Julio: Chan xaawil Ernesto? Nasahoʼk wiʼ chik inchʼool chi aatinak aawikʼin chirix li Santil Hu. *

Ernesto: Sa linchʼool, bʼanyox.

Julio: Chaabʼil nawabʼi! Saʼ li junsut naq xooʼaatinak xqatzol kʼaʼut naq ebʼ laj Testiiw naqaye naq li Xʼawabʼejilal li Yos kixaqabʼaak saʼ li chihabʼ 1914. * Xqil naq saʼ li tasal 4 re li hu Daniel naxkʼut chiqu jun li naʼlebʼ li nokooxtenqʼa. Ma jultik aawe bʼar wank?

Ernesto: Heeheʼ, li kixmatkʼe laj Nabucodonosor.

Julio: Joʼkan. Aʼan kixmatkʼe jun li nimla cheʼ li nawulak toj saʼ choxa. Saʼ li xmatkʼ kirabʼi jun li ánjel chi xyeebʼal naq teʼxyoqʼ li cheʼ. Kaʼaj chik kikanaak li xxeʼ ut li xtoonal. Moqon chik kinumeʼk «wuqubʼ chihabʼ» ut li cheʼ kikʼiik wiʼ chik. * Ut joʼ xqil ajwiʼ, li propesiiy aʼin kitzʼaqlok ru wiibʼ sut. Ma jultik aawe li xbʼeen xtzʼaqlojik?

Ernesto: Aʼan li kikʼulmank rikʼin laj Nabucodonosor. Kikanoʼk ru ut kiwank chi joʼkan chiru wuqubʼ chihabʼ.

Julio: Joʼkan tzʼaqal. Kikanoʼk ru ut kixkanabʼ wank joʼ awabʼej. Ut saʼ li xkabʼ xtzʼaqlojik li propesiiy, li Yos inkʼaʼ chik kiʼawabʼejink saʼ xbʼeen li Ruuchichʼochʼ chiru wuqubʼ chihabʼ. Li qʼehil aʼan kitiklaak naq kisachmank li tenamit Jerusalén saʼ li chihabʼ 607 naq toj maajiʼ nachalk li Jesús saʼ Ruuchichʼochʼ. Chalen chaq aran, maajun chik li awabʼej kikanaak chi awabʼejink saʼ Ruuchichʼochʼ joʼ ruuchil li Jehobʼa. Naq kiraqeʼk li wuqubʼ chihabʼ aʼin, li Yos kixxaqabʼ jun li awabʼej abʼan saʼ choxa. Aʼin naraj xyeebʼal naq ak xraqeʼk li wuqubʼ chihabʼ kiʼok chi awabʼejink li Xʼawabʼejilal li Yos. Naqanaw chik joqʼe kitiklaak li wuqubʼ chihabʼ aʼin. Abʼan, anaqwan tento tqatzʼil rix joʼ najtil kiwank re xnawbʼal saʼ kʼaru chihabʼ kiʼok chi awabʼejink li Xʼawabʼejilal li Yos. Ma yookat xtawbʼal ru?

Ernesto: Heeheʼ, yookin xjultikankil li ak xooʼaatinak wiʼ.

Julio: Chaabʼil. Qilaq joʼ najtil kibʼayk li wuqubʼ chihabʼ aʼin. Laaʼin ajwiʼ toj xinjultika wiʼ chik li naʼlebʼ aʼin. Tinyal xchʼolobʼankil chaawu re naq taataw ru.

Ernesto: Us.

Julio: Naq kitzʼaqlok ru li xbʼeen sut rikʼin laj Nabucodonosor, kibʼayk wuqubʼ chihabʼ. Abʼan naq kitzʼaqlok ru li xkabʼ sut chirix li Xʼawabʼejilal li Yos, najt kibʼayk.

Ernesto: Ut chanru nakaanaw?

Julio: Li wuqubʼ chihabʼ aʼin, kitiklaak saʼ li chihabʼ 607 naq toj maajiʼ nachalk li Jesús saʼ Ruuchichʼochʼ naq kisachmank li tenamit Jerusalén. Wi chalen chaq saʼ li chihabʼ aʼan tqatikibʼ rajlankil wuqubʼ chihabʼ, toowulaq saʼ li chihabʼ 600 naq toj maajiʼ nachalk li Jesús saʼ Ruuchichʼochʼ, abʼan saʼ li chihabʼ aʼan moko kikʼulmank ta junaq li naʼlebʼ li naxchap ribʼ rikʼin li Xʼawabʼejilal li Yos. Joʼ ak xqil ajwiʼ, naabʼal siʼeent chihabʼ chirix aʼin naq li Jesús kichalk saʼ Ruuchichʼochʼ kixye naq li wuqubʼ chihabʼ aʼin toj maajiʼ naraqeʼk.

Ernesto: Heeheʼ, jultik chik we.

Julio: Joʼkan naq li qʼehil aʼin najt roq, moko wuqubʼ chihabʼ ta.

Ernesto: Jarubʼ chihabʼ kibʼayk?

Julio: Saʼ li hu Apocalipsis, wank jun li propesiiy li naxchap ribʼ rikʼin li xpropesiiy laj Daniel li tooxtenqʼa xnawbʼal joʼkʼihal li xnajtil ebʼ li chihabʼ aʼin. Saʼ li propesiiy aʼan, naxye naq saʼ li oxibʼ chihabʼ rikʼin waqibʼ po wank 1,260 kutan. * Joʼkan naq saʼ li wuqubʼ chihabʼ wank 2,520 kutan. Ma yookat xtawbʼal ru?

Ernesto: Heeheʼ, abʼan toj maajiʼ chʼolchʼo chiwu kʼaʼut naq laaʼex nekeepaabʼ naq li Xʼawabʼejilal li Yos kixtikibʼ awabʼejink saʼ li chihabʼ 1914.

Julio: Us, qatzʼilaq rix. Saʼ wiibʼ oxibʼ li propesiiy li wank saʼ li Santil Hu, naxye naq li jun kutan aʼan jun chihabʼ. * Wi naqoksi aʼin re rajlankil li wuqubʼ chihabʼ, li 2,520 kutan naraj xyeebʼal 2,520 chihabʼ. Qajultikaq naq li wuqubʼ chihabʼ kitiklaak saʼ li chihabʼ 607 naq toj maajiʼ nachalk li Jesús saʼ Ruuchichʼochʼ, wi chalen aran tqajla 2,520 chihabʼ aʼin nokooxkʼam saʼ li chihabʼ 1914. Aʼin xyaalal kʼaʼut naqaye naq saʼ li chihabʼ 1914 kiraqeʼk li wuqubʼ chihabʼ ut kixaqabʼaak li Jesús joʼ awabʼej saʼ li Xʼawabʼejilal li Yos. Naqil ajwiʼ naq chalen li chihabʼ 1914 ebʼ li propesiiy li naʼaatinak chirix li rosoʼjikebʼ li kutan ak yook chi tzʼaqlok ru.

Ernesto: Kʼaru kikʼulmank?

Julio: Saʼ Mateo 24:7, SBG, li Jesús kixye li tkʼulmanq naq t-oq chi awabʼejink saʼ choxa: «Teʼwaklijeʼq chi xkamsinkil ribʼebʼ tenamit rikʼin jalan chik tenamit, li awabʼej rikʼin jalan chik awabʼej, ut taawanjeʼq weʼej ut hiik saʼ naabʼal chi naʼajej». Kʼe reetal, li Jesús kixye naq twanq weʼej ut hiik. Peʼyaal naq aʼan li yook chi kʼulmank chalen chaq li chihabʼ aʼan?

Ernesto: Yaal li nakaaye.

Julio: Li Jesús kixye ajwiʼ naq twanq li yalok u. Ut li hu Apocalipsis kixye naq ebʼ li yalok u aʼin tixkʼam chaq rahilal saʼ xbʼeen chixjunil li ruuchichʼochʼ. * Ma jultik aawe joqʼe kitiklaak li xbʼeen nimla yalok u?

Ernesto: Saʼ li chihabʼ 1914. Li chihabʼ li nekeeye laaʼex naq li Jesús kixtikibʼ awabʼejink. Maajoqʼe xinkʼoxla naq ebʼ li naʼlebʼ aʼin nekeʼxchap ribʼ.

Julio: Joʼkan tzʼaqal, naq naqajuntaqʼeeta li propesiiy aʼin chirix li wuqubʼ chihabʼ rikʼin li junchʼol chik li propesiiy li naʼaatinak chirix li rosoʼjikebʼ li kutan, naqakʼe reetal naq nakanaak chi chʼolchʼo ru li naraj xkʼutbʼal li Santil Hu. Ebʼ laj testiiw re li Jehobʼa, chʼolchʼo chiruhebʼ naq li Jesús kiʼok chi awabʼejink saʼ li chihabʼ 1914 ut chalen aran wanko saʼ rosoʼjikebʼ li kutan.

Ernesto: Yookin xkʼebʼal inqʼe chi xtawbʼal ru chixjunil li naʼlebʼ aʼin.

Julio: Nintaw aawu. Laaʼin ajwiʼ xchʼaʼajkoʼk chiwu xtawbʼal ru saʼ li xbʼeen sut. Abʼanan nawoybʼeni naq li xqatzʼil rix tatxtenqʼa chi xtawbʼal ru, usta li Santil Hu inkʼaʼ naʼaatinak chirix li chihabʼ 1914 wank xyaalal kʼaʼut ebʼ laj testiiw re li Jehobʼa nekeʼxpaabʼ naq li Jesús kixtikibʼ awabʼejink saʼ li chihabʼ aʼan. Nawoybʼeni ajwiʼ naq xaataw ru naq chixjunil li xinkʼut chaawu chalenaq saʼ li Santil Hu.

Ernesto: Aʼan ninkʼe reetal. Chixjunil li nakaakʼut chiwu chalenaq saʼ li Santil Hu. Maakʼaʼ naxye kʼaru linpatzʼom moko nakaaye ta «Aʼan li ninpaabʼ» malaj «Aʼan li ninkʼoxla». Junelik nakaawoksi li Santil Hu. Abʼan, kʼaʼut chʼaʼaj xtawbʼal ru? Kʼaʼut naq li Yos inkʼaʼ kixye chi junwaakaj naq li Jesús tixtikibʼ awabʼejink chiru li chihabʼ 1914?

Julio: Chaabʼil laapatzʼom Ernesto. Wank naabʼal li naʼlebʼ saʼ li Santil Hu li toj naʼajmank xtzʼilbʼal rix. Kʼaʼut naq li Yos kixbʼaanu naq li naʼlebʼ li wank saʼ li Santil Hu toj t-ajmanq xtzʼilbʼal rix re naq ttawmanq ru? Ma twulaq raj chaawu naq tooʼaatinaq chirix aʼin saʼ li jun chik xamaan?

Ernesto: Us, twulaq raj chiwu. Arin tatwoybʼeni.