Apocalipsis 13:1-18
-
Li nimla xul li kʼajoʼ xjosqʼil li wuqubʼ xjolom yook chi elk saʼ palaw (1-10)
-
Li nimla xul li kʼajoʼ xjosqʼil li wiibʼ xxukubʼ yook chi elk rubʼel chʼochʼ (11-13)
-
Li xjalam u li nimla xul li kʼajoʼ xjosqʼil li wank wuqubʼ xjolom (14, 15)
-
Li reetalil ut li rajlil li nimla xul li kʼajoʼ xjosqʼil (16-18)
13 Li kʼantiʼ li xuwajel ru kikanaak chi xaqxo saʼ xbʼeen li samahibʼ li wank chire li palaw.
Tojaʼ naq xwil jun li nimla xul li kʼajoʼ xjosqʼil li yook chaq chi elk saʼ palaw. Wank lajeebʼ xxukubʼ ut wuqubʼ xjolom. Saʼebʼ li xxukubʼ wank lajeebʼ li koroon ut saʼebʼ li xjolom wank ebʼ li kʼabʼaʼej li nekeʼxye li inkʼaʼ us chirix li Yos.
2 Li nimla xul li kʼajoʼ xjosqʼil li xwil chanchan jun li nimla mes* li kʼajoʼ xjosqʼil, abʼan li roq chanchan roq jun li oso ut li re chanchan re jun li kaqkoj. Ut li kʼantiʼ li xuwajel ru kixkʼe li xmetzʼew, li xkʼojaribʼaal ut li xwankilal re li nimla xul li kʼajoʼ xjosqʼil.
3 Ut xwil naq jun rehebʼ li xjolom qʼaxal nim xyokʼolal ut kachʼin chik ma kikamk xbʼaan li xyokʼolal, abʼan kikʼiraak. Ut chixjunilebʼ li qas qiitzʼin xeʼxtaqe li nimla xul li kʼajoʼ xjosqʼil chi sachsokebʼ xchʼool.
4 Ut xeʼxloqʼoni li kʼantiʼ li xuwajel ru xbʼaan naq aʼan kixkʼe xwankilal li nimla xul li kʼajoʼ xjosqʼil ut xeʼxloqʼoni li nimla xul li kʼajoʼ xjosqʼil ut xeʼxye: «Ani joʼ li nimla xul li kʼajoʼ xjosqʼil? Ut ani naru nayalok saʼ xbʼeen aʼan?».
5 Li nimla xul li kʼajoʼ xjosqʼil kixkʼul xwankilal re naq t-aatinaq saʼ qʼetqʼetil ut re xyeebʼal li inkʼaʼ us chirix li Yos ut kixkʼul ajwiʼ xwankilal re xbʼaanunkil joʼchʼinal joʼnimal li naraj chiru 42 po.
6 Chirix chik aʼan kixte saʼ re, re xyeebʼal li inkʼaʼ us chirix li Yos, chirix li xkʼabʼaʼ, chirix li xchʼina rochoch, joʼkan, re xyeebʼal li inkʼaʼ us chirix li wankebʼ saʼ choxa.
7 Ut xkʼeheʼk xleseens re naq tyaloq saʼ xbʼeenebʼ li santil paabʼanel ut re naq tixqʼax ruhebʼ ut kikʼeheʼk xwankil saʼ xbʼeen chixjunil ebʼ li teep, ebʼ li kʼalebʼaal, ebʼ li aatinobʼaal ut ebʼ li tenamit.
8 Ut chixjunilebʼ li wankebʼ saʼ ruuchichʼochʼ teʼxloqʼoni ru. Ut chalen chaq saʼ xtiklajik li ruuchichʼochʼ, maaʼani rehebʼ aʼan kitzʼiibʼaak li xkʼabʼaʼ saʼ xhuhil li yuʼam. Li hu aʼin re li Karneer li kimayejaak.
9 Li wank xxik, chiʼabʼinq.
10 Wi tento tkʼeheʼq saʼ tzʼalam junaq li qas qiitzʼin, chʼolchʼo naq tkʼeheʼq saʼ tzʼalam. Wi junaq li qas qiitzʼin nakamsink rikʼin chʼiichʼ,* tento tkamsiiq ajwiʼ chi chʼiichʼ. Joʼkan naq aajel ru naq ebʼ li santil paabʼanel wanqebʼ xkuyum ut xpaabʼal.
11 Tojaʼ naq xwil jun chik li nimla xul li kʼajoʼ xjosqʼil li yook chaq chi elk rubʼel chʼochʼ. Wank wiibʼ xxukubʼ joʼ xxukubʼ karneer abʼan xʼok chi aatinak joʼ jun li kʼantiʼ li xuwajel ru.
12 Ut li xwankilal li nimla xul aʼin juntaqʼeet rikʼin li xwankilal li xbʼeen nimla xul li kʼajoʼ xjosqʼil ut naroksi li xwankilal chiru li xbʼeen li nimla xul li kʼajoʼ xjosqʼil. Naxbʼaanu naq li ruuchichʼochʼ ut li wankebʼ chisaʼ teʼxloqʼoni li xbʼeen nimla xul li kʼajoʼ xjosqʼil li kikʼiraak li xyokʼolal li kikamsink raj re.
13 Ut naxbʼaanu ebʼ li xninqal ru eetalil chiruhebʼ li qas qiitzʼin ut naxbʼaanu ajwiʼ naq t-elq chaq xaml saʼ choxa ut tkubʼeeq saʼ ruuchichʼochʼ.
14 Naxbʼalaqʼi li wankebʼ saʼ ruuchichʼochʼ rikʼinebʼ li eetalil li kikanabʼaak xbʼaanunkil chiru li nimla xul li kʼajoʼ xjosqʼil naq yook xyeebʼal rehebʼ li wankebʼ saʼ ruuchichʼochʼ naq teʼxyiibʼ xjalam u li nimla xul li kʼajoʼ xjosqʼil li kiyokʼeʼk chi chʼiichʼ abʼan inkʼaʼ kikamk.
15 Ut kikanabʼaak xkʼebʼal xyuʼam* li xjalam u li nimla xul li kʼajoʼ xjosqʼil re naq t-aatinaq ut tixkamsi chixjunilebʼ li inkʼaʼ nekeʼraj xloqʼoninkil li xjalam u li nimla xul li kʼajoʼ xjosqʼil.
16 Naxbʼaanu naq chixjunilebʼ, joʼ ninq ut kokʼ, bʼihom ut nebʼaʼ, li wank choʼq moos ut li moko wank ta choʼq moos, teʼkʼeheʼq reetalil saʼebʼ li xnim ruqʼ malaj chi xpeekemebʼ
17 re naq maaʼani truuq chi loqʼok malaj chi kʼayink kaʼajwiʼ li qas qiitzʼin li wank rikʼin reetalil li nimla xul li kʼajoʼ xjosqʼil, aʼin naraj xyeebʼal, li rajlil li xkʼabʼaʼ.
18 Re xnawbʼal aʼin naʼajmank li naʼlebʼ: li seebʼ xchʼool naxnaw xbʼirbʼal rix li rajlil li nimla xul li kʼajoʼ xjosqʼil xbʼaan naq aʼin rajlil winq; li ajl aʼan 666.
Xtzʼaqobʼ ebʼ li naʼlebʼ
^ Malaj «mis».
^ Maare «Wi junaq li qas qiitzʼin tento tkamq chi chʼiichʼ».
^ Li aatin saʼ griego, pnéuma. Taawil xchʼolobʼankil li aatin, musiqʼ.
