Kʼaru ttenqʼanq aawe re xtawbʼal rusilal ut re naq sahaq saʼ laachʼool chi rilbʼal xsaʼ li Santil Hu? Naabʼalebʼ li kristiʼaan xeʼxtaw rusilal chi xbʼaanunkil li oobʼ chi naʼlebʼ aʼin.

Taw jun li chaabʼil naʼaj. Sikʼ junaq li naʼaj bʼarwiʼ maakʼaʼaq choqink, kutan ru, moko tzʼaptzʼo ta ru chi joʼkan taakʼe aachʼool chirix li yookat xtzolbʼal.

Qʼesqʼesaq aawu chi tzolok. Li Santil Hu aʼan jun xmaatan li Jehobʼa. Re naq taataw rusilal chanchanaqat jun li chʼinaʼal li naraj xkʼambʼal re rikʼin li xyuwaʼ naq yooqat rilbʼal xsaʼ li Santil Hu. Maakʼoxla li yibʼ aj naʼlebʼ li nekeʼxye li kristiʼaan chirix ut kanabʼ naq li Yos tatxtzol (Salmo 25:⁠4).

Tijon. Saʼ li Santil Hu natawmank li xkʼaʼuxl li Yos, aajel ru naq tooxtenqʼa re naq tqataw ru. Aʼan tixkʼe qe li xsantil musiqʼej wi naqapatzʼ re (Lucas 11:13). Li santil musiqʼej tatxtenqʼa chi xtawbʼal ru chanru nakʼoxlak li Yos toj reetal taataw «li xchamal xkʼaʼuxl li Yos» (1 Corintios 2:​10, Li Santil Hu, Sociedad Bíblica de Guatemala, SBG).

Kʼoxla rix li yookat rilbʼal. Maayaabʼasi yal re xchoybʼal junaq li raqal. Kʼe bʼan aachʼool chirix li yookat xtzolbʼal. Kʼoxla aʼin: «Kʼaru li chaabʼil naʼlebʼ kixyuʼami li kristiʼaan aʼin? Chanru tinruuq xyuʼaminkil?».

Chʼolchʼooq chaawu li kʼaru taawaj. Re naq taataw rusilal li yookat xtzolbʼal saʼ li Santil Hu kʼe aachʼool chi rilbʼal chanru tatxtenqʼa saʼ laayuʼam. Naru nakaakʼe aachʼool chi xnawbʼal ru chiʼus li Yos, chi xchaabʼilobʼresinkil laanaʼlebʼ re naq chaabʼilaqat joʼ bʼeelomej malaj ixaqilbʼej malaj jalan chik li naʼlebʼ. Naru nakaasikʼ ebʼ li xraqal li Santil Hu li tatxtenqʼa chi xbʼaanunkil aʼin. *

Li oobʼ chi naʼlebʼ aʼin tatxtenqʼa re naq taatikibʼ rilbʼal xsaʼ li Santil Hu. Abʼan kʼaru tatruuq xbʼaanunkil re naq qʼaxal twulaq chaawu rilbʼal? Saʼ li jun chik tzolom taataw xkomon li naʼlebʼ.