Apocalipsis 17:1-18
-
Li tojbʼamaak li tixkʼul «Li Nimla Babilonia» (1-18)
-
Li xnimal ru aj yumbʼeet li chunchu saʼ xbʼeen jun li nimla xul li kʼajoʼ xjosqʼil ut kaq rix (1-3)
-
Li nimla xul «junxil wank chaq arin, anaqwan moko wank ta chik, abʼan chi seebʼ t-elq chaq saʼ li chamal jul» (8)
-
Li lajeebʼ chi xukubʼ teʼyaloq saʼ xbʼeen li Karneer (12-14)
-
Li lajeebʼ chi xukubʼ xikʼ teʼril laj yumbʼeet (16, 17)
-
17 Jun rehebʼ li wuqubʼ chi ánjel li wank rikʼinebʼ li wuqubʼ chi sekʼ kichalk ut kixye we: «Kim, tinkʼut chaawu li tojbʼamaak li tixkʼul li xnimal ru aj yumbʼeet li chunchu saʼ xbʼeen li kʼiila haʼ.
2 Ebʼ li awabʼej re li ruuchichʼochʼ xeʼxmux ribʼ* rikʼin li ixq aʼin ut ebʼ li qas qiitzʼin re li ruuchichʼochʼ xeʼkalaak rikʼin li xbʼiinul li muxuk ibʼ».*
3 Ut saʼ xkʼabʼaʼ li santil musiqʼej, li ánjel xinxkʼam saʼ jun li chaqichʼochʼ. Tojaʼ naq xwil jun li ixq chunchu saʼ xbʼeen jun li nimla xul li kʼajoʼ xjosqʼil ut kaq rix. Li xul aʼin nujenaq chi kʼabʼaʼej li nekeʼxye li inkʼaʼ us chirix li Yos. Wuqubʼ xjolom ut lajeebʼ xxukubʼ.
4 Li ixq tiqto rikʼin kaqi tʼikr li terto xtzʼaq ut nujenaq chi oor, chi tertokil pek ut rikʼin chʼinaʼusil pek. Saʼ ruqʼ wank jun li sekʼ re oor li nujenaq chi tzʼaj aj naʼlebʼ li kʼajoʼ xchuhal ut li tzʼaj aj bʼaanuhom li naxyuʼami naq naxmux ribʼ.*
5 Ut tzʼiibʼanbʼil chi xpeekem jun li kʼabʼaʼej li wank chi muqmu: «Li Nimla Babilonia, li xnaʼebʼ laj yumbʼeet ut li qʼaxal tzʼaj ru li wank saʼ ruuchichʼochʼ».
6 Ut xwil naq li ixq tkalaaq rikʼin xkikʼel ebʼ li santil paabʼanel ut rikʼin li xkikʼel ebʼ li xtestiiw li Jesús.
Naq xwil, sachso inchʼool xinkanaak.
7 Joʼkan naq li ánjel kixye we: «Kʼaʼut nasach aachʼool? Laaʼin tinseeraqʼi aawe li muqmukil naʼlebʼ chirix li ixq ut chirix li nimla xul li kʼajoʼ xjosqʼil li napaqonk re, li wank wuqubʼ xjolom ut lajeebʼ xxukubʼ».
8 Li nimla xul li kʼajoʼ xjosqʼil li xaawil, junxil wank chaq arin, anaqwan moko wank ta chik, abʼan chi seebʼ t-elq chaq saʼ li chamal jul* ut tsacheʼq chi junajwa. Ebʼ li qas qiitzʼin re li ruuchichʼochʼ, li moko wankebʼ ta xkʼabʼaʼ saʼ xhuhil li yuʼam chalen saʼ xtiklajik li ruuchichʼochʼ, teʼsachq xchʼool naq teʼril li nimla xul li kʼajoʼ xjosqʼil li wank chaq junxil, anaqwan moko wank ta chik, abʼan tchalq wiʼ chik.
9 »Re xtawbʼal ru aʼin naʼajmank li seebʼal kʼaʼuxl. Li wuqubʼ chi jolom reetalil wuqubʼ chi tzuul bʼarwiʼ nachunlaak li ixq.
10 Wank wuqubʼ li awabʼej. Oobʼ ak xeʼqʼaxeʼk ru, jun wank anaqwan ut li jun chik toj maajiʼ nawulak; abʼan naq twulaq moko najt ta twanq.
11 Ut li nimla xul li kʼajoʼ xjosqʼil li wank chaq ut moko wank ta chik, aʼan ajwiʼ li xwaqxaq awabʼej li chalenaq saʼ xyanq li wuqubʼ chi awabʼej ut chi seebʼ tsacheʼq chi junajwa.
12 »Li lajeebʼ chi xukubʼ li xaawil reetalil li lajeebʼ chi awabʼej li maajiʼ nekeʼxkʼul li xwankilal re awabʼejink, abʼan teʼawabʼejinq chiru jun hoor rochbʼeen li nimla xul li kʼajoʼ xjosqʼil.
13 Junajebʼ ru xkʼaʼuxl rikʼin li nimla xul li kʼajoʼ xjosqʼil joʼkan naq nekeʼxkʼe re li xkʼulubʼebʼ chi awabʼejink ut li xwankilal.
14 Teʼyaloq saʼ xbʼeen li Karneer abʼan li Karneer tqʼaxoq u saʼ xbʼeenebʼ xbʼaan naq aʼan Qaawaʼ saʼ xbʼeenebʼ li qaawaʼ ut Awabʼej saʼ xbʼeenebʼ li awabʼej. Li wankebʼ rikʼin (li bʼoqbʼilebʼ, li sikʼbʼilebʼ ru ut li xaqxokebʼ chiʼus) teʼqʼaxoq ajwiʼ u».
15 Aʼan kixye we: «Li haʼ li xaawil bʼarwiʼ chunchu laj yumbʼeet reetalil li kʼiila qas qiitzʼin, li jalan jalanq chi kʼalebʼaal, li jalan jalanq chi tenamit ut li jalan jalanq chi aatinobʼaal.
16 Li lajeebʼ chi xukubʼ li xaawil ut li nimla xul li kʼajoʼ xjosqʼil xikʼ teʼril laj yumbʼeet ut teʼxmaqʼ li kʼaru re ut teʼxkanabʼ chi tʼustʼu. Teʼxwaʼ li xtibʼel ut teʼxkʼat rikʼin xaml ut maakʼaʼ chik tkanaaq.
17 Xbʼaan naq li Yos kixkʼe saʼ xchʼoolebʼ naq teʼxbʼaanu li naraj aʼan, aʼin naraj xyeebʼal, naq junajaq ru li xkʼaʼuxebʼ chi xqʼaxtesinkil li xwankilal joʼ awabʼej re li nimla xul li kʼajoʼ xjosqʼil toj reetal naq ttzʼaqloq ru li raatin li Yos.
18 Ut li ixq li xaawil reetalil li nimla tenamit li najolomink joʼ awabʼej saʼ xbʼeenebʼ li awabʼej re li ruuchichʼochʼ».
Xtzʼaqobʼ ebʼ li naʼlebʼ
^ Li aatin saʼ griego, pornéia. Taawil xchʼolobʼankil li aatin, muxuk ibʼ.
^ Li aatin saʼ griego, pornéia. Taawil xchʼolobʼankil li aatin, muxuk ibʼ.
^ Li aatin saʼ griego, pornéia. Taawil xchʼolobʼankil li aatin, muxuk ibʼ.
^ Taawil xchʼolobʼankil li aatin, chamal jul.
