Efesios 1:1-23
1 Laaʼin laj Pablo li xʼapóstol li Kristo Jesús saʼ xkʼabʼaʼ li rajom li Yos, nintzʼiibʼa li esilhu aʼin choʼq rehebʼ li santil paabʼanel li wankebʼ Éfeso ut wankebʼ saʼ junajil rikʼin li Kristo Jesús ut inkʼaʼ nekeʼxtzʼeqtaana:
2 Chiwanq taxaq eerikʼin li xnimal rusilal ut li xtuqtuukilal li Yos, li Qayuwaʼ, ut li Xyuwaʼ li Qaawaʼ Jesukriist.
3 Chinimaaq ru li Xyos ut li Xyuwaʼ li Qaawaʼ Jesukriist xbʼaan naq saʼ choxa xkʼe qe jalan jalanq li osobʼtesink li naqakʼul saʼ xkʼabʼaʼ li xsantil musiqʼej xbʼaan naq laaʼo aj taqehom re li Kriist.
4 Xbʼaan naq aʼan kixsikʼ qu naq toj maajiʼ natiklaak li ruuchichʼochʼ re naq wanqo saʼ junajil rikʼin,* re naq tqakʼutbʼesi li rahok, re naq santaqo ut re naq maakʼaʼaq qapaltil chiru.
5 Aʼan kixsikʼ qu chi rubʼelaj re naq tooxkʼul joʼ tzʼaqal ralal xkʼajol saʼ xkʼabʼaʼ li Jesukriist joʼ chanru kiraj ut kixkʼul xchʼool
6 re naq tnimaaq ru saʼ xkʼabʼaʼ li xnimal rusilal li Yos li wank xloqʼal li kixkʼutbʼesi chiqu saʼ xkʼabʼaʼ li Ralal, li raaro xbʼaan.
7 Saʼ xkʼabʼaʼ li Ralal naqakanabʼ wank choʼq moos. Joʼkan, kuybʼil li qamaak saʼ xkʼabʼaʼ li xkikʼel li Ralal. Li xnimal rusilal li Yos qʼaxal nim!
8 Aʼan kixkʼutbʼesi chiqu li xnimal rusilal chi yoʼon rikʼin xnaʼlebʼ ut rikʼin xnimal xkʼaʼuxl,
9 ut kixkʼe chiqanaw li muqmukil naʼlebʼ chirix li rajom joʼ chanru nawulak chiru ut kixkʼubʼ
10 chanru xbʼeresinkil* chixjunil ut aʼin ttzʼaqloq ru saʼ li hoonal li xaqabʼanbʼil xbʼaan, re xchʼutubʼankil chiru li Kriist chixjunil li wank saʼ choxa ut li wank saʼ ruuchichʼochʼ. Joʼkan tzʼaqal, chiru li Kriist
11 li wanko saʼ junajil rikʼin ut xaqabʼanbʼilo re xkʼulbʼal li qaʼereens* xbʼaan naq kixsikʼ qu chi rubʼelaj ut kixbʼaanu joʼ chanru kixkʼoxla chaq ut naxbʼaanu chixjunil joʼ naraj,
12 re naq tnimaaq li xloqʼal li Yos saʼ qakʼabʼaʼ, laaʼo li xqapaabʼ xbʼeenwa li Kriist.
13 Abʼan, laaʼex ajwiʼ xexʼok xpaabʼankil li Kriist naq ak xeerabʼi resil li yaal, aʼin li chaabʼil esil chirix leekolbʼal. Ut naq ak yookex chik xpaabʼankil, li Yos kiroksi li xsantil musiqʼej li kixyeechiʼi chaq re xkʼebʼal eereetalil. Aʼan kiroksi li Kriist re xbʼaanunkil aʼin.
14 Li santil musiqʼej chanchan li yeechiʼom li naxkʼut naq tqakʼul li naxyeechiʼi qe li Yos. Li Yos kixbʼaanu aʼin re naq tkoleʼq li xtenamit saʼ xkʼabʼaʼ li xkamik li Ralal ut chi joʼkan qʼaxal tnimaaq ru.
15 Joʼkan naq laaʼin ajwiʼ, chalen naq xwabʼi naq nekeepaabʼ li Qaawaʼ Jesús ut nekeekʼutbʼesi naq nekeera ebʼ li santil paabʼanel,
16 inkʼaʼ ninkanabʼ bʼanyoxink cheerix. Ut junelik nekexinjultika saʼ lintij,
17 re naq li Xyos li Qaawaʼ Jesukriist, li Yuwaʼbʼej li wank xloqʼal, truuq xkʼebʼal eere li wankilal re naq wanq eenaʼlebʼ ut teetaw ru li naxkʼe chi naweʼk ut saʼ xkʼabʼaʼ aʼin teenaw ru chi tzʼaqal re ru.
18 Aʼan kixte leechʼool ut xexʼilok re naq teenaw bʼar wank leeroybʼenihom li xexbʼoq wiʼ, bʼarwiʼ wank li xbʼihomal li wank xloqʼal ut xokxo xbʼaan joʼ ereens choʼq rehebʼ li santil paabʼanel
19 ut naq laaʼex texruuq xnawbʼal li xnimal xwankil li naxkʼutbʼesi chiqu laaʼo laj paabʼanel. Li xnimal li xwankil nakʼutunk saʼebʼ li xbʼaanuhom,
20 kiroksi li wankil aʼin naq kixwaklesi chi yoʼyo li Kriist saʼ xyanqebʼ li kamenaq ut naq kixchunubʼ saʼ li xnim uqʼ aran saʼ choxa.
21 Aʼan wank saʼ xbʼeen chixjunilebʼ li awabʼejilal, saʼ xbʼeenebʼ li nekeʼtaqlank, saʼ xbʼeenebʼ li nekeʼawabʼejink, saʼ xbʼeenebʼ li nekeʼkʼamok bʼe ut saʼ xbʼeenebʼ li qas qiitzʼin li wankebʼ xwankil abʼan moko kaʼaj tawiʼ saʼebʼ li kutan* aʼin, saʼebʼ ajwiʼ li kutan li tchalq moqon.
22 Aʼan kixkʼe ajwiʼ chixjunil li kʼaʼaq re ru rubʼel roq li Kriist ut kixkʼe chi xjolominkil chixjunil li naxchap ribʼ rikʼin li chʼuut.
23 Li chʼuut aʼan li xtibʼel ut aʼan naxkʼe re chixjunil li naʼajmank chiru.
Xtzʼaqobʼ ebʼ li naʼlebʼ
^ Aʼin naraj xyeebʼal, rikʼin li Kriist.
^ Malaj «xjolominkil».
^ Malaj «li qechanihom».
^ Malaj «saʼ li ruuchichʼochʼ». Taawil xchʼolobʼankil li aatin, ruuchichʼochʼ.
