Hebreos 12:1-29
12 Joʼkan bʼiʼ, li nimla chʼuut chi qas qiitzʼin aʼin chanchan jun li choql li nasutunk qe, aʼanebʼ nekeʼxkʼe chi naweʼk chixjunil li xeʼril ut xeʼrabʼi. Qisihaq ajwiʼ saʼ qabʼeen chixjunil li iiq ut li maak li moko chʼaʼaj ta chiru xrambʼal qabʼe. Ut inkʼaʼ tqakanabʼ aanilak saʼ li aanilak li naxkʼe chiqu li Yos
2 naq kaw yooqo xkaʼyankil li Xnimal Ru aj Kʼamolbʼe ut aj Tzaqobʼresihom re li qapaabʼal aʼ li Jesús. Xbʼaan naq naxnaw naq saʼ li kutan chalk re tixtaw li sahil chʼoolejil, inkʼaʼ kixutaanak usta kikamk chiru jun li cheʼ* ut anaqwan chunchu saʼ xnim ruqʼ li Yos.
3 Ut re naq inkʼaʼ texlubʼq chi moko tchʼinaaq leechʼool, kʼehomaq eeqʼe chi xkʼoxlankil li kixkuy li hobʼeʼk saʼ ruqʼebʼ laj maak ut naq xeʼnaʼlebʼak chi joʼkan xeʼxkʼe ribʼ saʼ chʼaʼajkilal.
4 Naq yookex xkʼebʼal eeqʼe chiru li maak aʼin, laaʼex toj maajiʼ nekeekʼe eeqʼe chirix junaq li chʼaʼajkilal toj reetal naq teehoy leekikʼel.
5 Ut kisach saʼ eechʼool chi junajwa li naʼlebʼ li xkʼemank eere joʼ naxbʼaanu jun li yuwaʼbʼej rikʼinebʼ li ralal xkʼajol: «At walal, maatzʼeqtaana laatijbʼal li naxkʼe li Jehobʼa* chi moko tchʼinaaq laachʼool naq tatxqʼus
6 xbʼaan naq li Jehobʼa* naxtij li naxra. Joʼkan naq naxkʼe chi tzʼuum li naxkʼulebʼ joʼ ralal xkʼajol».
7 Laaʼex tento teekuy naq textijeʼq.* Li Yos nekexril joʼ ralal xkʼajol. Ma wank junaq li alal kʼajolbʼej li inkʼaʼ natijeʼk xbʼaan li xyuwaʼ?
8 Abʼan wi li Yos inkʼaʼ nekextij laaʼex joʼ kixtij jalanebʼ chik, moko tzʼaqalex ta ralal xkʼajol.
9 Joʼkan ajwiʼ, li qayuwaʼ xooxtij chaq ut laaʼo xqoxloqʼi. Ma inkʼaʼ raj tento tqakʼe qibʼ chi anchal qachʼool rubʼel xwankil li Yuwaʼbʼej li naxbʼeresi li qayuʼam rikʼin li xsantil musiqʼej ut yoʼyoqo?
10 Li qayuwaʼ xooxtij naq yooko chaq chi kʼiik ut kixbʼaanu aʼin joʼ chanru xkʼoxla naq us choʼq qe. Abʼan li Yos nokooxtij re naq us wanqo ut santaqo joʼ aʼan.
11 Chʼolchʼo naq moko sa ta narekʼa ribʼ junaq li qas qiitzʼin naq natijeʼk saʼ li hoonal aʼan, narahoʼk bʼan li xchʼool. Abʼan li nekeʼxkʼulubʼa li qʼuseʼk, nekeʼruuk chik chi wank saʼ tiikilal ut saʼ tuqtuukilal.
12 Joʼkan naq kawresimaq li ruqʼebʼ ut ebʼ li xbʼeen roq li maakʼaʼebʼ xmetzʼew.
13 Ut meekanabʼ xtiikobʼresinkil xbʼehil leeroq re naq li yeq roq inkʼaʼ t-elq li xbʼaqel saʼ xnaʼaj, tkʼiraaq bʼan.
14 Sikʼomaq li tuqtuukilal rikʼin chixjunilebʼ ut li santilal xbʼaan naq wi maakʼaʼ aʼin maaʼani tril ru li Qaawaʼ.
15 Ajʼooq eeru re naq maaʼani tkanaaq chi inkʼaʼ ta tixkʼul li xnimal rusilal li Yos ut inkʼaʼ tmoq saʼ eeyanq junaq li xeʼ li wank xmay li teʼxkʼe saʼ chʼaʼajkilal ut tixtzʼajni naabʼalebʼ li qas qiitzʼin.
16 Ut weent teebʼaanu naq maakʼaʼaq saʼ eeyanq junaq li qas qiitzʼin li naxmux ribʼ* chi moko junaq li qas qiitzʼin li naxtzʼeqtaana li nachalk rikʼin li Yos joʼ laj Esaú. Aʼan kixkʼul raj rosobʼtesinkil saʼ xkʼabʼaʼ naq xbʼeen alalbʼej abʼan kixtzʼeqtaana aʼin yal saʼ xkʼabʼaʼ jun sekʼ chi tibʼelwa.
17 Xbʼaan naq laaʼex nekeenaw naq moqon chik naq kiraj xkʼulbʼal li rosobʼtesinkil, kitzʼeqtaanaak. Usta kiyaabʼak re xjalbʼal li kixbʼaanu li xyuwaʼ, maakʼaʼ chik kiʼok wiʼ.
18 Xbʼaan naq laaʼex inkʼaʼ xexjilok rikʼin li inkʼaʼ naruhank xchʼeʼbʼal ut naqʼichichnak xxamlel chi moko xexjilok rikʼin li qʼeqi choql chi moko rikʼin li chamal qʼoqyink chi moko rikʼin li iqʼ, li kʼajoʼ xkawil,
19 chi moko rikʼin xyaabʼ junaq li trompeet chi moko rikʼin xyaabʼ junaq li kuxej. Naq li tenamit kirabʼi li xyaabʼ kuxej aʼin, kixtzʼaama naq maakʼaʼ chik tyeeheʼq re.
20 Xbʼaan naq qʼaxal yookebʼ xxiw xbʼaan li taql aʼin: «Usta xul tchʼeʼoq re li tzuul tento tteniiq chi pek».
21 Ut saʼ xkʼabʼaʼ naq xiwxiw li yook chi ilmank, laj Moisés kixye: «Ninsiksotk xbʼaan inxiw».
22 Abʼan laaʼex xexjilok chixkʼatq li tzuul Sion ut chixkʼatq li xtenamit li yoʼyokil Yos aʼ li Jerusalén li wank saʼ choxa, xexjilok chixkʼatq li kʼiila ánjel
23 li chʼutchʼukebʼ saʼ jun li nimla chʼuut, chixkʼatq li xchʼuut ebʼ li xbʼeen alalbʼej li tzʼiibʼanbʼilebʼ xkʼabʼaʼ saʼ choxa, xexjilok chixkʼatq li Yos, li Naraqok Aatin saʼ xbʼeen chixjunilebʼ, chixkʼatq li tiikebʼ xchʼool li nekeʼxbʼeresi li xyuʼam rikʼin li santil musiqʼej ut kibʼaanumank naq tzʼaqalaqebʼ chik re ru,
24 xexjilok chixkʼatq li Jesús, li natenqʼank saʼ li akʼ sumwank* ut chixkʼatq li kikʼ li kirachrachiik saʼ qabʼeen, li qʼaxal us chiru li xkikʼel laj Abel.
25 Weent teebʼaanu re naq inkʼaʼ teekanabʼ rabʼinkil li yook chi aatinak saʼ choxa. Junxil arin saʼ ruuchichʼochʼ wankebʼ inkʼaʼ xeʼrabʼi li kixkʼe resil li Yos ut xeʼkʼeheʼk chi xtojbʼal li xmaakebʼ. Laaʼo ajwiʼ tqakʼul xtojbʼal li qamaak wi inkʼaʼ naqabʼi li yook chi aatinak saʼ choxa.
26 Saʼ li hoonal aʼan li xyaabʼ xkux kixchiqʼchiqʼi li ruuchichʼochʼ, abʼan anaqwan aʼan kixye: «Jun sut aj chik tinchiqʼchiqʼi moko kaʼaj tawiʼ li ruuchichʼochʼ, tinchiqʼchiqʼi ajwiʼ li choxa».
27 Abʼanan li aatin «jun sut aj chik» naxkʼut naq li Yos tixsach li yook chi chiqʼchiqʼiik, aʼin moko yiibʼanbʼil ta xbʼaan li Yos re naq wanq junelik li inkʼaʼ nachiqʼchiqʼiik.
28 Saʼ xkʼabʼaʼ naq tqakʼul li Awabʼejilal li inkʼaʼ naru nachiqʼchiqʼiik, miqakanabʼ xkʼulbʼal li xnimal rusilal re naq saʼ xkʼabʼaʼ aʼin tooruuq chi kʼanjelak chiru li Yos joʼ nawulak chiru aʼan rikʼin roxloqʼinkil ut xloqʼoninkil chi anchal qachʼool.
29 Xbʼaan naq li Qayos chanchan li xaml li nasachok chi junajwa.
Xtzʼaqobʼ ebʼ li naʼlebʼ
^ Malaj «cheʼ re rahobʼtesiik». Taawil xchʼolobʼankil li aatin, cheʼ re rahobʼtesiik.
^ Taawil xchʼolobʼankil li aatin, Jehobʼa.
^ Taawil xchʼolobʼankil li aatin, Jehobʼa.
^ Malaj «tkʼeheʼq eenaʼlebʼ».
^ Li aatin saʼ griego, pornéia. Taawil xchʼolobʼankil li aatin, muxuk ibʼ.
^ Li naʼlebʼ saʼ griego naʼaatinak chirix jun li qas qiitzʼin li naʼokenk chirix wiibʼ li qas qiitzʼin re naq teʼxkʼe ribʼ saʼ aatin.
