1 Pedro 1:1-25
1 Laaʼin laj Pedro xʼapóstol li Jesukriist, nekexintzʼiibʼa laaʼex li jekʼinbʼilex saʼebʼ li naʼaj re Ponto, Galacia, Capadocia, Asia ut Bitinia. Joʼkan, laaʼex aj abʼl tenamit ut sikʼbʼil eeru xbʼaan li Yos.
2 Aʼan li Yuwaʼbʼej li wank saʼ choxa ut aʼan kisikʼok eeru joʼ chanru kixkʼubʼ chi rubʼelaj. Aʼan kixkʼe eere li xsantil musiqʼej* re naq santaqex. Aʼan kixbʼaanu aʼin re naq texʼabʼinq chiru ut re naq saqaq eeru saʼ xkʼabʼaʼ li xkikʼel li Jesukriist:
Teekʼul taxaq chi yoʼon li xnimal rusilal ut li xtuqtuukilal li Yos.
3 Chinimaaq taxaq li Xyos ut li Xyuwaʼ li Qaawaʼ Jesukriist xbʼaan naq saʼ xkʼabʼaʼ naq qʼaxal naʼuxtaanank u* kixbʼaanu naq tooyoʼlaaq wiʼ chik re naq wanq qikʼin li yoʼyokil oybʼenihom saʼ xkʼabʼaʼ naq li Jesukriist kiwaklesiik chi yoʼyo saʼ xyanqebʼ li kamenaq.
4 Li ereens aʼin inkʼaʼ naqʼaak,* maakʼaʼ xtzʼajnil ut inkʼaʼ nachaqik. Aʼin xokbʼil saʼ choxa choʼq eere,
5 laaʼex li kʼulanbʼilex xbʼaan xwankil li Yos saʼ xkʼabʼaʼ leepaabʼal re naq texkoleʼq. Li kolbʼa ibʼ aʼin tkʼutbʼesimanq saʼ xraqik.
6 Joʼkan naq qʼaxal sa leechʼool usta saʼ li hoonal aʼin yook eekʼaʼuxl chirix jalan jalanq chi chʼaʼajkilal usta moko najt ta twanq.
7 Chixjunil aʼin nakʼulmank re naq leepaabʼal li ak xyaleʼk rix tnimaaq ru, t-oxloqʼiiq ut tixkʼul xloqʼal naq tkʼutbʼesimanq li xkʼanjel li Jesukriist. Li paabʼal joʼ aʼin qʼaxal oxloqʼ chiru li oor li naru naʼosoʼk usta ak xnumsimank saʼ xaml.
8 Usta laaʼex maajunwa xeeril ru, nekeera. Usta anaqwan inkʼaʼ nekeeril ru, nekeekʼutbʼesi naq nekeepaabʼ ut qʼaxal sa leechʼool. Li sahil chʼoolejil aʼin inkʼaʼ naru xchʼolobʼankil ut wank xloqʼal
9 ut chi sa leechʼool teekʼul li kolbʼa ibʼ saʼ xkʼabʼaʼ leepaabʼal.
10 Ebʼ li propeet li xeʼaatinak chaq chirix li xnimal rusilal li Yos xeʼxtzʼil rix chiʼus ut xeʼxkʼe xchʼool chi xtzolbʼal rix li kolbʼa ibʼ aʼin li xokxo choʼq eere.
11 Li Yos kiroksi chi rubʼelaj li xwankil re xyeebʼal rehebʼ naq li Kriist trahobʼtesiiq ut moqon chik tkʼeheʼq xloqʼal. Ut saʼ xkʼabʼaʼ aʼin inkʼaʼ xeʼxkanabʼ xtzʼilbʼal rix joqʼe tixkʼul aʼin li Kriist ut li tkʼulmanq rikʼin.
12 Li Yos kixkʼe chi naweʼk rehebʼ li propeet naq inkʼaʼ yookebʼ chi kʼanjelak choʼq rehebʼ, yookebʼ bʼan chi kʼanjelak choʼq eere. Ut anaqwan xkʼemank cheenaw aʼin saʼ xkʼabʼaʼebʼ li xeʼxkʼe cheenaw li chaabʼil esil. Aʼanebʼ xeʼxbʼaanu aʼin xbʼaan naq xtaqlamank chaq li santil musiqʼej re eetenqʼankil. Ut aʼin tzʼaqal li nekeʼraj xtawbʼal ru ebʼ li ánjel.
13 Joʼkan bʼiʼ, kawresimaq leekʼaʼuxl re naq texnaʼlebʼaq, texkʼoxlaq chiʼus naq teebʼaanu chixjunil ut kʼojkʼooq leechʼool chi roybʼeninkil naq tkʼutmanq cheeru li xnimal rusilal li Yos naq tixkʼutbʼesi ribʼ* li Jesukriist.
14 Laaʼex li alal kʼajolbʼej li nekexʼabʼink, meekanabʼ naq li nekeerahi chaq ru xbʼaan xmaakʼaʼil leenaʼlebʼ yooq eepakʼbʼal;
15 santaqex bʼan saʼ chixjunil leebʼaanuhom, joʼ naq Saant li kibʼoqok eere
16 xbʼaan naq tzʼiibʼanbʼil: «Tento naq santaqex xbʼaan naq santin laaʼin».
17 Ut wi nekextijok chiru li Yuwaʼbʼej li inkʼaʼ nasikʼok u naq naraqok aatin saʼ xbʼeen li junjunq chirix li xbʼaanuhom, teekʼutbʼesi naq nekeeroxloqʼi li Yos joʼ najtil texwanq joʼ abʼl tenamit.
18 Xbʼaan naq laaʼex xexʼisiik rubʼel xwankil li yuʼam li maakʼaʼ naʼok wiʼ li xeʼxkanabʼ eere leexeʼtoon. Abʼan nekeenaw naq aʼin moko kikʼulmank ta rikʼin li kʼaʼaq re ru li naʼosoʼk joʼ li plaat ut li oor.
19 Kibʼaanumank bʼan rikʼin xkikʼel li Kriist, li qʼaxal oxloqʼ, joʼ li xkikʼel li ral karneer li maakʼaʼ xpaltil chi moko xtzʼajnil.
20 Yaal naq aʼan kisikʼeʼk ru naq toj maajiʼ natiklaak li ruuchichʼochʼ, abʼan kikʼutbʼesimank saʼ xraqik ebʼ li kutan saʼ eekʼabʼaʼ.
21 Saʼ xkʼabʼaʼ aʼan nekeepaabʼ li Yos li kiwaklesink re chi yoʼyo saʼ xyanqebʼ li kamenaq ut kixkʼe xloqʼal re naq texruuq xpaabʼankil ut wanq eeroybʼenihom rikʼin li Yos.
22 Saʼ xkʼabʼaʼ naq xeejal eenaʼlebʼ ut xeechʼajobʼresi leeyuʼam naq xeepaabʼ li yaal, anaqwan nekeera eeribʼ joʼ nekeʼxra ribʼ li junkabʼal ut inkʼaʼ nekeebʼaanu saʼ kaʼpakʼal u. Joʼkan bʼiʼ, cheerahaq eeribʼ chi anchal eechʼool.
23 Xbʼaan naq inkʼaʼ kibʼaanumank naq texyoʼlaaq wiʼ chik saʼ xkʼabʼaʼ jun li iyaj* li naqʼaak, kibʼaanumank bʼan aʼin saʼ xkʼabʼaʼ jun li iyaj li inkʼaʼ naqʼaak aʼ li raatin li yoʼyokil Yos li wank chi junelik.
24 Xbʼaan naq «chixjunilebʼ li qas qiitzʼin chanchanebʼ li pim ut chixjunil li xloqʼal chanchan li uutzʼuʼuj li wank saʼ pim; li pim nachaqik ut li uutzʼuʼuj natʼaneʼk,
25 abʼan li raatin li Jehobʼa* wank chi junelik». Joʼkan bʼiʼ, li «aatin» aʼin, aʼan li chaabʼil esil li xkʼemank cheenaw.
Xtzʼaqobʼ ebʼ li naʼlebʼ
^ Li aatin saʼ griego, pnéuma. Taawil xchʼolobʼankil li aatin, musiqʼ.
^ Malaj «natoqʼobʼank u».
^ Malaj «inkʼaʼ naʼosoʼk».
^ Malaj «tkʼutbʼesiiq».
^ Aʼin naraj xyeebʼal, jun li iyaj li namoq malaj naxkʼe ru.
^ Taawil xchʼolobʼankil li aatin, Jehobʼa.
