Xinkʼiik saʼ jun nebʼaʼil teep re Montreal. Waqxaqibʼo li ralal xkʼajol linnaʼ linyuwaʼ ut laaʼin li chʼiʼip. Naq wank waqibʼ po we, kikamk linyuwaʼ ut linnaʼ xjunes xooxkʼiresi.

Chalen chaq saʼ linkachʼinal xintzol roksinkil li bʼan li nakanobʼresink u, bʼuulink tumin ut pleetik. Junelik ninwank rikʼinebʼ li yibʼru xnaʼlebʼ. Kaʼajwiʼ lajeebʼ chihabʼ wank we ut ak ninkʼanjelak choʼq rehebʼ li ixq li nekeʼxkʼayi ribʼ ut ebʼ li nekeʼtoʼonink tumin. Kʼajoʼ nawulak chiwu xbʼalaqʼinkilebʼ li kristiʼaan. Sa nawekʼa wibʼ xbʼaanunkil aʼin, chanchan jun li bʼan li nakanobʼresink u.

Kaalaju chihabʼ wank we ut ak ninnaw xbʼalaqʼinkilebʼ chiʼus li kristiʼaan. Jun eetalil, nawulak chiwu xkʼayinkil li reloj, li matqʼabʼ ut li pulseer ut ninye naq oor chixjunil abʼan moko yaal ta. Nawulak chiwu xtawbʼal li tumin saʼ junpaat. Saʼ jun kutan xinkʼul 10,000 dólar li tumin li naʼoksimank Canadá.

Naq wank 15 chihabʼ we, xineʼrisi saʼ li tzolebʼaal bʼarwiʼ ninwank, xinkanaak chi maakʼaʼ wochoch. Joʼkan naq ninwark saʼ parke, saʼ bʼe malaj saʼ rochochebʼ linpiʼeraj wamiiw.

Li polisiiy rajlal sut kixpatzʼ we kʼaru yookin. Abʼan maajunwa xineʼxchap xbʼaan naq li ninkʼayi moko elqʼanbʼil ta. Abʼanan xintoj ajwiʼ li muult chirix aʼin. Maakʼaʼ ut maaʼani ninxuwa ru, xinkʼanjelak rikʼinebʼ li nekeʼtoʼonink tumin. Xbʼaan naq xiwxiw li kʼanjel aʼin junelik ninkʼam linpuubʼ. Joʼkan ajwiʼ xinkʼanjelak rikʼinebʼ laj kamsinel.

Wank 17 chihabʼ we naq xwabʼi xbʼeen sut chirix li Santil Hu. Wankin chaq rikʼin jun li ixq li kiʼok chi xtzolbʼal li Santil Hu. Abʼan inkʼaʼ xwulak chiwu li xchaqʼrabʼ li Santil Hu joʼkan naq xinkanabʼ ut xkohin rikʼin jun chik li ixq li ak nawaatina ajwiʼ.

Tik xinʼosoʼk naq li ixq aʼin xʼok xtzolbʼal ajwiʼ li Santil Hu. Abʼan xinkʼe reetal naq xjalaak li xnaʼlebʼ, chaabʼil chik ut wank xkuyum. Jun sut xineʼxbʼoq saʼ jun rehebʼ li xchʼutam. Xsach inchʼool rilbʼal chanru xineʼxkʼul, chixjunilebʼ sahebʼ saʼ xchʼool chi wilbʼal. Maajunwa xwekʼa wibʼ chi joʼkan, kʼajoʼ nasahoʼk inchʼool. Saʼ linkachʼinal linjunkabʼal moko xinxra ta ut moko xeʼxkʼe ta xchʼool chiwix. Li xeʼxbʼaanu ebʼ laj Testiiw aʼan tzʼaqal li naʼajmank chiwu. Naq xeʼxyeechiʼi intzolbʼal chirix li Santil Hu saʼ junpaat xinkʼulubʼa.

Li xintzol xkol linyuʼam. Rikʼin wiibʼ chik aj elqʼ xqakʼubʼ naq tooxik chi elqʼak, xbʼaan naq naʼajmank chiwu 50,000 dólar re xtojbʼal linkʼas saʼ li bʼuulink. Us tana naq inkʼaʼ xkohin chirixebʼ! Xbʼaan naq saʼ li kutan aʼan jun rehebʼ keʼxkamsi ut jun li chik keʼxkʼam saʼ tzʼalam.

Naq xinʼok xtzolbʼal li Santil Hu xinkʼe reetal naq toj wank naabʼal li tinjal saʼ linyuʼam. Jun eetalil, saʼ 1 Corintios 6:10, Li Santil Hu, Sociedad Bíblica de Guatemala, SBG, li Santil Hu naxye: «Ebʼ laj elqʼ, ebʼ laj rahinel ru bʼihomal, ebʼ laj kalajenaq, ebʼ laj majewanel, ebʼ laj maqʼol re abʼi e inkʼaʼ teʼreechani li xnimajwal awabʼejihom li Yos». Naq xwil li raqal aʼin xinʼok chi yaabʼak. Tento naq tinjal chi junajwa linyuʼam (Romanos 12:2). Laaʼin jun winq aj pleet, junes tikʼtiʼik ninbʼaanu ut maakʼaʼ chik rusil linyuʼam.

Abʼan xintzol ajwiʼ naq li Jehobʼa chaabʼil ut nakuyuk maak (Isaías 1:18). Chi anchal inchʼool xintzʼaama re naq tinxtenqʼa chi xkanabʼankil chixjunil li yibʼru aj naʼlebʼ. Rikʼin li xtenqʼ xinchaabʼilobʼresi linnaʼlebʼ. Jun rehebʼ li chaabʼil naʼlebʼ li xinbʼaanu aʼan naq xinsumlaak rikʼin li ixq li wankin wiʼ.

Naq wank 24 chihabʼ we, ak wank oxibʼ linkokʼal. Aajel ru naq tinwenteni linjunkabʼal joʼkan naq naʼajmank naq tinsikʼ junaq inkʼanjel. Abʼan inkʼaʼ xintzolok ut maajunwa xinkʼanjelak joʼkan naq maaʼani naxnaw wu joʼ aj kʼanjel. Xinpatzʼ wiʼ chik lintenqʼ re li Jehobʼa ut xinʼelk chi xsikʼbʼal jun li kʼanjel. Naq ninwulak xsikʼbʼal linkʼanjel ninye rehebʼ naq inkʼaʼ chik nawaj elqʼak malaj xbʼaanunkil junaq maaʼusilal re xtawbʼal intumin. Wank sut, ninye naq yookin xtzolbʼal li Santil Hu re naq aʼin tinxtenqʼa abʼan maaʼani naraj xkʼebʼal inkʼanjel. Moqon, naq ak xinseeraqʼi chixjunil li xinkʼul re jun li winq bʼarwiʼ yookin xpatzʼbʼal linkʼanjel, kixye we: «Inkʼaʼ ninnaw kʼaʼut abʼan nawaj xkʼebʼal laakʼanjel». Chʼolchʼo chiwu naq chi joʼkaʼin kixsume lintij li Jehobʼa. Chirix chik aʼin rikʼin li wixaqil xooʼok joʼ aj testiiw re li Jehobʼa.

Yoʼyokin xbʼaan naq xinyuʼami li naʼlebʼ li naxkʼe li Santil Hu ut xintaqe li xbʼe li Kriist. Sa inchʼool rikʼin linjunkabʼal ut tuqtu ru linkʼaʼuxl ut linchʼool chiru li Jehobʼa, xbʼaan naq ninnaw naq ak xkuy inmaak.

Kaalaju chihabʼ wokik chi xbʼaanunkil jun li kʼanjel bʼarwiʼ nintenqʼahebʼ li junchʼol chi xnawbʼal ru li Jehobʼa. Tojaʼ li wixaqil kiʼokenk ajwiʼ re xbʼaanunkil li kʼanjel aʼin wochbʼen. Chiru li 30 chihabʼ li ak xnumeʼk, ak xintenqʼa 22 li wechkʼanjel re naq teʼoq joʼ aj testiiw re li Jehobʼa. Toj ninwulak saʼebʼ li kʼayibʼaal abʼan maawaʼ chik re elqʼak joʼ ninbʼaanu chaq. Wank sut ninʼaatinak rikʼinebʼ li kristiʼaan, ninye rehebʼ naq li Yos naxyeechiʼi naq saʼ junaq kutan toowanq saʼ jun li ruuchichʼochʼ bʼarwiʼ maakʼaʼaqebʼ chik laj elqʼ (Salmo 37:10, 11).