ mayibʼk, kalaak, xinjal chanru nintiqʼibʼ wibʼ ut inkʼaʼ chik ninhobʼok. Joʼkan ajwiʼ, nawoxloqʼihebʼ chik li nekeʼtaqlank saʼ li tenamit (Romanos 13:1). Junxil maakʼaʼ nawaj re li kʼaru naxye li Jehobʼa chirix li koʼbʼeetak yumbʼeetak abʼan, anaqwan xinjal linnaʼlebʼ.

Abʼan li kichʼaʼajkoʼk chiwu, aʼan xjalbʼal li ninkʼoxla chirixebʼ li molam li nekeʼraj xjalbʼal li xwanjik li tenamit. Moko saʼ junpaat ta xinkanabʼebʼ. Saʼ xtiklajik xwekʼa naq nimla maak wi tinkanabʼebʼ. Abʼanan xinkʼe reetal naq kaʼajwiʼ li Xʼawabʼejilal li Yos truuq xtuqubʼankil ru ebʼ li chʼaʼajkilal. Joʼkan naq chi anchal inchʼool xinʼok xpuktesinkil li chaabʼil esil aʼin rehebʼ li kristiʼaan (Mateo 6:33).

Naq xinyal xjalbʼal xwanjik li tenamit ninkʼoxla naq wank wiibʼ li chʼuut: li chaabʼilebʼ xnaʼlebʼ ut li yibʼebʼ ru xnaʼlebʼ. Inkʼaʼ ninxiwak pleetik rikʼinebʼ li yibʼebʼ ru xnaʼlebʼ. Anaqwan xbʼaan li xtenqʼ li Santil Hu inkʼaʼ chik xikʼ nawilebʼ li kristiʼaan ninyal bʼan inqʼe chi xraabʼalebʼ (Mateo 5:44). Ninkʼutbʼesi naq ninrahebʼ naq ninpuktesi li chaabʼil esilal chirix li Xʼawabʼejilal li Yos. Nasahoʼk inchʼool chi rilbʼal naq aʼin naxkʼam chaq tuqtuukilal ut sahil chʼoolejil, joʼ ajwiʼ naxkʼe roybʼenihomebʼ li kristiʼaan.

Xkanabʼankil chixjunil saʼ ruqʼ li Jehobʼa xkʼe xtuqtuukilal inchʼool. Chʼolchʼo chiwu naq li Jehobʼa inkʼaʼ tixkanabʼ naq junelik teʼxrahobʼtesi ebʼ li kristiʼaan ut li xul chi moko tixkanabʼ naq ebʼ li kristiʼaan teʼxjukʼ li ruuchichʼochʼ. Troksi li Xʼawabʼejilal re xtuqubʼankil chixjunil li maaʼusilal li naxbʼaanu li winq (Isaías 11:1-9). Sa inchʼool xbʼaan naq xinnaw li yaal ut ninruuk chik xtenqʼankilebʼ li kristiʼaan re naq teʼxpaabʼ aʼin. Moko ninkʼoxla ta chik xjalbʼal li ruuchichʼochʼ.