Gálatas 6:1-18
6 Ex wechpaabʼanel, wi jun li winq inkʼaʼ naxkʼe reetal naq tʼaneʼk re saʼ jun li maak, laaʼex li bʼeresinbʼilex xbʼaan li santil musiqʼej yalomaq xqʼusbʼal saʼ tuulanil. Abʼan li junjunq weent tixbʼaanu re naq inkʼaʼ t-aaleeq ajwiʼ.
2 Meekanabʼ xkʼambʼal leeriiq cheeribʼil eeribʼ ut chi joʼkan teebʼaanu naq ttzʼaqloq ru li xchaqʼrabʼ li Kriist.
3 Xbʼaan naq, wi junaq li qas qiitzʼin naxkʼoxla naq wank xwankil abʼan maakʼaʼ xwankil, yook xbʼalaqʼinkil ribʼ xjunes.
4 Abʼan, li junjunq xkʼehaq reetal chanru yook chi naʼlebʼak, tojaʼ naq wanq xyaalal re naq tsahoʼq saʼ xchʼool rikʼin li xbʼaanuhom, abʼan inkʼaʼ tixjuntaqʼeeta ribʼ rikʼin junaq chik li qas qiitzʼin.
5 Xbʼaan naq li junjunq tixkʼam li riiq.
6 Joʼkan ajwiʼ, li yook xtzolbʼal li raatin li Yos chixwotzaq chixjunil li us rikʼin li natzolok re.
7 Meebʼalaqʼi eeribʼ: maaʼani naru naxbʼalaqʼi li Yos. Xbʼaan naq li yooq rawbʼal junaq li qas qiitzʼin aʼan ajwiʼ li tixqʼol.
8 Li naxbʼaanu li naxrahi ru li xtibʼel tixqʼol li kamk, abʼan li naxbʼaanu li naxrahi ru li santil musiqʼej tixqʼol li junelik yuʼam li naxkʼe li xsantil musiqʼej li Yos.
9 Joʼkan naq miqakanabʼ xbʼaanunkil li us xbʼaan naq saʼ xqʼehil tooqʼoloq wi inkʼaʼ nokoolubʼk.
10 Joʼkan bʼiʼ, naq tixkʼe ribʼ chiqu qabʼaanuhaq li us re chixjunilebʼ, abʼan xbʼeenwa rehebʼ li qechpaabʼanel.
11 Li wuqʼ xtzʼiibʼank re li esilhu aʼin choʼq eere, kʼehomaq reetal kʼajoʼ xninqal ebʼ li tzʼiibʼ.
12 Li nekeʼxyal eeminbʼal re naq tsetmanq xtzʼuumal leetzʼejwal nekeʼxbʼaanu re naq us teʼileʼq xbʼaanebʼ li junchʼol. Nekeʼxbʼaanu aʼin re naq inkʼaʼ teʼrahobʼtesiiq* saʼ xkʼabʼaʼ li Kriist.
13 Chi moko li nasetmank xtzʼuumal xtzʼejwal nekeʼxbʼaanu li naxye li Chaqʼrabʼ, abʼan nekeʼraj naq tsetmanq xtzʼuumal leetzʼejwal re naq teʼxnima ribʼ chirix aʼin.
14 Abʼan, laaʼin maajunwa tinnima wibʼ, kaʼajwiʼ tinnima wibʼ chirix li Qaawaʼ Jesukriist li kikamsiik chiru cheʼ.* Ut saʼ xkʼabʼaʼ aʼan li ruuchichʼochʼ kikamk choʼq we ut laaʼin choʼq re li ruuchichʼochʼ.
15 Xbʼaan naq li wank tzʼaqal xwankil maawaʼ ma setbʼil xtzʼuumal xtzʼejwal junaq li qas qiitzʼin malaj inkʼaʼ, li wank bʼan xwankil aʼan naq li Yos naxbʼaanu naq li qas qiitzʼin aʼin aʼanaq jun akʼ yobʼtesihom.
16 Aʼ taxaq li tuqtuukilal ut li uxtaanank u* li nachalk rikʼin li Yos chiwanq saʼ xbʼeen chixjunilebʼ li nekeʼxyuʼami li naʼlebʼ aʼin, joʼkan, saʼ xbʼeen li xʼIsrael li Yos.
17 Chalen anaqwan, maaʼani chik tinxkʼe saʼ chʼaʼajkilal xbʼaan naq chiru lintibʼel wank reetalil naq laaʼin xmoos li Jesús.
18 Ex wechpaabʼanel, chiwanq taxaq li xnimal rusilal li Qaawaʼ Jesukriist rikʼin xchaabʼilal ru leenaʼlebʼ* li nekeekʼutbʼesi. Joʼkan taxaq.
Xtzʼaqobʼ ebʼ li naʼlebʼ
^ Malaj «inkʼaʼ teʼxpaqo li cheʼ re rahobʼtesiik». Taawil xchʼolobʼankil li aatin, cheʼ re rahobʼtesiik.
^ Malaj «cheʼ re rahobʼtesiik». Taawil xchʼolobʼankil li aatin, cheʼ re rahobʼtesiik.
^ Malaj «li toqʼobʼank u».
^ Li aatin saʼ griego, pnéuma. Taawil xchʼolobʼankil li aatin, musiqʼ.
