Colosenses 4:1-18
4 Ex aj echal moos, us teeril leemoos ut inkʼaʼ texsikʼoq u, jultikaq eere naq laaʼex ajwiʼ wank aj Echal eere saʼ choxa.
2 Junelik textijoq ut naq yooqex xbʼaanunkil aʼin, ajʼooq eeru ut texbʼanyoxinq.
3 Ut yooqex ajwiʼ chi tijok chiqix ut teetzʼaama re li Yos naq tixte chiqu li okebʼaal re xkʼebʼal li esil ut chi joʼkan tqakʼe chi naweʼk li muqmukil naʼlebʼ chirix li Kriist, chirix li bʼakʼbʼokin wiʼ chi kareen.
4 Teetzʼaama ajwiʼ naq tinruuq xkʼebʼal chi naweʼk chiʼus joʼ tento tinbʼaanu.
5 Chiwanq eenaʼlebʼ rikʼinebʼ li maawaʼebʼ aj paabʼanel ut oksimaq chiʼus li hoonal.
6 Junelik texʼaatinaq saʼ qʼunil, chiwanq ratzʼamil leeraatin re naq teenaw chanru teesume li junjunq chi qas qiitzʼin.
7 Laj Tíquico, li qechpaabʼanel, li raaro inbʼaan, tixye eere chanru wankin. Aʼan chaabʼil nakʼanjelak ut wechmoosil chirix li Qaawaʼ.
8 Tintaqla eerikʼin re naq teenaw chanru wanko ut re naq tixkʼojobʼ leechʼool.
9 Txik rochbʼeen laj Onésimo, li wechpaabʼanel, li inkʼaʼ naxtzʼeqtaana li Yos ut raaro inbʼaan, aʼan ajwiʼ jun eere. Aʼanebʼ teʼxseeraqʼi eere li yook chi kʼulmank arin.
10 Laj Aristarco, li wechpreexil, naxtaqla xsahil leechʼool joʼ ajwiʼ laj Marcos, li rech-alal laj Bernabé, (li tento teekʼul chi anchal leechʼool wi taaxik eerilbʼal, joʼ chanru xinye eere)
11 ut li Jesús, li nakʼabʼaʼiik Justo. Ebʼ li winq aʼin chalenaqebʼ saʼ xyanqebʼ laj judiiy.* Kaʼajwiʼ aʼanebʼ li wechkʼanjel chirix li Xʼawabʼejilal li Yos ut kʼajoʼ nekeʼxwaklesi linchʼool.
12 Laj Epafras naxtaqla xsahil leechʼool. Aʼan jun saʼ eeyanq ut wank choʼq xmoos li Kristo Jesús ut junelik naxkʼe xchʼool chi tijok cheerix re naq kaw xaqxoqex ut kawaq leepaabʼal chirix chixjunil li naxchap ribʼ rikʼin li rajom li Yos.
13 Chʼolchʼo chiwu naq qʼaxal naxkʼe xchʼool cheerix joʼ ajwiʼ chirixebʼ li wankebʼ Laodicea ut li wankebʼ Hierápolis.
14 Laj Lucas, aj bʼanonel li raaro xbʼaan chixjunilebʼ, ut laj Demas nekeʼxtaqla xsahil leechʼool.
15 Teeye rehebʼ li qechpaabʼanel li wankebʼ aran Laodicea, joʼ ajwiʼ li xNinfa ut ebʼ li qechpaabʼanel li nekeʼchʼutlaak saʼ rochoch naq nintaqla xsahilebʼ xchʼool.
16 Naq ak xyaabʼasimank li esilhu aʼin, teetaqla re naq tyaabʼasimanq ajwiʼ saʼ li chʼuut Laodicea ut li esilhu li xtaqlamank saʼ li chʼuut Laodicea teeyaabʼasi saʼ eeyanq.
17 Joʼkan ajwiʼ, yeehomaq re laj Arquipo: «Kʼanjelan chi kaw re naq tatruuq xbʼaanunkil chiʼus li kʼanjel li xaakʼul rikʼin li Qaawaʼ».
18 Laaʼin laj Pablo, xintzʼiibʼa li sahil chʼoolejil aʼin rikʼin wuqʼ. Jultikoʼq eere naq bʼakʼbʼokin chi kareen. Aʼ taxaq li xnimal rusilal li Yos chiwanq eerikʼin.
Xtzʼaqobʼ ebʼ li naʼlebʼ
^ Malaj «li setbʼilebʼ xtzʼuumal xtzʼejwal».
