Apocalipsis 20:1-15
20 Ut xwil jun li ánjel li yook chi elk saʼ choxa ut wank saʼ ruqʼ li xlaawil li chamal jul* ut jun li nimla kareen.
2 Kixchap li kʼantiʼ li xuwajel ru aʼan li najter kʼantiʼ, li Diʼaabʼ* ut aj Tza, ut kixbʼakʼ chiru jun mil chihabʼ.
3 Kixkut saʼ li chamal jul* ut aran kixtzʼap. Kixkʼe jun li letzlebʼ chire li chamal jul* re naq inkʼaʼ chik t-elq chi xbʼalaqʼinkilebʼ li tenamit toj reetal ttzʼaqloq ru li jun mil chihabʼ. Chirix chik aʼan tento t-isiiq abʼan moko najt ta chik twanq.
4 Ut xwil ebʼ li kʼojaribʼaal ut li xeʼchunlaak aran xeʼkʼeheʼk xwankil re raqok aatin. Joʼkan, xwilebʼ li xeʼkamsiik saʼ xkʼabʼaʼ naq xeʼxkʼe chi naweʼk chirix li Jesús ut xeʼaatinak chirix li Yos. Ebʼ li qas qiitzʼin aʼin inkʼaʼ xeʼxloqʼoni li nimla xul li kʼajoʼ xjosqʼil chi moko li xjalam u ut inkʼaʼ ajwiʼ xeʼxkʼul reetalil chi xpeekemebʼ chi moko saʼ ruqʼebʼ. Ebʼ aʼin xeʼwank wiʼ chik xyuʼam ut xeʼawabʼejink rochbʼeen li Kriist chiru jun mil chihabʼ.
5 Aʼin li xbʼeen wakliik chi yoʼyo. (Ebʼ li kamenaq li toj xeʼkanaak xeʼkʼeheʼk wiʼ chik xyuʼam toj naq kitzʼaqlok ru li jun mil chihabʼ).
6 Sa saʼ xchʼool ut saant li natzʼaqonk saʼ li xbʼeen wakliik chi yoʼyo; li xkabʼ kamk moko wank ta xwankil saʼ xbʼeenebʼ, aʼanaqebʼ bʼan aj tij choʼq re li Yos ut choʼq re li Kriist ut teʼawabʼejinq rochbʼeen aʼan chiru li jun mil chihabʼ.
7 Abʼan naq traqeʼq li jun mil chihabʼ, laj Tza t-isiiq bʼarwiʼ kitzʼapeʼk
8 ut t-oq xbʼalaqʼinkilebʼ ut xchʼutubʼankilebʼ li qas qiitzʼin (re Gog ut re Magog) li wankebʼ saʼ xkaaxukuutil li ruuchichʼochʼ re naq teʼyaloq. Li xkʼihalil chanchan xsamahibʼ li palaw.
9 Ut xeʼxjekʼi ribʼ saʼ chixjunil li ruuchichʼochʼ ut xeʼxsut li naʼaj bʼarwiʼ wankebʼ li santil paabʼanel ut li tenamit li raabʼil xbʼaan li Yos. Abʼan kiʼelk chaq xaml saʼ choxa ut kixkʼatebʼ.
10 Laj Tza* li yook chaq xbʼalaqʼinkilebʼ kikuteʼk saʼ li palaw li wank xxamlel ut asuupr bʼarwiʼ ak wank li nimla xul li kʼajoʼ xjosqʼil joʼ ajwiʼ li bʼalaqʼil propeet. Ebʼ aʼan teʼrahobʼtesiiq chi junelik chi qʼeq ut chi kutan.
11 Xwil jun li saqi kʼojaribʼaal li kʼajoʼ xnimal joʼ ajwiʼ li chunchu saʼ xbʼeen. Li ruuchichʼochʼ ut li choxa xeʼelelik chiru ut inkʼaʼ chik xeʼilmank.
12 Ut xwil ebʼ li kamenaq, joʼ ninq joʼ kokʼ, xaqxokebʼ chiru li kʼojaribʼaal ut kiteemank ebʼ li bʼotbʼilhu. Abʼan kiteemank jun chik li bʼotbʼilhu: aʼ li xhuhil li yuʼam. Ut kiraqmank aatin saʼ xbʼeenebʼ li kamenaq aʼ yaal chanru li xbʼaanuhomebʼ ut joʼ chanru tzʼiibʼanbʼil saʼebʼ li bʼotbʼilhu.
13 Li palaw kixqʼaxtesi ebʼ li kamenaq li wank rikʼin, joʼkan ajwiʼ li kamk ut li Muqlebʼaal Kamenaq* xeʼxqʼaxtesi ebʼ li kamenaq li wank rikʼinebʼ. Ut kiraqmank aatin saʼ xbʼeen li junjunq aʼ yaal chanru li xbʼaanuhom.
14 Li kamk ut li Muqlebʼaal Kamenaq* xeʼkuteʼk saʼ li palaw li wank xxamlel. Li palaw li wank xxamlel reetalil li xkabʼ kamk.
15 Joʼkan ajwiʼ, li moko tzʼiibʼanbʼilebʼ ta xkʼabʼaʼ saʼ li xhuhil li yuʼam xeʼkuteʼk saʼ li palaw li wank xxamlel.
Xtzʼaqobʼ ebʼ li naʼlebʼ
^ Taawil xchʼolobʼankil li aatin, chamal jul.
^ Taawil xchʼolobʼankil li aatin, Diʼaabʼ.
^ Taawil xchʼolobʼankil li aatin, chamal jul.
^ Taawil xchʼolobʼankil li aatin, chamal jul.
^ Saʼ griego «li Diʼaabʼ». Taawil xchʼolobʼankil li aatin, Diʼaabʼ.
^ Malaj «li Hades». Taawil xchʼolobʼankil li aatin, Hades.
^ Malaj «li Hades». Taawil xchʼolobʼankil li aatin, Hades.
