1 Juan 5:1-21
5 Li naxpaabʼ naq li Jesús aʼan li Kriist, aʼan ralal li Yos. Ut li naxra li Yos naxra ebʼ li ralal xkʼajol li Yos.
2 Saʼ xkʼabʼaʼ aʼin naqanaw naq naqara li ralal xkʼajol li Yos: wi naqara li Yos ut naqapaabʼ li xchaqʼrabʼ.
3 Xbʼaan naq xraabʼal li Yos naraj xyeebʼal: xpaabʼankil li xchaqʼrabʼ ut li xchaqʼrabʼ moko chʼaʼaj ta xbʼaanunkil
4 xbʼaan naq li yoʼlajenaq rikʼin li Yos naxqʼax li ruuchichʼochʼ. Ut rikʼin li qapaabʼal xqaqʼax ru li ruuchichʼochʼ.
5 Ani truuq xqʼaxbʼal ru li ruuchichʼochʼ? Ma maawaʼ tabʼiʼ li naxpaabʼ naq li Jesús aʼan li Ralal li Yos?
6 Li Jesukriist kichalk saʼ xkʼabʼaʼ li haʼ ut li kikʼ, abʼan moko kaʼaj tawiʼ rikʼin haʼ, kichalk bʼan rikʼin haʼ ut rikʼin kikʼ. Ut li santil musiqʼej naxkʼe chi naweʼk aʼin xbʼaan naq li santil musiqʼej naxye li yaal.
7 Xbʼaan naq oxibʼ nekeʼxye naq yaal aʼin:
8 li santil musiqʼej, li haʼ ut li kikʼ ut saʼ roxichalebʼ nekeʼxye naq yaal.
9 Wi naqapaabʼ li nekeʼxye ebʼ li winq, li naxye li Yos qʼaxal nim chiru aʼin xbʼaan naq li Yos naxye naq li Jesús aʼan li Ralal.
10 Li qas qiitzʼin li naxpaabʼ li Ralal li Yos wank saʼ xchʼool li kiyeeheʼk re xbʼaan li Yos. Li qas qiitzʼin li inkʼaʼ naxpaabʼ li Yos chanchan tawiʼ naxye naq li Yos aj tikʼtiʼ xbʼaan naq inkʼaʼ naxpaabʼ li kixye li Yos chirix li Ralal.
11 Aʼin li naxye li Yos: aʼan kixkʼe qe li junelik yuʼam ut li yuʼam aʼin wank rikʼin li Ralal.
12 Li naxkʼulubʼa li Alalbʼej wank rikʼin li yuʼam aʼin. Li inkʼaʼ naxkʼulubʼa li Ralal li Yos moko wank ta rikʼin li yuʼam aʼin.
13 Nintzʼiibʼa eere aʼin re naq teenaw naq wank eerikʼin li junelik yuʼam, laaʼex li nekexpaabʼank saʼ xkʼabʼaʼ li Ralal li Yos.
14 Ut chʼolchʼo chiqu naq nokooruuk chi aatinak rikʼin li Yos chi maakʼaʼ qaxiw ut maakʼaʼ naxye kʼaru tqapatzʼ re, aʼan nokoorabʼi wi naxchap ribʼ rikʼin li rajom.
15 Ut wi chʼolchʼo chiqu naq nokoorabʼi naq naqapatzʼ re yalaq kʼaru, naqanaw naq tqakʼul xbʼaan naq re xqapatzʼ.
16 Wi junaq naril li ras riitzʼin chi xbʼaanunkil li maak li inkʼaʼ nakʼamok saʼ li kamk, tento ttijoq chirix re naq li Yos tixkʼe xyuʼam li qas qiitzʼin aʼin. Aʼin choʼq rehebʼ li nekeʼxbʼaanu junaq li maak li inkʼaʼ nakʼamok saʼ li kamk. Abʼan wank jun li maak li nakʼamok saʼ li kamk. Chirix li maak aʼin ninye re, naq inkʼaʼ ttijoq.
17 Chixjunil li maaʼusilal nimla maak, abʼan wank jun li maak li inkʼaʼ nakʼamok saʼ li kamk.
18 Naqanaw naq li nayoʼlaak rikʼin li Yos inkʼaʼ chik naxyuʼami li maak, li kiyoʼlaak* bʼan rikʼin li Yos nakolok re* ut li Maaʼus maakʼaʼ naru naxbʼaanu re.
19 Naqanaw naq reho li Yos abʼan chixjunil li ruuchichʼochʼ wank rubʼel xwankil li Maaʼus.
20 Naqanaw naq li Ralal li Yos kichalk saʼ ruuchichʼochʼ ut xooxtenqʼa chi xtawbʼal ru ani li tzʼaqal Yos re naq tqanaw ru. Ut saʼ xkʼabʼaʼ li Jesukriist, li Ralal, wanko saʼ junajil rikʼin. Aʼan li tzʼaqal Yos ut li junelik yuʼam.
21 Ex walal inkʼajol, li raarokex inbʼaan, weent teebʼaanu rikʼinebʼ li pechʼbʼil yos.
Xtzʼaqobʼ ebʼ li naʼlebʼ
^ Aʼin naraj xyeebʼal, li Jesukriist li Ralal li Yos.
^ Malaj «nakʼaakʼalenk re».
