1 Tesalonicenses 3:1-13
3 Joʼkan bʼiʼ, naq inkʼaʼ chik xooruuk xkuybʼal, xqakʼoxla naq us raj naq tookanaaq qajunes aran Atenas
2 ut naqataqla eerikʼin laj Timoteo li qechpaabʼanel ut aj kʼanjel chiru li Yos li naxkʼe chi naweʼk li chaabʼil esil chirix li Kriist. Naqataqla eerikʼin re naq tixwaklesi ut tixkʼojobʼ leechʼool re naq us wanqex saʼ leepaabʼal
3 ut chi joʼkan maaʼani truuq chi tʼaneʼk xbʼaanebʼ li chʼaʼajkilal aʼin. Xbʼaan naq laaʼex nekeenaw naq maakʼaʼ tooruuq xbʼaanunkil re naq inkʼaʼ tqakʼul ebʼ li rahilal aʼin.
4 Joʼkan ajwiʼ, naq wanko chaq eerikʼin rajlal naqaye chaq eere naq tqakʼul ebʼ li chʼaʼajkilal. Ut joʼ ak nekeenaw, joʼkan kikʼulmank.
5 Joʼkan bʼiʼ, naq inkʼaʼ chik xinruuk xkuybʼal, xintaqla laj Timoteo re xnawbʼal ma relik chi yaal naq kʼojkʼo eechʼool chirix li Yos, maare anchal laj Aaleenel ak xexraale ut li qakʼanjel maakʼaʼ raj kiʼok wiʼ.
6 Abʼan laj Timoteo tojaʼ tsutqʼiiq cheerulaʼaninkil ut kixseeraqʼi qe chirix li xkawil leepaabʼal ut leerahom. Naxye ajwiʼ naq junelik nokooʼeejultika chi sa saʼ leechʼool ut naq qʼaxal nekeeraj rilbʼal qu, joʼ naq laaʼo naqaj rilbʼal eeru.
7 Joʼkan naq, ex aj paabʼanel, saʼ chixjunil li qarahilal ut ebʼ li qachʼaʼajkilal, laaʼex ut li xkawil leepaabʼal li nekeekʼutbʼesi qʼaxal xkʼojobʼ qachʼool.
8 Xbʼaan naq laaʼo qʼaxal naqataw xwaklesinkil qachʼool naq laaʼex kaw xaqxokex saʼ leepaabʼal chirix li Qaawaʼ.
9 Relik chi yaal naq nokoobʼanyoxink cheerix chiru li Yos xbʼaan naq qʼaxal nekeesahobʼresi qachʼool.
10 Chi qʼeq ut chi kutan nokootzʼaamank chi anchal qametzʼew re naq tooruuq eerilbʼal ut xkʼebʼal eere li naʼajmank saʼ leepaabʼal.
11 Aʼ taxaq li Qayos ut li Qayuwaʼ ut li Qaawaʼ Jesús teʼxte chiqu li bʼe re naq tooruuq eerulaʼaninkil.
12 Aʼ taxaq li Qaawaʼ tixbʼaanu naq tkʼihanq, joʼkan, naq tkʼihanq li rahom li nekeerekʼa cheeribʼil eeribʼ joʼ ajwiʼ chirixebʼ li junchʼol joʼ chanru naq xkʼihank li qarahom cheerix
13 re naq aʼan tixkʼojobʼ leechʼool ut tixbʼaanu naq maakʼaʼaq eemaak ut saqaq leechʼool chiru li Qayos ut li Qayuwaʼ naq ak wanq arin* li Qaawaʼ Jesús rochbʼeenebʼ li santil paabʼanel.
Xtzʼaqobʼ ebʼ li naʼlebʼ
^ Li aatin saʼ griego, parousía. Taawil xchʼolobʼankil li aatin, ak wanq arin.
