2 Pedro 1:1-21
1 Laaʼin aj Simón Pedro, xmoos ut xʼapóstol li Jesukriist. Yookin eetzʼiibʼankil laaʼex li xeekʼul li tzʼaqal kʼutum li terto xtzʼaq li xqakʼul ajwiʼ laaʼo. Chiqajunilo xqakʼul chixjunil aʼin xbʼaan naq li Yos ut li Jesukriist, aj Kolol qe, tiikebʼ xchʼool.
2 Teekʼul taxaq chi yoʼon li xnimal rusilal ut li xtuqtuukilal li Yos ut li Qaawaʼ Jesús saʼ xkʼabʼaʼ li nawom li tzʼaqal re ru
3 xbʼaan naq li xwankil li Yos kixkʼe qe* chixjunil li tooxtenqʼa chi roksinkil li qayuʼam re xkʼebʼal xloqʼal li Yos chi anchal qachʼool. Xqakʼul chixjunil aʼin xbʼaan naq naqanaw ru chiʼus li Yos. Aʼan xooxbʼoq xbʼaan xloqʼal ut xbʼaan naq aʼan chaabʼil.
4 Saʼ xkʼabʼaʼ aʼin li Yos kixkʼe qe* li yeechiʼom li qʼaxal oxloqʼ ut qʼaxal chaabʼil re naq texruuq chi musiqʼoʼk joʼ li Yos. Kixbʼaanu aʼin xbʼaan naq xooʼelelik chiru li xqʼaajik li ruuchichʼochʼ li nachalk xbʼaan xrahinkil ru li inkʼaʼ us.
5 Saʼ xkʼabʼaʼ aʼin qʼaxal teekʼe eeqʼe re naq teekʼe xtzʼaqobʼ leepaabʼal rikʼin xbʼaanunkil li us; xbʼaanunkil li us rikʼin leenawom;
6 leenawom rikʼin xkuybʼal eeribʼ; xkuybʼal eeribʼ rikʼin leekuyum;
7 leekuyum rikʼin xloqʼoninkil li Yos; xloqʼoninkil li Yos rikʼin xraabʼalebʼ li qechpaabʼanel; xraabʼalebʼ li qechpaabʼanel rikʼin xraabʼal chixjunilebʼ li qas qiitzʼin.
8 Xbʼaan naq wi wank eerikʼin chixjunil aʼin ut nekeekʼutbʼesi chi yoʼon, teeroksi li tzʼaqal nawom chirix li Qaawaʼ Jesukriist re naq inkʼaʼ texkanaaq chi xaqxo, chanchanaqex bʼan li cheʼ li naʼuuchink.
9 Mutzʼ junaq li qas qiitzʼin wi maakʼaʼ rikʼin ebʼ li naʼlebʼ aʼin, naxtzʼap xnaqʼ ru chiru li saqenk* ut kisach saʼ xchʼool naq kuybʼil chik li maak li kixbʼaanu chaq.
10 Saʼ xkʼabʼaʼ aʼin ex aj paabʼanel, qʼaxal teekʼe wiʼ chik eeqʼe chirix aʼin re naq chʼolchʼooq cheeru naq bʼoqbʼilex ut naq sikʼbʼil eeru. Wi junelik nekeebʼaanu aʼin, maajunwa textichkʼoq.
11 Ut chi joʼkan teekʼul li nimla osobʼtesink ut texʼoq saʼ li Awabʼejilal li wank chi junelik. Li awabʼejilal aʼin re li Qaawaʼ Jesukriist, aj Kolol qe.
12 Joʼkan naq, junelik wank saʼ inchʼool naq tinjultika eere ebʼ li naʼlebʼ aʼin usta ak nekeenaw chik ut chapchokex chiʼus rikʼin li yaal li xeetzol chaq.
13 Abʼan, ninkʼoxla naq us eerajsinkil rikʼinebʼ li naʼlebʼ aʼin anaqwan naq wankin saʼ li chʼina ochoch* aʼin
14 xbʼaan naq chʼolchʼo chiwu naq chi seebʼ tinkanabʼ li chʼina ochoch aʼin joʼ kixkʼe chinnaw li Qaawaʼ Jesukriist.
15 Junelik tinbʼaanu chixjunil li wank saʼ wuqʼ re naq texruuq xjultikankil* li naʼlebʼ aʼin naq maaʼaniqin chik.
16 Laaʼo inkʼaʼ xqoksi seeraqʼinbʼil aatin re xkʼebʼal cheenaw li xwankil li Qaawaʼ Jesukriist ut naq ak wanq arin,* xqil bʼan li xloqʼal.
17 Xbʼaan naq aʼan kiʼoxloqʼiik ut kikʼeheʼk xloqʼal xbʼaan li Yos, li Yuwaʼbʼej. Kikʼulmank aʼin naq li xnimal ru loqʼal kixye re ebʼ li aatin aʼin: «Aʼin li Walal, li qʼaxal raaro inbʼaan, aʼan naxsahobʼresi linchʼool».
18 Joʼkan, laaʼo xqabʼi ebʼ li aatin aʼin li kichalk saʼ choxa naq wanko chaq rochbʼeen saʼ li santil tzuul.
19 Saʼ xkʼabʼaʼ aʼin, chʼolchʼo chiqu naq ebʼ li propesiiy teʼtzʼaqloq ru. Us nekeebʼaanu laaʼex naq nekeekʼe eechʼool chirixebʼ li propesiiy xbʼaan naq chanchan li kandil* li naxkutanobʼresi li xqʼoqyinil leechʼool. Meekanabʼ xbʼaanunkil aʼin (toj reetal thikʼeʼq ru li kutan ut li chahim re li eqʼla tixkʼut ribʼ).
20 Xbʼaan naq nekeenaw naq chixjunil ebʼ li propesiiy li tzʼiibʼanbʼil saʼ li Raatin li Yos moko chalenaq ta saʼ xkʼaʼuxl junaq winq.
21 Xbʼaan naq maajunwa kichalk junaq li propesiiy xbʼaan xkʼaʼuxl junaq winq, ebʼ li winq bʼan xeʼaatinak saʼ xkʼabʼaʼ li Yos naq xeʼekʼasiik xbʼaan li santil musiqʼej.
Xtzʼaqobʼ ebʼ li naʼlebʼ
^ Malaj «kixkʼe qe chi sibʼil».
^ Malaj «kixkʼe qe chi sibʼil».
^ Maare «mutzʼ , inkʼaʼ naʼilok chi najt».
^ Aʼin naraj xyeebʼal, li xtibʼel.
^ Malaj «teeye».
^ Li aatin saʼ griego, parousía. Taawil xchʼolobʼankil li aatin, ak wanq arin.
^ Malaj «li lámpara».
