Xinyoʼlaak Paddington, saʼ jun li tenamit re Londres (Inglaterra). Xinwank chaq rikʼin linnaʼ ut oxibʼ rehebʼ linchaqʼ. Linyuwaʼ moko junelik ta nawank qikʼin saʼ xkʼabʼaʼ naq nawulak chiru kalaak.

Naq kachʼinin chaq, linnaʼ kixkʼut chiwu tijok rajlal qʼoqyink. Wank raj jun Linsantil Hu li kaʼajwiʼ li Salmos wank chisaʼ ut yal ninyoobʼ li xsonil re naq tinruuq xbʼichankil. Jultik we naq kiwil jun li aatin saʼ jun li hu li kixtochʼ inchʼool: «Saʼ jun kutan chixjunil t-osoʼq». Ebʼ li aatin aʼin inkʼaʼ xinxkanabʼ chi wark chiru li qʼoqyink xbʼaan naq naxik inchʼool chirix li kutan chalk re. Ninye: «Moko naru ta kaʼajwiʼ aʼinaq li yuʼam. Kʼaru aj e naq wankin arin? Moko nawaj ta kamk!».

Nawaj raj xnawbʼal kʼaru nabʼaanumank saʼ li qʼehink ut saʼ li tuulak. Joʼkan naq xinsikʼ chanru aatinak rikʼinebʼ li kamenaq ut xik saʼebʼ li muqlebʼaal rochbʼenebʼ li wechtzolom. Joʼkan ajwiʼ naqachʼutubʼ qibʼ re rilbʼal ebʼ li pelikula li tixkʼe aaxiw usta chixjunil aʼin naxkʼe qaxiw abʼan nasahoʼk ajwiʼ qachʼool chi rilbʼal.

Usta 10 chihabʼ wank we ak yibʼ chaq ru linyuʼam. Xinʼok xmayinkil li tabaco chalen aran inkʼaʼ chik ninruuk xkanabʼankil. Moqon xinʼok xmayinkil li marihuana. Naq wank 11 chihabʼ we xinyal li haʼ li nakaltesink usta inkʼaʼ nawulak chiwu abʼan sa nawekʼa wibʼ naq ninkalaak. Nawulak chiwu li bʼich ut xajok ut joqʼe naxkʼe ribʼ chiwu ninxik saʼebʼ li ninqʼe ut saʼebʼ li naʼajej bʼarwiʼ nekeʼkalaak. Chi muqmu ninʼelk saʼ wochoch saʼ qʼoqyink ut yook chi saqewin naq ninwulak wiʼ chik. Lubʼlukin joʼkan naq inkʼaʼ ninxik saʼ li eskuʼeel ut naq ninxik yal re ukʼak.

Naq linnaʼ kixkʼe reetal naq moko us ta chik yookin chi naʼlebʼak ut naq moko us ta yookin chi elk saʼ li chihabʼ naq tinraq li tzolok kirahoʼk xchʼool ut kipoʼk wikʼin. Xbʼaan aʼin xqachoqi qibʼ, xinʼelelik ut xinqʼaxonk chi wank rikʼin laj Tony linnovio (boyfriend). Aʼan nawulak chiru elqʼak, naxkʼayi li bʼan li nakanobʼresink u ut nawbʼil ru naq aj sakʼonel. Naq wank 16 chihabʼ we xinkanaak saʼ yuʼam ut xwank li xbʼeen qakʼuulaʼal.

Naq wankin saʼ li ochoch bʼarwiʼ wankebʼ li naʼbʼej rikʼinebʼ li xkʼuulaʼal li maakʼaʼebʼ xbʼeelom xinnaw ru ebʼ laj testiiw re li Jehobʼa. Xinruuk chi wank aran xbʼaan li tenqʼ li naxkʼe li awabʼej. Wiibʼebʼ li ixq aj Testiiw junelik nekeʼkʼulunk rulaʼaninkil ebʼ li junchʼol chik chi saaj li wankebʼ ajwiʼ xkʼuulaʼal. Saʼ jun kutan xinʼok chi aatinak rikʼinebʼ re xkʼutbʼesinkil naq moko yaal ta li nekeʼxye ebʼ laj Testiiw. Abʼan xeʼxsume saʼ xyaalal chixjunil linpatzʼom rikʼin li Santil Hu. Xwulak chiwu naq nekeʼrahok ut tuulanebʼ xchʼool. Joʼkan naq xinkʼulubʼa xtzolbʼal li Santil Hu rikʼinebʼ.

Saʼ xnumikebʼ li kutan xintzol saʼ li Santil Hu jun li naʼlebʼ li kixjal linyuʼam. Chalen chaq saʼ linkachʼinal ninxuwa li kamk abʼan xintzol li kixye li Jesús chirix li xwaklijik wiʼ chik chi yoʼyo ebʼ li kamenaq (Juan 5:​28, 29). Xintzol ajwiʼ naq li Yos naxkʼe xchʼool chiwix (1 Pedro 5:⁠7). Xtochʼ inchʼool li naxye Jeremías 29:11, Li Santil Hu, Sociedad Bíblica de Guatemala: «Laaʼin wank saʼ inchʼool kʼaru tinbʼaanu choʼq eere: twaj texwanq saʼ tuqtuukilal ut inkʼaʼ saʼ rahilal, re naq toxeetaw xsahil eechʼool chi junelik. Laaʼin, li Qaawaʼ, ninyehok re aʼin». Xinʼok xpaabʼankil naq naru tinwanq saʼ jun li chʼinaʼusil naʼajej arin saʼ Ruuchichʼochʼ (Salmo 37:29, La Biblia. Traducción del Nuevo Mundo, 2019 saʼ español).

Ebʼ laj testiiw re li Jehobʼa xeʼxkʼut chiwu naq nikineʼxra. Li xbʼeen sut naq xinwulak saʼ li chʼutam xinkʼe reetal naq tuulanebʼ xchʼool ut naq chaabʼilebʼ (Juan 13:​34, 35). Moko joʼkan ta nekeʼnaʼlebʼak li nekeʼwulak saʼ li iklees. Ebʼ laj testiiw re li Jehobʼa moko xeʼxwechʼ ta rix linyuʼam. Xeʼxkʼe xchʼool chiwix ut xineʼxtenqʼa rikʼin naabʼal li naʼlebʼ, xwekʼa naq wankin saʼ jun li nimla junkabʼal.

Rikʼin xtzolbʼal li Santil Hu xinkʼe reetal naq tento tinjal linyuʼam re naq tinwanq choʼq ramiiw li Yos. Xchʼaʼajkoʼk chiwu xkanabʼankil li tabaco. Xinkʼe ajwiʼ reetal naq wank ebʼ li bʼich li naxbʼaanu naq tinwataw li marihuana, joʼkan naq tento xinjal li nawabʼi. Inkʼaʼ chik ninxik saʼebʼ li ninqʼe, saʼebʼ li naʼajej bʼarwiʼ naʼuxmank li kalaak xbʼaan naq chʼolchʼo chiwu naq aʼin tixbʼaanu naq twaj ukʼak. Xinsikʼebʼ li wamiiw li tineʼxtenqʼa re wank joʼ naraj li Jehobʼa (Proverbios 13:20).

Chiruhebʼ li kutan aʼan laj Tony yook ajwiʼ xtzolbʼal li Santil Hu rikʼinebʼ laj testiiw re li Jehobʼa. Naq keʼxsume li xpatzʼom rikʼin li Santil Hu kichʼolaak chiru naq yook xtzolbʼal li yaal. Joʼkan naq kixjal li xyuʼam, kixkanabʼebʼ li ramiiw li maaʼusebʼ xnaʼlebʼ, kixkanabʼ elqʼak ut inkʼaʼ chik naxmayi li marihuana. Xbʼaan naq naqaj xsahobʼresinkil xchʼool li Jehobʼa tento xqatuqubʼ ru li qawanjik, re naq li qayum tkʼiiq saʼ jun li junkabʼal. Joʼkan naq saʼ li chihabʼ 1982 xoosumlaak.

Jultik we naq saʼ li hu laj Laj Kʼaakʼalehom ut Ajsi aawu! * xinsikʼ resil xyuʼamebʼ li poyanam li xeʼruuk xjalbʼal li xwanjik, xbʼaan naq aʼin naxkawubʼresi inchʼool ut naxkʼe inmetzʼew re naq inkʼaʼ tinkanabʼ xyalbʼal inqʼe. Junelik nintzʼaama re li Jehobʼa naq tinxtenqʼa. Joʼkan naq saʼ julio re li chihabʼ 1982 laj Tony ut laaʼin xkubʼeek qahaʼ joʼ aj testiiw re li Jehobʼa.

Wank choʼq ramiiw li Jehobʼa kixkʼe xyaalal linyuʼam. Laj Tony ut laaʼin xqakʼe reetal naq li Jehobʼa nokooxtenqʼa chi xnumsinkil ebʼ li chʼaʼajkilal. Xqatzol xkʼojobʼankil qachʼool rikʼin li Jehobʼa xbʼaan naq chʼolchʼo chiqu naq junelik tixtenqʼa li qajunkabʼal (Salmo 55:23).

Nasahoʼk inchʼool naq xinruuk xtenqʼankil ebʼ li qakokʼal re naq teʼwanq choʼq ramiiw li Jehobʼa. Nasahoʼk ajwiʼ inchʼool chi rilbʼal naq ebʼ li wi yookebʼ ajwiʼ xnawbʼal ru li Jehobʼa.

Inkʼaʼ chik ninyoʼlek chi xkʼoxlankil rix li tkʼulmanq saʼ li kutan chalk re ut li kamk. Laj Tony ut laaʼin rajlal xamaan naqulaʼani jalan jalanq li chʼuut re xkawresinkil xpaabʼal ebʼ li qech aj paabʼanel. Nokootzʼaqonk ajwiʼ re xkʼutbʼal chiruhebʼ li qas qiitzʼin naq wiʼ nekeʼxpaabʼ li Jesús naru teʼwanq xyuʼam chi junelik.