Hechos 13:1-52
-
Laj Saulo ut laj Bernabé nekeʼtaqlaak saʼ jalan chik naʼaj chi xbʼaanunkil li xkʼanjel li Yos (1-3)
-
Nekeʼxkʼe chi naweʼk li raatin li Yos aran Chipre (4-12)
-
Laj Pablo naraatina li tenamit aran Antioquía re Pisidia (13-41)
-
Ak kiyeemank chaq naq tkʼemanq chi naweʼk li raatin li Yos rehebʼ li maawaʼebʼ aj judiiy (42-52)
13 Joʼkan bʼiʼ, saʼ li chʼuut re Antioquía wankebʼ chaq propeet ut aj kʼutunel: laj Bernabé, laj Symeón li nakʼabʼaʼiik joʼ aj Niger, laj Lucio re Cirene, laj Manaén, li rechtzolom laj Herodes,* li naʼawabʼejink saʼ xteepal Galilea, ut laj Saulo.
2 Naq yookebʼ chaq chi kʼanjelak chiru li Jehobʼa* ut chi ayuunik,* li santil musiqʼej kixye: «Isihomaq saʼ eeyanq laj Bernabé ut laj Saulo re naq teʼxbʼaanu li kʼanjel li xinbʼoqebʼ wiʼ».
3 Naq ak xeʼayuunik* ut xeʼtijok, xeʼxkʼe li ruqʼ saʼ xbʼeenebʼ ut xeʼchaqʼrabʼiik.
4 Joʼkan naq ebʼ li winq aʼin li taqlanbʼilebʼ xbʼaan li santil musiqʼej, xeʼkubʼeek Seleucia ut aran xeʼtaqeʼk saʼ jukubʼ ut xkohebʼ Chipre.
5 Naq xeʼwulak Salamina xeʼxkʼe chi naweʼk li raatin li Yos saʼ li naʼaj bʼarwiʼ nekeʼloqʼonink ebʼ laj judiiy. Ut laj Juan yook chirixebʼ re xtenqʼankilebʼ.
6 Naq ak xeʼxnumsi li naʼaj li sutsu chi haʼ, xeʼwulak Pafos. Ut aran xeʼxtaw ribʼ rikʼin jun laj judiiy aj Bar-Jesús xkʼabʼaʼ. Li winq aʼin aj tuul ut naxbʼaanu ribʼ naq propeet.
7 Laj Bar-Jesús wank chaq rikʼin laj Sergio Paulo li ruuchil awabʼej re Chipre li naʼaj li sutsu chi haʼ. Laj Sergio Paulo seebʼ xchʼool. Li winq aʼin kixbʼoq laj Bernabé ut laj Saulo xbʼaan naq qʼaxal naraj rabʼinkil li raatin li Yos.
8 Abʼan laj Elimas laj tuul (xbʼaan naq joʼkan najalmank ru xkʼabʼaʼ) kiʼok xrambʼal chiruhebʼ re naq li ruuchil awabʼej inkʼaʼ t-oq chi paabʼank.
9 Tojaʼ naq laj Saulo li nekeʼxye ajwiʼ re Pablo, kinujak chi santil musiqʼej. Naq kikanaak rilbʼal
10 kixye re: «Laaʼat nujenaqat chi bʼalaqʼil naʼlebʼ ut yalaq kʼaru chi maaʼusilal, laaʼat ralal laj Tza* ut xikʼ nakaawil li tiikilal! Joqʼe taakanabʼ xbʼechʼbʼal li xtiikil bʼe li Jehobʼa?*
11 Kʼe reetal, li ruqʼ li Jehobʼa* wank saʼ aabʼeen; tatmutzʼoʼq ut inkʼaʼ chik taawil li saqʼe chiru jarubʼaq kutan». Tikto kimoyk ut kiqʼoqyinoʼk saʼ ru, ut kiʼok xsikʼbʼal chi xsutam ani tchʼilonq re.
12 Naq li ruuchil awabʼej kiril li kikʼulmank, kiʼok chi paabʼank, ut sachso xchʼool kikanaak xbʼaan li xkʼutum li Jehobʼa.*
13 Laj Pablo ut ebʼ li rochbʼeen xeʼelk Pafos ut xeʼtaqeʼk saʼ jun li jukubʼ ut xkohebʼ Perga saʼ xteepal Panfilia. Abʼan laj Juan kixkanabʼebʼ ut kisutqʼiik Jerusalén.
14 Abʼanan, xeʼelk Perga ut xeʼwulak Antioquía re Pisidia. Ut saʼ jun li sábado* xeʼok saʼ li naʼaj re loqʼonink ut xeʼchunlaak.
15 Naq ak xeʼraqeʼk xyaabʼasinkil li Chaqʼrabʼ chiru chixjunilebʼ ut li xeʼxtzʼiibʼa chaq ebʼ li Propeet, ebʼ li nekeʼjolomink re li naʼaj bʼarwiʼ nekeʼloqʼonink ebʼ laj judiiy xeʼxtaqla xyeebʼal rehebʼ: «Ex qechpaabʼanel, wi junaq eere naraj xyeebʼal junaq li aatin re xwaklesinkil xchʼool li tenamit, xyeehaq».
16 Tojaʼ naq laj Pablo kiwakliik, kirekʼasi li ruqʼ ut kixye:
«Ex winq re Israel ut cheejunilex li qʼaxal nekeeroxloqʼi li Yos, abʼihomaq.
17 Li Xyos li tenamit Israel kixsikʼebʼ ru li qaxeʼtoon. Aʼan kixnima ru li tenamit naq wank chaq choʼq abʼl tenamit aran Ejiipt ut kirisihebʼ rikʼin xnimal ru xwankil.
18 Ut kachʼin chik ma 40 chihabʼ kixkuyebʼ saʼ li chaqichʼochʼ.
19 Naq ak kixsach wuqubʼ li tenamit saʼ li naʼaj Canaán, kixjekʼi ebʼ li chʼochʼ aʼin saʼ xyanqebʼ.
20 Chiru 450 chihabʼ tana kikʼulmank chixjunil aʼin.
»Chirix chik aʼan kixxaqabʼ ebʼ laj raqol aatin re naq teʼjolomiiq toj saʼ xqʼehil li propeet Samuel.
21 Tojaʼ naq xeʼxtzʼaama jun li awabʼej. Ut li Yos kixkʼe laj Saúl rehebʼ chiru 40 chihabʼ. Laj Saúl, ralal laj Quis, ut chalenaq saʼ xteepal laj Benjamín.
22 Chirix chik aʼan kixmaqʼ chiruhebʼ. Ut kixkʼe laj David rehebʼ joʼ awabʼej, chirix li kixkʼe chi naweʼk ut kixye: “Xintaw jun li winq li naxsahobʼresi linchʼool ut tixbʼaanu chixjunil li nawaj. Aʼan laj David, ralal laj Jesé”.
23 Ak kixye chaq li Yos naq rikʼin ralal xkʼajol li winq aʼin t-elq chaq jun laj kolonel. Laj kolonel aʼin aʼan li Jesús.
24 Naq toj maajiʼ nakʼulunk, laj Juan kixye resil li kubʼihaʼ re chixjunilebʼ laj Israel re naq teʼkubʼeeq xhaʼ ut chi joʼkan teʼxkʼutbʼesi naq xeʼxyotʼ xchʼool ut xeʼxjal xnaʼlebʼ.
25 Abʼanan, naq yook xraqbʼal li xkʼanjel, laj Juan kixye: “Anihin naq nekeekʼoxla? Laaʼin maawaʼin aʼan. Abʼan cheenawaq naq li tchalq chiwix moko wank ta inkʼulubʼ re xhitbʼal* li xxaabʼ”.*
26 »Ex was wiitzʼin, ebʼ li ralal xkʼajol laj Abrahán ut ebʼ li junchʼol li wankebʼ saʼ eeyanq li qʼaxal nekeeroxloqʼi li Yos, xextaqla chaq qe li esil aʼin chirix li kolbʼa ibʼ.
27 Xbʼaan naq ebʼ li qas qiitzʼin re Jerusalén ut ebʼ li nekeʼjolomink rehebʼ inkʼaʼ xeʼxkʼe reetal naq aʼan laj kolonel, abʼan naq xeʼraqok aatin saʼ xbʼeen xeʼxbʼaanu naq ttzʼaqloq ru li raatinebʼ li Propeet li nayaabʼasimank saʼ kawil kuxej rajlal sábado.*
28 Usta inkʼaʼ xeʼxtaw xmaak re xkamsinkil, xeʼxmin ru laj Pilaat re naq tixkamsi.
29 Ut naq ak xeʼxbʼaanu chixjunil li kitzʼiibʼamank chaq chirix, xeʼxkubʼsi chiru li cheʼ ut xeʼxkʼe saʼ li muqlebʼaal kamenaq.
30 Abʼan li Yos kixwaklesi chi yoʼyo saʼ xyanqebʼ li kamenaq,
31 ut chiru naabʼal kutan kixkʼut ribʼ chiruhebʼ li xeʼelk chaq Galilea ut xeʼtaqeʼk rochbʼeen aran Jerusalén. Anaqwan aʼanebʼ li xtestiiw chiru li tenamit.
32 »Joʼkan naq laaʼo yooko xyeebʼal resil li chaabʼil esil li xeʼyeechiʼiik chaq rehebʼ li qaxeʼtoon.
33 Li Yos kixbʼaanu naq ttzʼaqloq ru chixjunil chi tzʼaqal re ru choʼq qe, laaʼo li ralal xkʼajol naq kixwaklesi chi yoʼyo li Jesús; joʼ chanru tzʼiibʼanbʼil saʼ li xkabʼ salmo:* “Laaʼat li walal; anaqwan laaʼin chik aayuwaʼ”.
34 Li Yos kixye naq tixwaklesi chi yoʼyo saʼ xyanqebʼ li kamenaq ut maajunwa chik tqʼaaq li xtibʼel naq kixye: “Laaʼin tinkʼut cheeru li tzʼaqal rahok, li xinyeechiʼi re laj David, li rahok aʼin maajunwa t-osoʼq”.
35 Saʼ jun chik li salmo naxye ajwiʼ: “Inkʼaʼ taakanabʼ chi qʼaak laamoos li junelik nakʼanjelak chaawu”.
36 Joʼkan bʼiʼ, laj David kikʼanjelak chiru li Yos* saʼ chixjunil li xyuʼam, kikamk ut kimuqmank saʼ xyanqebʼ li xxeʼtoon ut kiqʼaak li xtibʼel,
37 abʼan li kixwaklesi chi yoʼyo li Yos inkʼaʼ kiqʼaak li xtibʼel.
38 »Joʼkan bʼiʼ, ex was wiitzʼin, cheenawaq naq yooko xyeebʼal resil naq saʼ xkʼabʼaʼ aʼan nakuymank nasachmank leemaak
39 Li Xchaqʼrabʼ laj Moisés inkʼaʼ naru naxbʼaanu naq tiikaqex, abʼan rikʼin li xkamik li winq aʼin, li Yos tixye naq tiikebʼ chixjunilebʼ li nekeʼpaabʼank.
40 Joʼkan naq, weent teebʼaanu re naq inkʼaʼ teekʼul joʼ naxye saʼ xhuhebʼ li Propeet:
41 “Laaʼex li nawulak cheeru xseʼenkilebʼ li junchʼol. Ilomaq li kʼanjel li yookin xbʼaanunkil saʼebʼ li kutan aʼin. Maajoqʼe teepaabʼ li kʼanjel aʼin usta tseeraqʼimanq eere chi tzʼaqal re ru. Abʼan tsachq eechʼool ut texkamq”».
42 Joʼkan bʼiʼ, naq yookebʼ chi elk, ebʼ li qas qiitzʼin xeʼxye rehebʼ naq teʼaatinaq wiʼ chik chirix aʼin saʼ li jun chik sábado.*
43 Naq kiraqeʼk li chʼutam saʼ li naʼaj re loqʼonink, naabʼalebʼ laj judiiy ut ebʼ li xeʼok chi paabʼank saʼ xyanqebʼ laj judiiy li nekeʼxloqʼoni li Yos, xeʼxtaqe laj Pablo ut laj Bernabé. Ut xeʼaatinak rikʼin li tenamit ut xeʼxye rehebʼ naq junelik teʼxkʼe xchʼool chi wank saʼ li xnimal rusilal li Yos.
44 Saʼ li jun chik sábado* kachʼin chik ma chixjunil li tenamit kixchʼutubʼ ribʼ re rabʼinkil li raatin li Jehobʼa.*
45 Naq ebʼ laj judiiy xeʼril li kʼiila tenamit, xeʼok xkaqalinkil ut xyeebʼal naq moko yaal ta li naxye laj Pablo ut xeʼok ajwiʼ xyeebʼal li inkʼaʼ us chirix.
46 Tojaʼ naq laj Pablo ut laj Bernabé xeʼxye rehebʼ chi kawebʼ ru xchʼool: «Aajel ru naq eere raj xbʼeenwa xqaye resil li raatin li Yos. Abʼan saʼ xkʼabʼaʼ naq xeetzʼeqtaana ut nekeekʼoxla naq moko eekʼulubʼ ta xkʼulbʼal li junelik yuʼam..., tooxik rikʼinebʼ li maawaʼebʼ aj judiiy.
47 Li Jehobʼa* xooxtaqla xbʼaanunkil aʼin naq kixye: “Xatinxaqabʼ joʼ xsaqenkil ebʼ li tenamit re naq taakʼam li kolbʼa ibʼ saʼ chixjunil li ruuchichʼochʼ”».
48 Naq ebʼ li tenamit xeʼrabʼi aʼin xeʼsahoʼk saʼ xchʼool ut xeʼok xkʼebʼal xloqʼal li raatin li Jehobʼa,* ut chixjunilebʼ li nekeʼraj wank saʼ xbʼehil li junelik yuʼam xeʼok chi paabʼank.
49 Ut li raatin li Jehobʼa* kiwulak saʼ chixjunil li teep.
50 Abʼan ebʼ laj judiiy xeʼxbʼaanu naq ebʼ li ixq li wankebʼ xwankil li qʼaxal nekeʼroxloqʼi li Yos ut ebʼ li winq li wankebʼ xwankil saʼ li tenamit teʼxpoqoqi ribʼ* ut xeʼok xrahobʼtesinkil laj Pablo ut laj Bernabé ut xeʼisiik saʼ li teep.
51 Joʼkan naq xeʼxchiqʼchiqʼi li poqs chi roqebʼ* ut xkohebʼ Iconio.
52 Ut ebʼ li nekeʼtaqenk re li Jesús qʼaxal sahebʼ saʼ xchʼool ut nujenaqebʼ chi santil musiqʼej.
Xtzʼaqobʼ ebʼ li naʼlebʼ
^ Aʼin naraj xyeebʼal, laj Herodes Antipas. Taawil xchʼolobʼankil li aatin, Herodes.
^ Taawil xchʼolobʼankil li aatin, Jehobʼa.
^ Malaj «xeʼxkanabʼ waʼak chiru jarubʼaq kutan».
^ Malaj «xeʼxkanabʼ waʼak chiru jarubʼaq kutan».
^ Saʼ griego «li Diʼaabʼ». Taawil xchʼolobʼankil li aatin, Diʼaabʼ.
^ Taawil xchʼolobʼankil li aatin, Jehobʼa.
^ Taawil xchʼolobʼankil li aatin, Jehobʼa.
^ Taawil xchʼolobʼankil li aatin, Jehobʼa.
^ Taawil xchʼolobʼankil li aatin, sábado.
^ Malaj «li xperxaabʼ».
^ Malaj «re xkʼixbʼal».
^ Taawil xchʼolobʼankil li aatin, sábado.
^ Arin yook chi aatinak chirix li salmo 2.
^ Malaj «kixbʼaanu li rajom li Yos».
^ Taawil xchʼolobʼankil li aatin, sábado.
^ Taawil xchʼolobʼankil li aatin, sábado.
^ Taawil xchʼolobʼankil li aatin, Jehobʼa.
^ Taawil xchʼolobʼankil li aatin, Jehobʼa.
^ Taawil xchʼolobʼankil li aatin, Jehobʼa.
^ Taawil xchʼolobʼankil li aatin, Jehobʼa.
^ Malaj «teʼxmululi ribʼ».
^ Naq junaq li qas qiitzʼin naxchiqʼ li poqs chi roq naxkʼutbʼesi naq moko aʼan ta chik wank maak saʼ xbʼeen.
