Gálatas 2:1-21
2 Naq ak xnumeʼk kaalaju chihabʼ xintaqeʼk wiʼ chik Jerusalén wochbʼeen laj Bernabé ut xinkʼam ajwiʼ chiwix laj Tito.
2 Xintaqeʼk saʼ xkʼabʼaʼ li kikʼutbʼesimank chiwu ut xinchʼolobʼ rehebʼ li qechpaabʼanel li chaabʼil esil li yookin xkʼebʼal chi naweʼk rehebʼ li junchʼol chi tenamit. Aran xinchʼutubʼebʼ li qechpaabʼanel li oxloqʼinbʼilebʼ ru ut kaʼajwiʼ rikʼinebʼ xinʼaatinak re naq chʼolchʼooq chiwu naq moko yookin ta chi aanilak chi moko xinʼaanilak ta chi maakʼaʼ ajʼe.
3 Abʼan chi moko laj Tito, li wank wikʼin, xeʼxmin ru chi xsetbʼal xtzʼuumal xtzʼejwal, usta aj griego.
4 Li chʼaʼajkilal kitiklaak xbʼaanebʼ li bʼalaqʼ aj paabʼanel li xeʼwulak saʼ li qachʼuut re qachʼuukinkil. Ebʼ laj paabʼanel aʼin xeʼraj rilbʼal ma yaal naq moko laaʼo ta chik xmoos li Chaqʼrabʼ xbʼaan naq wanko saʼ junajil rikʼin li Kristo Jesús ut chi joʼkan teʼruuq qakʼebʼal choʼq xmoos li Chaqʼrabʼ.
5 Abʼan laaʼo inkʼaʼ xqapaabʼ rehebʼ chi moko xqakʼulubʼa ta bʼayaq re naq li yaal chirix li chaabʼil esil junelik wanq eerikʼin.
6 Ut ebʼ li winq li ilbʼilebʼ naq wankebʼ xwankil, laaʼin maakʼaʼ nawaj re ma wankebʼ chaq xwankil malaj inkʼaʼ xbʼaan naq li Yos moko naxkʼe ta xwankil li naʼilmank chi kutankil. Ebʼ li winq aʼin li qʼaxal oxloqʼebʼ ru moko xeʼxye ta we junaq li akʼ naʼlebʼ.
7 Xeʼxkʼe bʼan reetal naq xineʼxxaqabʼ chi xkʼebʼal chi naweʼk li chaabʼil esil rehebʼ li maawaʼebʼ aj judiiy,* joʼ naq laj Pedro kixaqabʼaak chi xkʼebʼal chi naweʼk li chaabʼil esil rehebʼ laj judiiy*
8 xbʼaan naq li kikʼehok re xwankil laj Pedro re naq t-oq choʼq apóstol saʼ xyanqebʼ laj judiiy,* aʼan ajwiʼ li kikʼehok re inwankil re naq tinʼoq choʼq apóstol saʼ xyanqebʼ li junchʼol chi tenamit.
9 Ut ebʼ aʼan xeʼxkʼe reetal naq laaʼin xinkʼuluk re li xnimal rusilal li Yos. Tojaʼ naq laj Santiago, laj Cefas* ut laj Juan, li ilbʼilebʼ joʼ roqechal li chʼuut, xeʼxkʼe li xnim uqʼ re laj Bernabé ut we laaʼin, re xkʼutbʼesinkil naq wankebʼ saʼ amiiwil qikʼin ut laaʼo tooxik rikʼinebʼ li junchʼol chi tenamit ut ebʼ aʼan rikʼinebʼ laj judiiy.*
10 Kaʼajwiʼ xeʼxtzʼaama chiqu naq misach saʼ qachʼool ebʼ li nebʼaʼ ut aʼin ak yookin chaq xkʼebʼal inchʼool chi xbʼaanunkil.
11 Abʼanan, naq laj Cefas kikʼulunk Antioquía xinye saʼ xnaqʼ ru naq moko us ta yook chi naʼlebʼak.
12 Naq toj maajiʼ nekeʼwulak ebʼ li winq li taqlanbʼilebʼ xbʼaan laj Santiago, laj Cefas rajlal nawaʼak chaq saʼ xyanqebʼ li maawaʼebʼ aj judiiy. Abʼan naq xeʼwulak ebʼ li winq aʼin kixkanabʼ xbʼaanunkil ut kirisi ribʼ saʼ xyanqebʼ xbʼaan naq naxxuwahebʼ laj judiiy* li nekeʼtaqenk re li Kriist.
13 Ebʼ li junchʼol chik aj judiiy xeʼok ajwiʼ chi naʼlebʼak saʼ kaʼpakʼal u joʼ naxbʼaanu aʼan ut laj Bernabé xʼok ajwiʼ xkʼambʼal re rikʼinebʼ.
14 Joʼkan bʼiʼ, naq xinkʼe reetal naq li xbʼaanuhom inkʼaʼ naxchap ribʼ rikʼin li yaal chirix li chaabʼil esil, xinye re laj Cefas chiru chixjunilebʼ: «Wi laaʼat aj judiiy ut inkʼaʼ chik yookat chi naʼlebʼak joʼebʼ aj judiiy aʼ chik xnaʼlebʼebʼ li junchʼol chi tenamit nakaabʼaanu, kʼaʼut nakaaminebʼ ru li junchʼol chi tenamit chi xyuʼaminkil li xnaʼlebʼebʼ laj judiiy?».
15 Laaʼo aj judiiy chalen saʼ qayoʼlajik ut moko laaʼo ta joʼebʼ li junchʼol chi tenamit li nekeʼmaakobʼk.
16 Chʼolchʼo chiqu naq moko yeebʼil ta naq jun li winq tiik xchʼool xbʼaan ta naq naxbʼaanu li naxye li chaqʼrabʼ, yal saʼ xkʼabʼaʼ bʼan naq naxpaabʼ li Jesukriist. Joʼkan naq xqapaabʼ li Kristo Jesús re naq tyeemanq naq tiik li qachʼool saʼ xkʼabʼaʼ naq naqapaabʼ li Kriist ut moko xbʼaan ta naq naqabʼaanu li naxye li chaqʼrabʼ. Xbʼaan naq maaʼani tyeemanq chirix naq tiik xchʼool saʼ xkʼabʼaʼ naq naxbʼaanu li naxye li chaqʼrabʼ.
17 Xbʼaan naq yooko xsikʼbʼal chanru tyeemanq chiqix naq tiik qachʼool saʼ xkʼabʼaʼ li Kriist, usta yooko xbʼaanunkil aʼin, nokooʼeʼril naq laaʼo aj maak, ma naraj xyeebʼal aʼin naq li Kriist yook chi kʼanjelak chirix li maak? Chʼolchʼo naq inkʼaʼ!
18 Wi anaqwan tinkabʼla wiʼ chik li xinjukʼ rubʼelaj, laaʼin aj qʼetol chaqʼrabʼ.
19 Joʼkan naq saʼ xkʼabʼaʼ li chaqʼrabʼ xinkamk choʼq re li chaqʼrabʼ re naq twanq inyuʼam choʼq re li Yos.
20 Klawxinbʼilin chiru cheʼ rochbʼeen li Kriist. Moko laaʼin ta chik li yoʼyokin, li Kriist bʼan li yoʼyo wikʼin ut wank saʼ junajil wikʼin. Joʼkan tzʼaqal, li yuʼam li wank anaqwan saʼ lintibʼel, wank saʼ xkʼabʼaʼ naq ninpaabʼ li Ralal li Yos, li kirahok we ut kixqʼaxtesi ribʼ chiwix.
21 Laaʼin inkʼaʼ ninkanabʼ chiʼixbʼej li xnimal rusilal li Yos xbʼaan naq wi li tiikilal natawmank saʼ xkʼabʼaʼ li chaqʼrabʼ, maakʼaʼ ajʼe naq kikamk li Kriist.
Xtzʼaqobʼ ebʼ li naʼlebʼ
^ Malaj «li inkʼaʼ setbʼilebʼ xtzʼuumal xtzʼejwal».
^ Malaj «li setbʼilebʼ xtzʼuumal xtzʼejwal».
^ Malaj «li setbʼilebʼ xtzʼuumal xtzʼejwal».
^ Pedro ajwiʼ nakʼabʼaʼiik.
^ Malaj «li setbʼilebʼ xtzʼuumal xtzʼejwal».
^ Malaj «li setbʼilebʼ xtzʼuumal xtzʼejwal».
