1 Timoteo 3:1-16
3 Li ok we xyeebʼal tzʼaqal yaal: wi jun li winq yook xkʼebʼal xqʼe re naq twanq choʼq cheekel winq, naraj xkʼulbʼal jun li chaabʼil kʼanjel.
2 Joʼkan bʼiʼ, li cheekel winq tento naq chaabʼilaq li xyuʼam re naq maakʼaʼ qʼabʼanbʼilaq wiʼ, jun ajwiʼ rixaqil twanq ut tixnaw xbʼeresinkil chixjunil li tixbʼaanu; tento tkʼoxlaq chiʼus, tustuuq ru tnaʼlebʼaq, twulaq chiru xkʼulbʼalebʼ li qas qiitzʼin ut kawresinbʼilaq re kʼutuk.
3 Maawaʼaq aj kalajenaq chi moko aj sakʼonel chi moko kawaq ta xjolom. Maawaʼaq aj pleet chi moko txik xchʼool chirix li tumin.
4 Li winq aʼin tento tixnaw xbʼeresinkil chiʼus li xjunkabʼal ut ebʼ li xkokʼal tento teʼabʼinq chiru ut chaabʼilaqebʼ xnaʼlebʼ
5 (xbʼaan naq, wi junaq li winq inkʼaʼ naxnaw xbʼeresinkil chiʼus li xjunkabʼal, chanru truuq rilbʼal li xchʼuut li Yos?).
6 Moko akʼaq ta chi paabʼank re naq inkʼaʼ tnumtaaq xqʼetqʼetil ut tixkʼul ajwiʼ li raqbʼa aatin li kixkʼul laj Tza.*
7 Joʼkan ajwiʼ, tento naq chaabʼilaq li xyuʼam saʼ xyanqebʼ li maawaʼebʼ aj paabʼanel re naq maakʼaʼ qʼabʼanbʼilaq wiʼ ut inkʼaʼ ttʼaneʼq saʼ xraʼal laj Tza.*
8 Joʼkan ajwiʼ, ebʼ laj tenqʼanel saʼ li chʼuut tento teʼoxloqʼinq, maawaʼaqebʼ aj kapakʼal u chi moko teʼrukʼ ta naabʼal li bʼiin chi moko teʼxik ta xchʼool chi xrahinkil ru li tumin ut chi xsikʼbʼal li us kaʼajwiʼ choʼq rehebʼ xjunes,
9 kaw bʼan teʼxchap ribʼ rikʼin li xmuqmukil naʼlebʼ li Yos chirix li paabʼank chi saqebʼ ru li xchʼool.
10 Joʼkan ajwiʼ, xbʼeenwa tkʼemanq reetal ma kawresinbʼilebʼ ut naq ak xʼilmank naq maaʼani naqʼabʼank rehebʼ, teʼkʼanjelaq joʼ aj tenqʼanel.
11 Joʼkan ajwiʼ, ebʼ li ixq tento teʼoxloqʼinq ut inkʼaʼ teʼyoobʼanq aatin chirixebʼ li junchʼol. Tento teʼxnaw xbʼeresinkil chixjunil li nekeʼxbʼaanu ut teʼxkʼutbʼesi li xpaabʼal saʼ chixjunil.
12 Ebʼ laj tenqʼanel saʼ li chʼuut jun ajwiʼ rixaqil teʼwanq ut teʼxbʼeresi chiʼus ebʼ li xkokʼal ut ebʼ li xjunkabʼal.
13 Xbʼaan naq ebʼ li winq li nekeʼxbʼaanu chiʼus li xkʼanjel yookebʼ xtawbʼal naq us teʼaatinaq chirixebʼ ut yookebʼ ajwiʼ chi aatinak chirix li Kristo Jesús chi maakʼaʼebʼ xxiw.
14 Ak nawaj rilbʼal aawu abʼan wi inkʼaʼ tinwulaq saʼ junpaat tintzʼiibʼa aawe aʼin
15 re naq taanaw chanru tatnaʼlebʼaq laaʼat li wankat saʼ li xjunkabʼal li Yos. Li junkabʼal aʼan xchʼuut li yoʼyokil Yos, li naxkol ut naʼokenk chirix li yaal.
16 Joʼkan tzʼaqal, chʼolchʼo naq qʼaxal nim li xmuqmukil naʼlebʼ li Yos li naxchap ribʼ rikʼin xloqʼoninkil ru: “Li Jesús kitibʼeloʼk, li Yos kixye naq tiik xchʼool naq kixkʼe wiʼ chik xyuʼam saʼ musiqʼej ut kisutqʼiik rikʼinebʼ li ánjel. Kikʼemank chi naweʼk chirix saʼ xyanqebʼ li tenamit, li tenamit kixkʼulubʼa li kirabʼi chirix ut kikʼuleʼk taqeʼq rikʼin loqʼal”.
Xtzʼaqobʼ ebʼ li naʼlebʼ
^ Saʼ griego «li Diʼaabʼ». Taawil xchʼolobʼankil li aatin, Diʼaabʼ.
^ Saʼ griego «li Diʼaabʼ». Taawil xchʼolobʼankil li aatin, Diʼaabʼ.
