2 Corintios 7:1-16
7 Joʼkan bʼiʼ, ex wechpaabʼanel li raarokex inbʼaan, saʼ xkʼabʼaʼ naq wank qikʼin ebʼ li yeechiʼom aʼin, qisihaq chiqix chixjunil li naxtzʼajni li tibʼelej ut li chʼoolej, ut chi joʼkan qʼaxal santaqo naq yooqo roxloqʼinkil li Yos.
2 Chooʼeekʼul saʼ leechʼool. Maaʼani xqabʼaanu re li maaʼusilal, maaʼani xqapoʼk xchʼool ut xkʼaʼuxl, maaʼani xqabʼalaqʼi re naq tookanaaq rikʼin li kʼaru re.
3 Moko ninye ta eere aʼin re naq ttenebʼaaq kamk saʼ eebʼeen. Xbʼaan naq ak xinye eere chi rubʼelaj naq chi moko li kamk chi moko li yuʼam tixbʼaanu naq tqakanabʼ eeraabʼal.
4 Nekexwaatina chi maakʼaʼ inkʼaʼuxl. Wank naabʼal li chaabʼil naʼlebʼ li tinye cheerix. Kʼojkʼo inchʼool ut sa nawekʼa wibʼ usta wank jalan jalanq qarahilal.
5 Naq xoowulak aran Macedonia relik chi yaal naq inkʼaʼ xqakanabʼ xkʼulbʼal aʼin, yooko bʼan xkʼulbʼal jalan jalanq li rahilal: ebʼ li qas qiitzʼin xikʼ yookebʼ chaq chi qilbʼal ut laaʼo yook qakʼaʼuxl chirixebʼ li chʼuut.
6 Abʼan li Yos, li naxkʼojobʼebʼ xchʼool li qʼaxal rahebʼ saʼ xchʼool, kixkʼojobʼ qachʼool naq xoorulaʼani laj Tito.
7 Ut moko kaʼaj tawiʼ kixkʼojobʼ qachʼool rikʼin xkʼulunik, kixkʼojobʼ ajwiʼ qachʼool xbʼaan naq laaʼex xeekʼojobʼ xchʼool. Aʼan kixye qe naq qʼaxal nekeeraj rilbʼal wu, naq jwal yook xrahil leechʼool ut qʼaxal yook eekʼaʼuxl chiwix ut aʼin qʼaxal kixsahobʼresi inchʼool.
8 Joʼkan naq, wi xinrahobʼtesi leechʼool xbʼaan li esilhu li xintzʼiibʼa, inkʼaʼ nayotʼeʼk inchʼool. Usta saʼ xtiklajik kiyotʼeʼk inchʼool (naq xwil naq li esilhu kixrahobʼtesi leechʼool usta jun kʼamok ajwiʼ)
9 anaqwan nasahoʼk inchʼool moko xbʼaan ta naq xinrahobʼtesi leechʼool, nasahoʼk bʼan linchʼool xbʼaan naq li rahil chʼoolej kixbʼaanu naq teeyotʼ eechʼool ut teejal eenaʼlebʼ. Kirahoʼk saʼ leechʼool joʼ chanru nawulak chiru li Yos, joʼkan naq inkʼaʼ xeekʼul junaq li rahilal saʼ qakʼabʼaʼ.
10 Xbʼaan naq li rahil chʼoolej li nawulak chiru li Yos naxbʼaanu naq ebʼ li qas qiitzʼin teʼxyotʼ xchʼool ut teʼxjal xnaʼlebʼ ut li rahil chʼoolej ajwiʼ aʼin nakʼamok saʼ li kolbʼa ibʼ, ut chirix aʼin maaʼani nayotʼeʼk xchʼool. Abʼan li rahil chʼoolejil li narekʼa li ruuchichʼochʼ nakʼamok saʼ li kamk.
11 Chʼolchʼo naq kirahoʼk saʼ leechʼool joʼ kiraj li Yos ut saʼ xkʼabʼaʼ aʼin xeekʼe eechʼool chi xbʼaanunkil li us. Xeekʼutbʼesi naq maakʼaʼ eemaak, xeʼxchʼaʼajkoʼk xbʼaan li maaʼusilal li xbʼaanumank, xeeroxloqʼi li Yos, xeeraj xyotʼbʼal eechʼool ut xjalbʼal eenaʼlebʼ, xexkʼanjelak chiru li Yos chi anchal eechʼool ut xeetuqubʼ ru li chʼaʼajkilal li xbʼaanumank. Chaabʼil xbʼaanumank chixjunil re xtuqubʼankil ru li chʼaʼajkilal aʼin.
12 Usta xexintzʼiibʼa moko xinbʼaanu ta saʼ xkʼabʼaʼ li qas qiitzʼin li kixbʼaanu li maaʼusilal chi moko saʼ xkʼabʼaʼ li kikʼuluk re li rahilal, xexintzʼiibʼa bʼan re naq tkʼutunq saʼ eeyanq ut chiru li Yos naq xeekʼe eeqʼe re qapaabʼankil.
13 Aʼin kixkʼojobʼ qachʼool.
Abʼan moko kaʼajwiʼ aʼin kixkʼojobʼ qachʼool, qʼaxal kisahoʼk wiʼ chik qachʼool naq xqil xsahil xchʼool laj Tito xbʼaan naq cheejunilex xeewaklesi xchʼool.
14 Xbʼaan naq, wi us xinye cheerix chiru laj Tito, inkʼaʼ xinkanaak saʼ xutaan eebʼaan. Joʼ chanru naq yaal chixjunil li xqaye eere, xʼilmank ajwiʼ naq yaal chixjunil li xinye re laj Tito cheerix.
15 Joʼkan ajwiʼ, qʼaxal nakʼiik wiʼ chik li xrahom cheerix naq naxjultika naq cheejunilex xeekʼe eechʼool chi abʼink, ut naq qʼaxal xeeroxloqʼi naq xeekʼul.
16 Chʼolchʼo chiwu naq teebʼaanu li us saʼ chixjunil ut aʼin naxkʼe xsahil inchʼool.
