Hebreos 3:1-19
3 Joʼkan naq ex santil paabʼanel li bʼoqbʼilex re xik saʼ choxa, kʼoxlamaq li eetalil li kixkanabʼ li Jesús li naqakʼulubʼa* joʼ apóstol ut joʼ xyuwaʼil aj tij.
2 Aʼan kiʼabʼink chiru li kixaqabʼank re saʼ li kʼanjel aʼin joʼ kixbʼaanu laj Moisés saʼ rochoch li Yos.
3 Xbʼaan naq li Jesús xkʼulubʼ naq qʼaxal tkʼeheʼq xloqʼal chiru laj Moisés xbʼaan naq laj kabʼlanel qʼaxal oxloqʼinbʼil chiru li ochoch li nakabʼlamank.
4 Joʼkan, li junjunq chi ochoch yiibʼanbʼil xbʼaan jun li qas qiitzʼin, abʼan li kiyiibʼank re chixjunil aʼan li Yos.
5 Joʼkan bʼiʼ, laj Moisés kiril chiʼus li rochoch li Yos ut li kʼanjel aʼin kikʼutbʼesink re li tyeemanq moqon,
6 abʼan li Kriist joʼ alalbʼej kiril chiʼus li rochoch li Yos naq kixaqabʼaak chi rilbʼal. Laaʼo rochoch li Yos, wi inkʼaʼ naqakanabʼ aatinak chi maakʼaʼ qaxiw ut naqachap qibʼ chi kaw rikʼin li qoybʼenihom li naqanima wiʼ qibʼ.
7 Joʼkan bʼiʼ, joʼ naxye li santil musiqʼej: «Wi nekeerabʼi anaqwan li xyaabʼ xkux,
8 meekanabʼ naq leechʼool tixqʼet ribʼ joʼ xeʼxbʼaanu leexeʼtoon. Aʼanebʼ xeʼxchiqʼ injosqʼil naq xeʼxyal wix saʼ li chaqichʼochʼ,
9 usta xeʼril li xinbʼaanu chiru 40 chihabʼ xeʼxyal wix.
10 Joʼkan naq kichalk injosqʼil saʼ xbʼeen li tenamit li wank chiruhebʼ li kutan aʼan ut xinye: “Usta yookebʼ chi kʼanjelak chiwu, nikineʼxtzʼeqtaana ut toj maajiʼ nekeʼxtaw ru chanru ninnaʼlebʼak”.
11 Tojaʼ naq xinye chi chʼolchʼo ru xbʼaan linjosqʼil: “Inkʼaʼ teʼoq saʼ linhilobʼaal”».
12 Ex wechpaabʼanel, weent teebʼaanu. Mexnajtoʼk rikʼin li Yos xbʼaan naq aʼin naru naxbʼaanu naq tmaaʼusoʼq leechʼool ut tixkanabʼ paabʼank.
13 Meekanabʼ bʼan xwaklesinkil eechʼool cheeribʼil eeribʼ wulaj wulaj naq toj wanko saʼebʼ li kutan li nakʼabʼaʼiik «anaqwan» re naq li xwankil li maak, li seebʼ chi bʼalaqʼik, inkʼaʼ tixbʼaanu naq tkawuuq leechʼool.
14 Xbʼaan naq, wi junelik chapchoko chi kaw rikʼin li xqapaabʼ chaq saʼ xtiklajik, tqakʼul li kixkʼul li Kriist.
15 Li raatin li Yos naxye: «Wi nekeerabʼi anaqwan li xyaabʼ xkux, meekanabʼ naq leechʼool tixqʼet ribʼ joʼ xeʼxbʼaanu leexeʼtoon naq xeʼxchiqʼ injosqʼil».
16 Xbʼaan naq, anihebʼ xeʼabʼink re abʼan xeʼxchiqʼ xjosqʼil? Ma inkʼaʼ tabʼiʼ chixjunilebʼ li xeʼisiik chaq Ejiipt ut xeʼjolomiik xbʼaan laj Moisés?
17 Joʼkan ajwiʼ, anihebʼ xeʼkʼehok re xjosqʼil li Yos chiru 40 chihabʼ? Ma inkʼaʼ tabʼiʼ li xeʼmaakobʼk ut xeʼkamk saʼ li chaqichʼochʼ?
18 Ut anihebʼ ajʼe kixye li Yos naq inkʼaʼ teʼoq saʼ li xhilobʼaal? Ma inkʼaʼ tabʼiʼ li inkʼaʼ xeʼabʼink?
19 Joʼkan bʼiʼ, naqakʼe reetal naq inkʼaʼ xeʼruuk chi ok xbʼaan naq moko tzʼaqalebʼ ta li xpaabʼal.
Xtzʼaqobʼ ebʼ li naʼlebʼ
^ Malaj «li naqakʼe chi naweʼk».
