Efesios 6:1-24
6 Ex alal kʼajolbʼej, chexʼabʼinq chiru leenaʼ leeyuwaʼ joʼ nawulak chiru li Qaawaʼ xbʼaan naq aʼin us xbʼaanunkil.
2 «Taawoxloqʼi laanaʼ laayuwaʼ». Aʼin li xbʼeen taql li naxchap ribʼ rikʼin jun li yeechiʼom:
3 «Re naq us t-elq li taabʼaanu ut najtaq roq laayuʼam saʼ xbʼeen li ruuchichʼochʼ».
4 Ex yuwaʼbʼej,* meechiqʼ* xjosqʼil leeralal leekʼajol, meekanabʼ xkʼirisinkilebʼ ut xtijbʼalebʼ rikʼin li naʼlebʼ li nachalk rikʼin li Jehobʼa.*
5 Ex moos, chexʼabʼinq chiruhebʼ laj echal eere saʼ ruuchichʼochʼ, qʼaxal teeroxloqʼihebʼ ut texʼabʼinq chi anchal leechʼool, chanchan tawiʼ yookex chi abʼink chiru li Kriist.
6 Meebʼaanu aʼin kaʼajwiʼ naq texʼileʼq yal re xsahobʼresinkil xchʼool ebʼ li winq, bʼaanumaq bʼan joʼebʼ li xmoos li Kriist li nekeʼxbʼaanu li rajom li Yos chi anchalebʼ xchʼool ut xmetzʼew.
7 Chexkʼanjelaq chi anchal leechʼool chanchan tawiʼ yookex chi kʼanjelak chiru li Jehobʼa* ut maawaʼ chiruhebʼ li winq
8 xbʼaan naq laaʼex nekeenaw naq cheejunqal teekʼul wiʼ chik rikʼin li Jehobʼa* li us li xeebʼaanu maakʼaʼ naxye ma wankex choʼq moos malaj moko wankex ta choʼq moos.
9 Ut laaʼex aj echal moos, bʼaanumaq ajwiʼ aʼin rehebʼ, meesebʼesihebʼ* xbʼaan naq nekeenaw naq aʼanebʼ ut laaʼex jun ajwiʼ aj Echal Eere saʼ choxa ut aʼan inkʼaʼ nasikʼok u.
10 Re xraqbʼal, li Qaawaʼ taxaq tixkʼe eewankil saʼ xkʼabʼaʼ li xnimal ru li xmetzʼew.
11 Kʼehomaq cheerix chixjunil li kixkʼe eere li Yos re naq texyaloq, aʼin tixbʼaanu naq kaw xaqxoqex ut chi joʼkan inkʼaʼ textʼaneʼq saʼebʼ li aaleek li naxkʼe laj Tza*
12 xbʼaan naq moko yooko ta chi yalok rikʼinebʼ winq, yooko bʼan chi yalok rikʼinebʼ li maaʼus aj musiqʼej li wankebʼ saʼ choxa, ebʼ aʼin nekeʼawabʼejink ut nekeʼtaqlank saʼ xbʼeen li ruuchichʼochʼ li wank saʼ qʼoqyink.
13 Saʼ xkʼabʼaʼ aʼin, kʼehomaq cheerix chixjunil li kixkʼe eere li Yos re naq texyaloq. Ut chi joʼkan naq twulaq li kutan li inkʼaʼ us texruuq xkuybʼal ut naq ak xeebʼaanu chixjunil li naʼajmank kaw xaqxoqex.
14 Joʼkan bʼiʼ, kaw xaqxoqex ut bʼakʼbʼooq leesaʼ rikʼin li yaal joʼ jun li kʼaamalsaʼ, tiqtoqex rikʼin li tiikilal joʼ jun li ramlebʼ li naxkol leemaqabʼ.*
15 Ut wanq cheeroq leexaabʼ ut kawresinbʼilaqex re xkʼebʼal chi naweʼk li chaabʼil esil chirix li tuqtuukilal.
16 Abʼan junelik teechap li nimla ramlebʼ li naxkʼutbʼesi naq kʼojkʼo eechʼool rikʼin li Yos re naq texruuq xchupbʼal chixjunil li lochlokil chʼiichʼ li nachalk rikʼin li Maaʼus.
17 Meekanabʼ ajwiʼ xkʼoxlankil li kolbʼa ibʼ ut aʼin tixkol leejolom joʼ jun li punit chʼiichʼ ut li jutzʼchʼiichʼ li naxkʼe li santil musiqʼej, aʼin naraj xyeebʼal, li raatin li Yos.
18 Joʼkan ajwiʼ, kanabʼomaq naq li santil musiqʼej tbʼeresinq eere naq textijoq chi rajlal ut naq teebʼaanu li jalan jalanq chi tij ut tzʼaamank. Ut chi joʼkan junelik ajʼooq eeru ut inkʼaʼ teekanabʼ tzʼaamank chirixebʼ li santil paabʼanel.
19 Tijonqex ajwiʼ chiwix ut chi joʼkan naq tinte saʼ we tkʼemanq we li aatin re naq tinruuq xkʼebʼal chi naweʼk chi maakʼaʼ inxiw li muqmukil naʼlebʼ chirix li chaabʼil esil.
20 Li Yos kitaqlank we chi xkʼebʼal chi naweʼk li chaabʼil esil ut saʼ xkʼabʼaʼ aʼin bʼakʼbʼokin chi kareen. Tijonqex chiwix chiru li Yos re naq tinruuq xkʼebʼal chi naweʼk li chaabʼil esil chi maakʼaʼ inxiw joʼ tento tinʼaatinaq.
21 Re naq teenaw chiwix ut chanru yookin chi elk, laj Tíquico tixye eere chixjunil. Laj Tíquico aʼan jun li qechpaabʼanel li raaro inbʼaan ut chaabʼil nakʼanjelak chiru li Qaawaʼ.
22 Aʼin ajʼe naq nintaqla eerikʼin: re naq teenaw chanru wanko ut re naq tixkʼojobʼ leechʼool.
23 Chiwanq taxaq rikʼinebʼ li qechpaabʼanel li tuqtuukilal, li rahok ut li paabʼank li nachalk rikʼin li Yos li Yuwaʼbʼej ut rikʼin li Qaawaʼ Jesukriist.
24 Chiwanq taxaq li xnimal rusilal li Yos rikʼinebʼ chixjunil li nekeʼxra chi tzʼaqal li Qaawaʼ Jesukriist.
Xtzʼaqobʼ ebʼ li naʼlebʼ
^ Arin yook raatinankilebʼ li winq.
^ Malaj «meetik».
^ Taawil xchʼolobʼankil li aatin, Jehobʼa.
^ Taawil xchʼolobʼankil li aatin, Jehobʼa.
^ Taawil xchʼolobʼankil li aatin, Jehobʼa.
^ Malaj «meexibʼehebʼ».
^ Saʼ griego «li Diʼaabʼ». Taawil xchʼolobʼankil li aatin, Diʼaabʼ.
^ Malaj «leechʼool».
