Hebreos 1:1-14
1 Najter qʼe kutan, li Yos kiroksi naabʼal sut ebʼ li propeet re raatinankilebʼ li qaxeʼtoon ut kixbʼaanu rikʼin jalan jalanq li naʼlebʼ.
2 Chiruhebʼ li kutan aʼin xooraatina saʼ xkʼabʼaʼ jun li Alalbʼej li kixxaqabʼ re naq trechani chixjunil ut saʼ xkʼabʼaʼ aʼan kixbʼaanu li wank saʼ choxa ut saʼ ruuchichʼochʼ.*
3 Aʼan xlemtzʼunil li xloqʼal li Yos ut aʼan xjalam u li naxkʼut chi tzʼaqal re ru chanru xnaʼlebʼ ut rikʼin xwankilal li raatin naxkuutu ut naxbʼaanu naq chʼutchʼuuq chixjunil. Ut naq ak xooxchʼajobʼresi chirix li qamaak, kichunlaak saʼ xnim ruqʼ li Nimajwal Yos saʼ choxa.
4 Joʼkan naq qʼaxal nim xwankil chiruhebʼ li ánjel xbʼaan naq kirechani jun li kʼabʼaʼej li qʼaxal chaabʼil chiru li xkʼabʼaʼebʼ.
5 Jun eetalil, ma kixye tawiʼ li Yos re junaq li ánjel: «Laaʼat li walal; anaqwan laaʼin chik aayuwaʼ»? Malaj kixye: «Laaʼinaq xyuwaʼ ut aʼanaq li walal»?
6 Ut naq kixkʼam chaq wiʼ chik li Xbʼeen Ralal saʼ ruuchichʼochʼ, naxye: «Ut chixjunilebʼ taxaq li xʼánjel li Yos teʼxwiqʼibʼ ribʼ chiru».
7 Joʼkan ajwiʼ, chirixebʼ li ánjel naxye: «Aʼan naxbʼaanu naq ebʼ li xʼánjel qʼaxal kawaqebʼ ribʼ joʼ li iqʼ ut ebʼ laj kʼanjel aʼin chanchanaqebʼ li ruʼuj raqʼ xaml».
8 Abʼan chirix li Alalbʼej naxye: «Li Yos aʼan laakʼojaribʼaal chi junelik ut li xxuqʼ* laaʼawabʼejilal aʼan li xxuqʼ* li tiikilal.
9 Xaara li tiikilal ut xikʼ xaawil li maaʼusilal.* Joʼkan naq li Yos, Laayos, xatxyul rikʼin li xʼaseeytil li sahil chʼoolejil ut naabʼal li aseeyt kixkʼe saʼ aabʼeen chiru li kixkʼe saʼ xbʼeen li junchʼol chi awabʼej».
10 Naxye ajwiʼ: «Saʼ xtiklajik at Qaawaʼ, xaakʼe li rubʼelankil li ruuchichʼochʼ ut rikʼin laawuqʼ xaayiibʼ li choxa».
11 Li choxa ut li ruuchichʼochʼ inkʼaʼ chik twanq abʼan laaʼat toj yoʼyoqat; li choxa ut li ruuchichʼochʼ teʼosoʼq joʼ naxkʼul jun li aqʼej
12 ut taabʼot joʼ nabʼotmank jun li nimla aqʼej ut taajal joʼ najalmank jun li aqʼej. Abʼan laaʼat inkʼaʼ nakatjalaak ut laachihabʼ maajunwa traqeʼq.
13 Abʼan, ma kixye tawiʼ li Yos re junaq li ánjel: «Kʼojlan saʼ linnim uqʼ toj reetal naq tinkʼe rubʼel laawoq ebʼ li xikʼ nekeʼilok aawe re naq taayeqʼihebʼ»?
14 Ma inkʼaʼ tabʼiʼ musiqʼej chixjunilebʼ li ánjel li nekeʼkʼanjelak chiru li Yos? Ma inkʼaʼ taqlanbʼilebʼ xbʼaan li Yos re naq teʼxtenqʼa ebʼ li teʼkoleʼq?
Xtzʼaqobʼ ebʼ li naʼlebʼ
^ Taawil xchʼolobʼankil li aatin, ruuchichʼochʼ.
^ Li cheʼ aʼin reetalil li xwankilal jun li awabʼej.
^ Li cheʼ aʼin reetalil li xwankilal jun li awabʼej.
^ Saʼ griego «xqʼetbʼal li chaqʼrabʼ», aʼin naraj xyeebʼal, xtzʼeqtaanankil li xchaqʼrabʼ li Yos.
