Apocalipsis 16:1-21
-
Li xjosqʼil li Yos li wank saʼ li wuqubʼ chi sekʼ (1-21)
16 Tojaʼ naq xwabʼi jun li kawil kuxej li kichalk saʼ li santil naʼaj ut kixye rehebʼ li wuqubʼ chi ánjel: «Ayuqex ut hoyomaq saʼ xbʼeen li ruuchichʼochʼ li xjosqʼil li Yos li wank saʼ li wuqubʼ chi sekʼ».
2 Li xbʼeen ánjel xkoho ut kixhoy saʼ ruuchichʼochʼ li wank saʼ li xsekʼ. Ut jun li xox li kʼajoʼ xrahil ut inkʼaʼ nakʼiraak kixrahobʼtesi ebʼ li qas qiitzʼin li xeʼxkʼul reetalil li nimla xul li kʼajoʼ xjosqʼil ut xeʼxloqʼoni li xjalam u.
3 Li xkabʼ ánjel kixhoy saʼ palaw li wank saʼ li xsekʼ. Ut aʼin kisutqʼiik choʼq kikʼ joʼ xkikʼel jun li kamenaq ut chixjunil li wank xyuʼam saʼ palaw, xeʼkamk.
4 Li rox ánjel kixhoy li wank saʼ li xsekʼ saʼ xbʼeenebʼ li nimaʼ ut saʼ xbʼeenebʼ li yuʼamhaʼ. Ut ebʼ aʼin xeʼsutqʼiik choʼq kikʼ.
5 Tojaʼ naq xwabʼi chi xyeebʼal li ánjel li wank xwankil saʼ xbʼeen li haʼ: «Laaʼat, li wank, li xwank chaq ut li Inkʼaʼ Naxtzʼeqtaana li Xtenamit, tiik laachʼool xbʼaan naq xaaxaqabʼ naq tento tkʼulmanq aʼin.
6 Saʼ xkʼabʼaʼ naq xeʼxhoy li xkikʼel ebʼ li santil paabʼanel ut ebʼ li propeet, laaʼat xaakʼehebʼ chi rukʼbʼal li kikʼ. Xkʼulubʼebʼ naq teʼrukʼ».
7 Ut xwabʼi li xnaʼaj li mayej* chi xyeebʼal: «Joʼkan, at Jehobʼa,* li Nimajwal Yos, chaabʼil nakatraqok aatin ut nakaabʼaanu saʼ tiikilal».
8 Li xka ánjel kixhoy saʼ li saqʼe li wank saʼ li xsekʼ. Ut kikanabʼaak li saqʼe chi xkʼatbʼal rikʼin xaml ebʼ li qas qiitzʼin.
9 Ut li xtiqwal li saqʼe kixkʼat ebʼ li qas qiitzʼin. Abʼan xeʼxye li inkʼaʼ us chirix li xkʼabʼaʼ li Yos (li wank xwankil saʼ xbʼeen ebʼ li rahilal aʼin) ut inkʼaʼ xeʼxyotʼ xchʼool chi moko xeʼxjal xnaʼlebʼ chi moko xeʼxkʼe xloqʼal.
10 Li roʼ ánjel kixhoy li wank saʼ li xsekʼ saʼ xbʼeen li xkʼojaribʼaal li nimla xul li kʼajoʼ xjosqʼil. Ut li xʼawabʼejilal kiqʼoqyinoʼk. Ebʼ li qas qiitzʼin xeʼok xtiwbʼal ebʼ li ruʼuj raqʼ xbʼaan li rahilal li yookebʼ xkʼulbʼal
11 abʼan xeʼxye li inkʼaʼ us chirix li Xyos li choxa saʼ xkʼabʼaʼ li xrahilalebʼ ut li xox. Ut inkʼaʼ xeʼxyotʼ xchʼool chi moko xeʼxjal xnaʼlebʼ chirix li xeʼxbʼaanu.
12 Li xwaq ánjel kixhoy li wank saʼ li xsekʼ saʼ xbʼeen li nimla nimaʼ Éufrates. Ut xchaqik li haʼ re xkawresinkil xbʼeehebʼ li awabʼej li yookebʼ chaq chi chalk bʼarwiʼ naʼelk li saqʼe.
13 Ut xwil naq saʼ re li kʼantiʼ li xuwajel ru yook chaq chi elk oxibʼ li propesiiy,* li kʼajoʼ xtzʼajnil ut chanchan amoch, joʼkan ajwiʼ saʼ re li nimla xul li kʼajoʼ xjosqʼil ut saʼ re li bʼalaqʼil propeet.
14 Ebʼ li propesiiy aʼin chalenaq rikʼinebʼ li maaʼus aj musiqʼej ut ebʼ li awabʼej re chixjunil li ruuchichʼochʼ nekeʼrabʼi li propesiiy aʼin. Ebʼ li propesiiy aʼin nekeʼxbʼaanu sachbʼachʼoolej re xchʼutubʼankil ebʼ li awabʼej choʼq re li yalok li twanq saʼ xnimal xkutankil li Nimajwal Yos.
15 «Kʼe reetal! Yookin chi chalk joʼ jun aj elqʼ. Sa saʼ xchʼool li ajʼo ru ut wank xtʼikr chirix re naq inkʼaʼ tʼustʼuuq ut inkʼaʼ tixkʼut xxutaan chiruhebʼ li qas qiitzʼin».
16 Ut xeʼchʼutubʼaak ebʼ li awabʼej saʼ li naʼaj li naxkʼabʼaʼi saʼ hebreo Armagedón.*
17 Li xwuq ánjel kixhoy saʼ iqʼ li wank saʼ li xsekʼ. Chirix chik aʼan xwabʼi jun li kawil kuxej li kiʼelk chaq saʼ li kʼojaribʼaal li wank saʼ li santil naʼaj ut kixye: «Ak xbʼaanumank chik!».
18 Ut kiwank li xrepom kaaq, ebʼ li xyaabʼ kuxej, li kaaq ut jun li nimla hiik li qʼaxal kaw joʼ maajunwa xwank chalen naq kiyobʼtesiik li winq saʼ ruuchichʼochʼ. Joʼkaʼin li xnimal ut li xkawil li nimla hiik kiwank.
19 Oxibʼ jachal kiʼelk li nimla tenamit ut ebʼ li tenamit li wankebʼ saʼ chixjunil li ruuchichʼochʼ xeʼtʼaneʼk; ut li Yos kijultikoʼk re li Nimla Babilonia re naq tixkʼe chi rukʼ li xbʼiinul li xnimal ru xjosqʼil.
20 Joʼkan ajwiʼ, chixjunil ebʼ li naʼaj li sutsu chi haʼ xeʼelelik ut inkʼaʼ chik xʼilmank ebʼ li tzuul.
21 Tojaʼ naq kiʼelk chaq saʼ choxa li ninqi saqbʼach ut kinaq saʼ xbʼeenebʼ li qas qiitzʼin. Ebʼ li saqbʼach aʼin chanchan nimla pek ut kachʼin chik ma 45 liibʼr* raalal li junjunq. Ut ebʼ li qas qiitzʼin xeʼxye li inkʼaʼ us chirix li Yos saʼ xkʼabʼaʼ li rahilal li kixkʼam chaq li saqbʼach xbʼaan naq qʼaxal nim li rahilal aʼin.
Xtzʼaqobʼ ebʼ li naʼlebʼ
^ Malaj «li altar». Taawil xchʼolobʼankil li aatin, xnaʼaj li mayej.
^ Taawil xchʼolobʼankil li aatin, Jehobʼa.
^ Saʼ griego «li musiqʼej». Taawil xchʼolobʼankil li aatin, musiqʼ.
^ Li aatin saʼ griego, Har Maguedṓn. Chalenaq saʼ hebreo li naraj xyeebʼal “tzuul re Meguidó”.
^ Saʼ griego «aʼin tana raalal jun li talento». Ebʼ laj griego nekeʼoksink chaq re li talento. Taawil xchʼolobʼankil li aatin, talento.
