Apocalipsis 15:1-8
15 Xwil saʼ choxa jun chik li eetalil li nim xwankil ut sachbʼachʼoolej rilbʼal: wank wuqubʼ li ánjel ut rikʼinebʼ wank wuqubʼ li rahilal. Aʼin xraqik ebʼ li rahilal, naq traqeʼq ebʼ li rahilal aʼin, twulaq ajwiʼ xraqik li xjosqʼil li Yos.
2 Xwil ajwiʼ jun li nimla pumpukil haʼ, li chanchan lem, ut yukʼinbʼil rikʼin xaml ut li xeʼqʼaxok u saʼ xbʼeen li nimla xul li kʼajoʼ xjosqʼil joʼ ajwiʼ li xjalam u ut li rajlil li xkʼabʼaʼ. Ebʼ aʼin xaqxokebʼ chixkʼatq li nimla pumpukil haʼ, li chanchan lem, ut saʼ ruqʼ li junjunq wank jun li aarp ut li aarp aʼin re li Yos.
3 Yookebʼ chaq xbʼichankil li xbʼich laj Moisés, li xmoos li Yos, ut li xbʼich li Karneer. Yookebʼ xyeebʼal:
«Nim xwankil laabʼaanuhom ut sachbʼachʼoolej rilbʼal, at Jehobʼa,* li Nimajwal Yos. Tiik ru laabʼe ut paabʼajel, laaʼat Awabʼej chi junelik.
4 At Jehobʼa,* ani inkʼaʼ t-oxloqʼinq aawe? Ani inkʼaʼ tixkʼe xloqʼal laakʼabʼaʼ? Kaʼajwiʼ laaʼat inkʼaʼ nakaatzʼeqtaana laatenamit. Chixjunilebʼ li tenamit teʼchalq aawikʼin ut teʼxloqʼoni aawu xbʼaan naq nekeʼril naq nakatraqok aatin saʼ tiikilal».
5 Chirix chik aʼin xwil naq kixte ribʼ saʼ choxa li xsantil naʼaj li chʼina ochoch chirix li kixye chaq li Yos
6 ut saʼ li santil naʼaj xeʼelk wuqubʼ li ánjel rikʼin wuqubʼ chi rahilal. Tiqtokebʼ rikʼin saqi liin ut nalemtzʼunk ru ut bʼakʼbʼo chire xchʼoolebʼ li kʼaamalsaʼ re oor.
7 Jun rehebʼ li kaahibʼ chi ánjel kixkʼe re li wuqubʼ chi ánjel wuqubʼ li sekʼ re oor. Ut chisaʼ ebʼ li sekʼ nujenaq rikʼin xjosqʼil li Yos. Li Yos aʼin wank chi junelik.
8 Ut li santil naʼaj kinujak saʼ sibʼ saʼ xkʼabʼaʼ li xloqʼal li Yos ut saʼ xkʼabʼaʼ li xwankilal. Maaʼani naru naʼok saʼ li santil naʼaj toj reetal traqeʼq li wuqubʼ chi rahilal li wank rikʼin li wuqubʼ chi ánjel.
Xtzʼaqobʼ ebʼ li naʼlebʼ
^ Taawil xchʼolobʼankil li aatin, Jehobʼa.
^ Taawil xchʼolobʼankil li aatin, Jehobʼa.
