3 Juan 1:1-14
1 Laaʼin li winq li cheekin chik, yookin aatzʼiibʼankil Gayo, li raarokat inbʼaan.
2 At wechpaabʼanel nintijok re naq kawaqat ut us t-elq chaawu chixjunil joʼ naq us yook chi elk chaawu anaqwan.
3 Kʼajoʼ xsahoʼk saʼ linchʼool naq xeʼkʼulunk ebʼ laj paabʼanel ut xeʼxseeraqʼi naq wank saʼ laachʼool li tzʼaqal kʼutum ut yookat xyuʼaminkil.
4 Kʼajoʼ nasahoʼk saʼ linchʼool rabʼinkil naq ebʼ li walal inkʼajol wankebʼ saʼ li yaal.
5 At wechpaabʼanel yookat xkʼutbʼesinkil naq wank saʼ laachʼool li tzʼaqal kʼutum naq nakaatenqʼahebʼ laj paabʼanel usta inkʼaʼ nakaanawebʼ ru.
6 Ebʼ aʼan xeʼxseeraqʼi re li chʼuut chirix chanru nakatrahok. Bʼaanu usilal, kʼe rehebʼ li tkʼanjelaq chiruhebʼ saʼebʼ li xbʼihaaj ut taabʼaanu joʼ chanru nawulak chiru li Yos.
7 Xbʼaan naq xkohebʼ chi xkʼebʼal chi naweʼk li xkʼabʼaʼ li Yos ut moko xeʼroybʼeni ta naq wank tkʼemanq rehebʼ xbʼaanebʼ li tenamit.
8 Joʼkan naq tenebʼanbʼil saʼ qabʼeen xkʼulbʼalebʼ laj paabʼanel joʼebʼ aʼin re naq tookʼanjelaq saʼ junajil re xkʼebʼal chi naweʼk li yaal.
9 Xintzʼiibʼa jun li esilhu choʼq re li chʼuut, abʼan laj Diótrefes, li nawulak chiru taqlank saʼ xyanqebʼ inkʼaʼ nokooroxloqʼi ut inkʼaʼ naxkʼulubʼa li naqaye.
10 Ut wi tinxik aran, tinkʼe chi naweʼk naq yook xyeebʼal li maaʼusilal chiqix. Abʼan moko kaʼaj tawiʼ aʼin naxbʼaanu, inkʼaʼ ajwiʼ naroxloqʼihebʼ laj paabʼanel chi moko naxkʼulebʼ. Ut ebʼ laj paabʼanel li nekeʼraj xkʼulbʼal li rechpaabʼanelil naxyal xrambʼal chiruhebʼ ut naxyal risinkilebʼ saʼ li chʼuut.
11 At wechpaabʼanel maakʼam aawe rikʼinebʼ li nekeʼxbʼaanu li maaʼusilal, kʼam bʼan aawe rikʼinebʼ li nekeʼxbʼaanu li us. Li naxbʼaanu li us naxkanabʼ naq li Yos tbʼeresinq re. Li naxbʼaanu li inkʼaʼ us inkʼaʼ rilom ru* li Yos.
12 Us nekeʼaatinak chirix laj Demetrio chixjunilebʼ laj paabʼanel ut li yaal naxkʼutbʼesi aʼin. Laaʼo ajwiʼ us nokooʼaatinak chirix ut nakaanaw naq yaal li naqaye.
13 Toj naabʼal raj tintzʼiibʼa aawe, abʼan inkʼaʼ nawaj xtzʼiibʼankil.
14 Nawoybʼeni naq chi seebʼ tqil qibʼ ut tooʼaatinaq.
Li Yos taxaq tixkʼe eetuqtuukilal.
Ebʼ li qamiiw nekeʼxtaqla xsahil aachʼool. Taakʼe xsahil xchʼool ebʼ li qamiiw ut taaye rehebʼ aʼin chixjunqalebʼ.
Xtzʼaqobʼ ebʼ li naʼlebʼ
^ Malaj «naxnaw ru».
