Apocalipsis 10:1-11
10 Kiwil jun chik li ánjel li wank xwankil li yook chi kubʼeek saʼ choxa sutsu saʼ choql ut wank jun li kaqlaaqʼ* saʼ xbʼeen li xjolom. Li xnaqʼ ru chanchan li saqʼe ut ebʼ li raʼ* chanchan roqechal xaml.
2 Wank saʼ ruqʼ jun li chʼina bʼotbʼilhu li ak xteemank. Li roq li wank saʼ li xnim kixkʼe saʼ xbʼeen li palaw abʼan li xtzʼe kixkʼe saʼ xbʼeen li ruuchichʼochʼ.
3 Tojaʼ naq kixjap re chi kaw joʼ naxjap re jun li kaqkoj. Ut naq kixjap re, li xyaabʼ xkux li wuqubʼ chi kaaq xeʼaatinak.
4 Ak ok raj we chi tzʼiibʼak naq xeʼaatinak li wuqubʼ chi kaaq, abʼan xwabʼi jun xyaabʼ kuxej li nachalk saʼ choxa ut yook xyeebʼal: «Muq li xeʼxye li wuqubʼ chi kaaq ut maatzʼiibʼa».
5 Li ánjel li xwil chi xaqxo saʼ xbʼeen li palaw ut saʼ xbʼeen li ruuchichʼochʼ kixtaqsi saʼ choxa li ruqʼ li wank saʼ li xnim
6 ut kixpatzʼ xkʼabʼaʼ li wank chi junelik, li kiyobʼtesink re li choxa ut li wank chisaʼ, li ruuchichʼochʼ ut li wank chisaʼ, ut li palaw ut li wank chisaʼ. Ut kixye: «Li Yos inkʼaʼ chik t-oybʼeninq.
7 Joʼkan bʼiʼ, naq li xwuq ánjel ok re chi xchʼeʼbʼal li xtrompeet, chʼolchʼo naq ttzʼaqloq ru li xmuqmukil naʼlebʼ li Yos. Aʼin li chaabʼil esil li kixkʼe chi naweʼk rehebʼ li propeet li xeʼkʼanjelak chiru».
8 Ut xwabʼi li xyaabʼ kuxej li yook chi chalk saʼ choxa li yook waatinankil wiʼ chik. Ut xye we: «Ayu ut chap li bʼotbʼilhu li teeto li wank saʼ ruqʼ li ánjel li xaqxo saʼ xbʼeen li palaw ut saʼ xbʼeen li ruuchichʼochʼ».
9 Xkohin bʼarwiʼ wank li ánjel ut xinye re, naq tixkʼe we li chʼina bʼotbʼilhu. Ut aʼan xye we: «Weʼ li bʼotbʼilhu ut waʼ. Tixkʼahobʼresi laasaʼ abʼan saʼ laawe kiʼaq joʼ li xyaʼal kabʼ».
10 Joʼkan naq xinchap li chʼina bʼotbʼilhu saʼ ruqʼ li ánjel ut xinwaʼ. Xkiʼoʼk saʼ we joʼ li xyaʼal kabʼ, abʼan naq ak xinwaʼ, xkʼahoʼk saʼ linsaʼ.
11 Ut xeʼxye we: «Tento tat-aatinaq wiʼ chik joʼ propeet chirixebʼ li kʼalebʼaal, ebʼ li tenamit, ebʼ li aatinobʼaal ut chirix naabʼal li awabʼej».
