2 Corintios 5:1-21
5 Xbʼaan naq naqanaw naq li qochoch saʼ ruuchichʼochʼ aʼan li qatibʼel, yal numel ut tjukʼmanq. Abʼan laaʼo tqakʼul rikʼin li Yos jun li ochoch saʼ choxa li twanq junelik ut moko yiibʼanbʼil ta rikʼin ruqʼ winq.
2 Relik chi yaal naq nayotʼeʼk qachʼool xbʼaan li ochoch aʼin, ak naqaj xkʼulbʼal li ochoch li nachalk saʼ choxa li tooxtzʼap joʼ jun li aqʼej
3 ut naq tqakʼe chiqix moko tʼustʼuqo ta.
4 Joʼkan naq li wanko saʼ li ochoch aʼin nayotʼeʼk qachʼool ut yook qakʼaʼuxl, moko xbʼaan ta naq naqaj risinkil chiqix li ochoch aʼin, naqaj bʼan xkʼebʼal chiqix li jun chik re naq li junelik yuʼam tkanaaq choʼq reqaj li tibʼelej li nakamk.
5 Joʼkan bʼiʼ, li Yos xooxkawresi choʼq re aʼin ut aʼan kixkʼe qe li santil musiqʼej joʼ eetalil naq yaal naq tixkʼe qe ebʼ li osobʼtesink li tchalq moqon.
6 Xbʼaan naq chʼolchʼo chiqu aʼin ut naqanaw naq najt wanqo rikʼin li Qaawaʼ wi toj wanko saʼ tibʼelej
7 xbʼaan naq naqabʼeresi qibʼ xbʼaan li naqapaabʼ ut maawaʼ xbʼaan li naqil ru.
8 Abʼan chʼolchʼo chiqu aʼin ut twulaq raj chiqu xyiibʼankil li qochoch rikʼin li Qaawaʼ chiru naq wanqo saʼ li tibʼelej aʼin.
9 Joʼkan bʼiʼ, maakʼaʼ naxye ma wanko rikʼin malaj najt wanko rikʼin, li tento tqakʼe qachʼool aʼan naq tooxkʼulubʼa.
10 Xbʼaan naq chiqajunilo toxqakʼut qu chiru li xraqlebʼaal aatin li Kriist re naq traqmanq aatin saʼ xbʼeen li junjunq chirix li us malaj li inkʼaʼ us li kixbʼaanu naq wank chaq saʼ tibʼelej.
11 Saʼ xkʼabʼaʼ naq naqanaw li naraj xyeebʼal roxloqʼinkil li Qaawaʼ, inkʼaʼ naqakanabʼ rekʼasinkilebʼ xchʼool li qas qiitzʼin re naq teʼxpaabʼ li yooko xkʼutbʼal, li Yos naxnaw qu chiʼus* ut nawoybʼeni naq laaʼex ajwiʼ teenaw chanru qanaʼlebʼ.
12 Inkʼaʼ yooko xnimankil wiʼ chik qibʼ cheeru, yooko bʼan xkʼebʼal cheeru jun xyaalal re naq teenima eeribʼ chiqix ut chi joʼkan texruuq xsumenkilebʼ li nekeʼxnima ribʼ chirix li kʼaru wank rehebʼ ut inkʼaʼ chirix li wank saʼ xchʼoolebʼ.
13 Xbʼaan naq wi kaan qu, xqabʼaanu choʼq re li Yos; wi tuqtu qajolom, xqabʼaanu choʼq eere.
14 Li rahom li wank rikʼin li Kriist nokoorekʼasi chi tzʼaqal re ru ut aʼin li xqataw ru: naq jun li winq kikamk saʼ xkʼabʼaʼ chixjunilebʼ xbʼaan naq chixjunilebʼ ak kamenaqebʼ chik.
15 Ut aʼan kikamk saʼ xkʼabʼaʼ chixjunilebʼ re naq li yoʼyokebʼ inkʼaʼ chik yoʼyoqebʼ choʼq re xjunesebʼ, yoʼyoqebʼ bʼan choʼq re li kikamk saʼ xkʼabʼaʼebʼ ut kiwaklesiik chi yoʼyo.
16 Joʼkan bʼiʼ, chalen anaqwan inkʼaʼ chik nokooraqok aatin saʼ xbʼeenebʼ li qas qiitzʼin rikʼin li naqil ut wi joʼkan xqil chaq li Kriist inkʼaʼ chik naqabʼaanu aʼin.
17 Joʼkan bʼiʼ wi junaq li qas qiitzʼin wank saʼ junajil rikʼin li Kriist, li qas qiitzʼin aʼin jun akʼ yobʼtesihom. Li qʼeel ak xnumeʼk. Kʼehomaq reetal! Anaqwan xwulak chik li akʼ.
18 Abʼan chixjunil li kʼaʼaq re ru chalenaq rikʼin li Yos, li kixbʼaanu naq tqakʼam wiʼ chik qibʼ saʼ usilal rikʼin saʼ xkʼabʼaʼ li Kriist. Ut kixkʼe qe li kʼanjel aʼin re naq tqatenqʼahebʼ li junchʼol chi xkʼambʼal wiʼ chik ribʼebʼ saʼ usilal rikʼin.
19 Aʼin naraj xyeebʼal naq li Yos yook roksinkil li Kriist re naq ebʼ li qas qiitzʼin teʼxkʼam wiʼ chik ribʼ saʼ usilal rikʼin. Ut aʼan moko naxkʼe ta chik saʼ ajl li xmaakebʼ. Ut li Yos xkʼe qe li kʼanjel aʼin re naq tqaye rehebʼ li qas qiitzʼin naq teʼruuq wiʼ chik xkʼambʼal ribʼ saʼ usilal rikʼin.
20 Joʼkan bʼiʼ, laaʼo xtaql li Yos li nokookʼanjelak joʼ ruuchil li Kriist, chanchan tawiʼ li Yos yook relajinkil ruhebʼ li qas qiitzʼin saʼ qakʼabʼaʼ. Joʼ ruuchil li Kriist naqatzʼaama chiruhebʼ: «Kʼamomaq wiʼ chik eeribʼ saʼ usilal rikʼin li Yos».
21 Li Kriist maajunwa kimaakobʼk ut li Yos kixqʼaxtesi joʼ mayejanbʼil xul chirix li qamaak re naq saʼ xkʼabʼaʼ aʼan ttikoʼq wiʼ chik ru li qachʼool chiru li Yos.
Xtzʼaqobʼ ebʼ li naʼlebʼ
^ Malaj «kutan saqen wanko chiru li Yos».
