2 Tesalonicenses 3:1-18
3 Re xraqbʼal, ex wechpaabʼanel, meekanabʼ tijok chiqix re naq li raatin li Jehobʼa* yooq xjekʼbʼal ribʼ saʼ junpaat ut yooq chi kʼemank xloqʼal joʼ ak yook chi bʼaanumank saʼ eeyanq
2 ut re naq tookoleʼq chiruhebʼ li winq li nekeʼxbʼaanu li maaʼusilal ut maaʼusebʼ xnaʼlebʼ xbʼaan naq li paabʼal moko re ta chixjunilebʼ.
3 Abʼan li Qaawaʼ naxbʼaanu li naxye ut tixwaklesi leechʼool ut texkol chiru li Maaʼus.
4 Joʼkan ajwiʼ, kʼojkʼo qachʼool chirix li Qaawaʼ naq laaʼex texʼabʼinq ut inkʼaʼ teekanabʼ xpaabʼankil li xqakʼut cheeru.
5 Li Qaawaʼ taxaq tixbʼeresi leechʼool re naq teera li Yos ut teekʼutbʼesi eekuyum saʼ xkʼabʼaʼ li Kriist.
6 Anaqwan ex wechpaabʼanel, saʼ xkʼabʼaʼ li Qaawaʼ Jesukriist naqaye eere naq teenajtobʼresi eeribʼ rikʼin laj paabʼanel li inkʼaʼ chik naʼabʼink ut inkʼaʼ chik naxyuʼami li xeekʼul* qikʼin.
7 Laaʼex nekeenaw chanru teekʼam eere qikʼin xbʼaan naq moko xoowank ta saʼ eeyanq joʼ li winq li inkʼaʼ chik naʼabʼink
8 chi moko xoowaʼak ta chi sibʼil. Xookʼanjelak bʼan chi qʼeq ut chi kutan ut xqakʼe qaqʼe re naq maaʼani eere tixtoj chixjunil li qasachomq.
9 Ut moko xbʼaan ta naq maakʼaʼ qakʼulubʼ,* abʼan xqaj xkʼebʼal eere jun li eetalil re naq teekʼam eere qikʼin.
10 Joʼkan ajwiʼ, naq wanko chaq saʼ eeyanq, xqakʼe eere li naʼlebʼ aʼin: «Wi junaq eere inkʼaʼ naraj kʼanjelak, miwaʼak».
11 Xbʼaan naq yooko rabʼinkil naq wiibʼ oxibʼ saʼ eeyanq inkʼaʼ chik nekeʼabʼink, inkʼaʼ nekeʼkʼanjelak ut nekeʼxchʼik ribʼ bʼarwiʼ inkʼaʼ nekeʼbʼoqeʼk.
12 Rehebʼ li qas qiitzʼin aʼin naqaye ut naqatzʼaama chiruhebʼ saʼ xkʼabʼaʼ li Qaawaʼ Jesukriist naq teʼkʼanjelaq saʼ xyaalal ut teʼxwaʼ li tzekemq li xeʼxkʼanjela rikʼin ruqʼ.
13 Joʼkan ajwiʼ ex wechpaabʼanel, meekanabʼ xbʼaanunkil li us.
14 Abʼan, wi junaq eere inkʼaʼ naxpaabʼ li naqaye eere saʼ li esilhu aʼin, weent teebʼaanu rikʼin li qas qiitzʼin aʼin* ut teekanabʼ wank choʼq ramiiw re naq txutaanaq.
15 Abʼanan moko xikʼ ta teeril, junelik bʼan teekʼe xnaʼlebʼ joʼ eerechpaabʼanel.
16 Aʼ taxaq li Qaawaʼ li naxkʼe li tuqtuukilal, tixkʼe eetuqtuukilal junelik saʼ chixjunil. Aʼ li Qaawaʼ taxaq chiwanq eerikʼin.
17 Laaʼin laj Pablo, nintzʼiibʼa rikʼin wuqʼ li sahil chʼoolejil aʼin, junelik nintzʼiibʼa ebʼ li esilhu chi joʼkaʼin re naq teenaw naq laaʼin xintzʼiibʼank re.
18 Aʼ taxaq li xnimal rusilal li Qaawaʼ Jesukriist chiwanq eerikʼin.
Xtzʼaqobʼ ebʼ li naʼlebʼ
^ Taawil xchʼolobʼankil li aatin, Jehobʼa.
^ Maare «xeʼxkʼul».
^ Saʼ griego «qawankil».
^ Saʼ griego «teereetali li qas qiitzʼin aʼin».
