2 Corintios 9:1-15
9 Ut chirix li kʼanjel li nabʼaanumank re xtenqʼankilebʼ li santil paabʼanel, moko aajel ta ru naq texintzʼiibʼa
2 xbʼaan naq ninnaw naq nekeeraj tenqʼank ut chirix aʼin ninʼaatinak chiʼus chiruhebʼ laj Macedonia rikʼin xyeebʼal naq ebʼ laj Acaya ak kawresinbʼilebʼ re tenqʼank chalen jun chihabʼ anaqwan. Ut saʼ xkʼabʼaʼ naq xextenqʼank chi anchal leechʼool, li xkʼihalebʼ nekeʼraj ajwiʼ tenqʼank.
3 Abʼan nintaqla eerikʼin ebʼ li qechpaabʼanel re naq kawresinbʼilaqex joʼ xinye cheerix, chi joʼkan teʼxkʼe reetal naq moko tikʼtiʼ ta li xqaye naq nekeeraj tenqʼank.
4 Xbʼaan naq wi ebʼ laj Macedonia teʼxik raj chiwix ut moko kawresinbʼilex ta, laaʼo tookanaaq saʼ xutaan ut ma tojaʼ ta chik laaʼex xbʼaan naq xqaye naq kawresinbʼilex.
5 Joʼkan bʼiʼ, xinkʼoxla naq aajel ru xyeebʼal rehebʼ li qechpaabʼanel naq teʼwulaq eerikʼin xbʼeenwa chiqu laaʼo re xkawresinkil li kubʼsiil li xeeyeechiʼi. Ut chi joʼkan ak wanq li kubʼsiil naq toowulaq ut teekʼutbʼesi naq yookex chi kʼehok chi anchal eechʼool ut inkʼaʼ minbʼil eeru.
6 Aʼin li nawaj xyeebʼal, li kachʼin naraw, kachʼin li ru tixtaw. Ut li naabʼal naraw, naabʼal li ru tixtaw.
7 Li junjunq tixbʼaanu li xʼalaak saʼ xchʼool ut inkʼaʼ chi kabʼrix xchʼool chi moko minbʼil ta ru xbʼaan naq li Yos naxra li nakʼehok chi sa saʼ xchʼool.
8 Joʼkan ajwiʼ li Yos naru xkʼutbʼesinkil cheerix li xnimal rusilal re naq inkʼaʼ tpaltoʼq cheeru li aajel ru. Ut qʼaxal naabʼalaq li tkʼanjelaq cheeru re xbʼaanunkil jalan jalanq chi kʼanjel.
9 (Joʼ chanru tzʼiibʼanbʼil: «Aʼan kijekʼink chi naabʼal; ut kixkʼe rehebʼ li nebʼaʼ. Li xtiikilal twanq chi junelik».
10 Li naxkʼe naabʼal li iyaj re laj awinel ut li naxkʼe li kaxlanwa re li nawaʼak, numtajenaq li iyaj tixkʼe eere re naq texʼawq ut tixtambʼresi li naruuchi leetiikilal).
11 Li Yos qʼaxal xexrosobʼtesi re naq chi yoʼon texkʼehoq, ut ebʼ li qas qiitzʼin teʼxbʼanyoxi re li Yos li maatan li xeetaqla chiqix re naq tqajekʼi rehebʼ li junchʼol.
12 Xbʼaan naq li kʼanjel aʼin li yook chi bʼaanumank re xtenqʼankilebʼ li junchʼol moko kaʼaj tawiʼ yook chi bʼaanumank re xtenqʼankilebʼ chiʼus li santil paabʼanel li wankebʼ saʼ rajbʼal ru, yook bʼan chi bʼaanumank re naq naabʼalebʼ chik li qas qiitzʼin teʼbʼanyoxinq chiru li Yos.
13 Chi joʼkan, teʼxkʼe xloqʼal li Yos xbʼaan naq li kʼanjel aʼin chirix li tenqʼank naxkʼutbʼesi naq laaʼex nekeepaabʼ li chaabʼil esil chirix li Kriist, joʼ chanru xeekʼe chi naweʼk chiruhebʼ li junchʼol, ut naq nekexkʼehok chi yoʼon choʼq rehebʼ aʼan ut choʼq re chixjunilebʼ.
14 Ut naq teʼtzʼaamanq cheerix, teʼxye naq qʼaxal nekexraheʼk xbʼaanebʼ saʼ xkʼabʼaʼ li xnimal rusilal li Yos li kixkʼutbʼesi cheerix.
15 Naqabʼanyoxi re li Yos xbʼaan li maatan aʼin li chʼaʼaj xchʼolobʼankil rikʼin aatin.
