Hechos 12:1-25
12 Chiruhebʼ li kutan ajwiʼ aʼan, li awabʼej Herodes* kiʼok xrahobʼtesinkil wiibʼ oxibʼ rehebʼ li nekeʼokenk saʼ li chʼuut.
2 Kixkamsi chi chʼiichʼ laj Santiago, li ras* laj Juan
3 ut naq kiril naq xeʼwulak chiruhebʼ laj judiiy, kixkʼe saʼ tzʼalam laj Pedro. (Chixjunil aʼin kikʼulmank saʼebʼ li kutan naq wank chaq li Ninqʼe chirix li Kaxlanwa li Maakʼaʼ Xchʼamal).*
4 Joʼkan naq kixchap, kixkʼe saʼ tzʼalam ut kixxaqabʼ kaahibʼ chʼuut aj puubʼ li nekeʼxjalbʼe ribʼ chi xkʼaakʼalenkil ut saʼ li junjunq chi chʼuut wank kaahibʼ aj puubʼ. Kixbʼaanu aʼin xbʼaan naq kiraj raqok aatin saʼ xbʼeen chiru li tenamit naq ak xnumeʼk li Paswa.
5 Joʼkan naq xeʼxtzʼap laj Pedro saʼ tzʼalam. Abʼanan, ebʼ laj paabʼanel inkʼaʼ nekeʼxkanabʼ tijok chirix laj Pedro chi anchalebʼ xchʼool.
6 Jun qʼoqyink chik ma naxaqabʼaak chiru li tenamit xbʼaan laj Herodes naq laj Pedro yook chi wark saʼ xyanq wiibʼ laj puubʼ ut bʼakʼbʼo rikʼin wiibʼ li kareen. Ut ebʼ laj puubʼ yookebʼ xkʼaakʼalenkil rokebʼaal li tzʼalam.
7 Abʼan maakʼaʼebʼ saʼ xchʼool naq kutamil aran li xʼánjel li Jehobʼa,* ut jun li saqenk kixkutanobʼresi li naʼaj li wank wiʼ laj Pedro. Tojaʼ naq kixchʼeʼ chixkʼatq xsaʼ laj Pedro re rajsinkil ut kiʼok xyeebʼal re: «Seebʼa aawibʼ, waklin!» Ut li kareen li bʼakʼbʼo wiʼ li ruqʼ kitʼaneʼk.
8 Li ánjel kixye re: «Bʼakʼ laasaʼ ut kʼe laaxaabʼ».* Laj Pedro kixbʼaanu li kixye li ánjel. Chirix chik aʼan kixye re: «Kʼe laatʼikr li nakaalan wiʼ aawibʼ ut taaqehin».
9 Kiʼelk laj Pedro ut kixtaqe, abʼan inkʼaʼ naxkʼe reetal naq li yook xbʼaanunkil li ánjel yook chi kʼulmank chi kutankil. Saʼ xchʼool aʼan naq yook rilbʼal jun li moy u.
10 Naq xeʼnumeʼk chiru li xbʼeen ut li xkabʼ xchʼuutal laj kʼaakʼalenel, xeʼwulak saʼ li okebʼaal re chʼiichʼ li nakʼamok saʼ li tenamit. Ut li okebʼaal kixte ribʼ xjunes. Tojaʼ naq xeʼelk ut xkohebʼ saʼ jun li bʼe. Naq kixkʼe reetal, maaʼani chik li ánjel.
11 Saʼ li hoonal ajwiʼ aʼan, laj Pedro kixkʼe reetal li kikʼulmank ut kixye: «Anaqwan chʼolchʼo chiwu naq li Jehobʼa* kixtaqla chaq li xʼánjel ut xinxkol saʼ ruqʼ laj Herodes ut chiru chixjunil li nekeʼraj ebʼ laj judiiy naq tinkʼul».
12 Naq ak kixkʼe reetal aʼin, xkoho saʼ rochoch li xMaría aʼ li xnaʼ laj Juan li nakʼabʼaʼiik joʼ aj Marcos. Aran chʼutchʼukebʼ chi tijok naabʼalebʼ li nekeʼtaqenk re li Jesús.
13 Naq kixchʼeʼ li okebʼaal, jun li saajil moos, xRode xkʼabʼaʼ, xkoho rilbʼal ani xchʼeʼok.
14 Naq kirabʼi xyaabʼ xkux laj Pedro, kʼajoʼ naq kisahoʼk saʼ xchʼool ut xbʼaan aʼin moko kixte ta chik li okebʼaal, xkoho bʼan saʼ aanil chi xyeebʼal naq laj Pedro wank chire li okebʼaal.
15 «Kaan aawu», chankebʼ re. Abʼan saʼ xkʼabʼaʼ naq inkʼaʼ naxkanabʼ xyeebʼal naq aran wank laj Pedro, ebʼ aʼan xeʼok xyeebʼal re: «Aʼan jun li ánjel».*
16 Naq yook chi kʼulmank aʼin, laj Pedro wank chirix kabʼl ut inkʼaʼ naxkanabʼ xchʼeʼbʼal li okebʼaal. Naq xeʼxte li okebʼaal ut xeʼril ru, sachsokebʼ xchʼool xeʼkanaak.
17 Laj Pedro kirekʼasi li ruqʼ re naq inkʼaʼ teʼekʼanq ut kixseeraqʼi rehebʼ chanru kiʼisiik saʼ tzʼalam xbʼaan li Jehobʼa.* Tojaʼ naq kixye rehebʼ: «Yeehomaq chaq re laj Santiago ut rehebʼ laj paabʼanel». Naq ak kixye aʼin, kiʼelk ut xkoho saʼ jalan chik naʼaj.
18 Naq kisaqewk, yookebʼ xpoqoqinkil ribʼ* ebʼ laj puubʼ xbʼaan naq inkʼaʼ nekeʼxnaw li kikʼulmank rikʼin laj Pedro.
19 Laj Herodes yalaq bʼar kixtaqla xsikʼbʼal laj Pedro, ut xbʼaan naq inkʼaʼ kixtaw, kiʼok xpatzʼbʼal rehebʼ laj kʼaakʼalenel ut chirix chik aʼan kixtaqla xrahobʼtesinkilebʼ. Moqon chik laj Herodes xʼelk Judea ut xkubʼeek Cesarea ut moko najt ta kikanaak aran.
20 Joʼkan bʼiʼ, li awabʼej Herodes yook xjosqʼil rikʼinebʼ li qas qiitzʼin re Tiro ut Sidón. Joʼkan naq ebʼ li qas qiitzʼin aʼin xeʼxjunaji ribʼ re rilbʼal chaq laj Herodes. Abʼan xbʼeenwa xeʼxqʼunbʼesi laj Blasto li xaqabʼanbʼil chi rilbʼal li rochoch li awabʼej re naq tixtenqʼahebʼ. Ut xeʼxye re li awabʼej naq nekeʼraj wank saʼ tuqtuukilal rikʼin. Xeʼxbʼaanu aʼin xbʼaan naq saʼ li tenamit li naxjolomi li awabʼej aran naʼelk chaq li tzekemq choʼq rehebʼ li qas qiitzʼin rehebʼ li tenamit aʼin.
21 Naq kiwulak li kutan li ak xaqabʼanbʼil, laj Herodes kixtiqibʼ ribʼ rikʼin chaqʼal ru tʼikr, li nekeʼroksi ebʼ li awabʼej, kichunlaak saʼ xnaʼaj laj raqol aatin ut kiʼok raatinankil li tenamit.
22 Tojaʼ naq ebʼ li qas qiitzʼin li chʼutchʼukebʼ aran, xeʼxjap re chi xyeebʼal: «Aʼan xyaabʼ xkux jun li yos ut maawaʼ xyaabʼ xkux jun li winq!».
23 Saʼ junpaat li xʼánjel li Jehobʼa* kixbʼaanu naq tyajerq xbʼaan naq inkʼaʼ xkʼe xloqʼal li Yos. Kiwaʼeʼk xbʼaanebʼ li motzoʼ ut kikamk.
24 Abʼan li raatin li Jehobʼa* yook chi wulak yalaq bʼar ut naabʼalebʼ chik xeʼok chi paabʼank.
25 Naq laj Bernabé ut laj Saulo xeʼraqeʼk xkʼebʼal li tenqʼ rehebʼ laj paabʼanel aran Jerusalén, xeʼsutqʼiik ut xeʼxkʼam chirixebʼ laj Juan li nekeʼxye ajwiʼ re Marcos.
Xtzʼaqobʼ ebʼ li naʼlebʼ
^ Aʼin naraj xyeebʼal, laj Herodes Agripa I. Taawil xchʼolobʼankil li aatin, Herodes.
^ Malaj «li riitzʼin».
^ Taawil xchʼolobʼankil li aatin, Ninqʼe chirix li Kaxlanwa li Maakʼaʼ Xchʼamal.
^ Taawil xchʼolobʼankil li aatin, Jehobʼa.
^ Malaj «laaperxaabʼ».
^ Taawil xchʼolobʼankil li aatin, Jehobʼa.
^ Saʼ griego «li xʼánjel».
^ Taawil xchʼolobʼankil li aatin, Jehobʼa.
^ Malaj «xmululinkil ribʼ».
^ Taawil xchʼolobʼankil li aatin, Jehobʼa.
^ Taawil xchʼolobʼankil li aatin, Jehobʼa.
