1 Tesalonicenses 1:1-10
1 Laaʼin laj Pablo ut li wankebʼ wochbʼeen aʼan laj Silvano* ut laj Timoteo naqataqla li esilhu aʼin choʼq re li chʼuut re Tesalónica li wank saʼ junajil rikʼin li Yos li Yuwaʼbʼej ut li Qaawaʼ Jesukriist:
Chiwanq taxaq eerikʼin li xnimal rusilal ut li xtuqtuukilal li Yos.
2 Junelik naqabʼanyoxi re li Yos naq nekexqajultika saʼebʼ li qatij
3 xbʼaan naq chiru li Qayos, li Qayuwaʼ, maajunwa nasach saʼ qachʼool li kʼanjel li xeebʼaanu saʼ xkʼabʼaʼ leepaabʼal ut leerahom chirix li Yos. Ut naq xeekuy xnumsinkil ebʼ li chʼaʼajkilal saʼ xkʼabʼaʼ leeroybʼenihom chirix li Qaawaʼ Jesukriist.
4 Laaʼo naqanaw ex qechpaabʼanel li raarokex xbʼaan li Yos, naq aʼan kisikʼok eeru.
5 Laaʼex xeerabʼi li chaabʼil esil moko kaʼaj tawiʼ rikʼin aatin, rikʼin bʼan xtenqʼ li santil musiqʼej. Chʼolchʼo chiqu naq yaal li esil li xqakʼe cheenaw ut kʼajoʼ naq xextenqʼa li esil li xqakʼam eere. Ut nekeenaw chanru xoowank saʼ eeyanq re naq us wanqex.
6 Joʼkan ajwiʼ, xeekʼam eere qikʼin ut rikʼin li Qaawaʼ, usta yookex xkʼulbʼal naabʼal li rahilal xeekʼulubʼa li esil chi sa saʼ leechʼool. Li sahil chʼoolejil aʼin nachalk rikʼin li santil musiqʼej.
7 Chi joʼkan xeekʼe eeribʼ joʼ eetalil choʼq re chixjunilebʼ laj paabʼanel re Macedonia ut Acaya.
8 Relik chi yaal naq saʼ eekʼabʼaʼ, moko kaʼaj tawiʼ kiʼabʼimank resil li raatin li Jehobʼa* aran Macedonia ut Acaya, kinawmank ajwiʼ yalaq bʼar resil leepaabʼal chirix li Yos, joʼkan naq maakʼaʼ chik tooruuq xyeebʼal chirix aʼin.
9 Xbʼaan naq ebʼ aʼan inkʼaʼ nekeʼxkanabʼ xyeebʼal chirix li xbʼeen sut naq xqil qu ut chanru naq xeetzʼeqtaana leepechʼbʼil yos ut xexsuqʼi rikʼin li Yos re naq laaʼaqex xmoos li tzʼaqal ut yoʼyokil Yos
10 ut re roybʼeninkil li Ralal li wank saʼ choxa, li kixwaklesi chi yoʼyo saʼ xyanqebʼ li kamenaq, aʼin naraj xyeebʼal aʼ li Jesús li tooxkol chiru xjosqʼil li Yos li chalk re.
