Hechos 19:1-41
19 Naq laj Apolos wank chaq Corinto, laj Pablo kinumeʼk saʼebʼ li teep kʼicheʼ ru ut kikubʼeek Éfeso. Aran kixtaw wiibʼ oxibʼ rehebʼ li nekeʼtaqenk re li Jesús
2 ut kixpatzʼ rehebʼ: «Ma xeekʼul li santil musiqʼej naq xexʼok chi paabʼank?». Ut ebʼ aʼan xeʼxye re: «Maajunwa qabʼihom naq wank li santil musiqʼej».
3 Aʼan kixye rehebʼ: «Kʼaru li kubʼihaʼ xeekʼul chi joʼkanan?». Ebʼ aʼan xeʼxye re: «Li kubʼihaʼ li kixkʼut laj Juan».
4 Li apóstol Pablo kixye: «Laj Juan kikubʼsink haʼ re naq ebʼ li qas qiitzʼin teʼxkʼutbʼesi naq xeʼxyotʼ xchʼool ut xeʼxjal xnaʼlebʼ ut kixye re li tenamit naq teʼxpaabʼ li Jesús li tchalq chirix laj Juan».
5 Naq xeʼrabʼi aʼin, xeʼkubʼeek xhaʼ saʼ xkʼabʼaʼ li Qaawaʼ Jesús.
6 Naq li apóstol Pablo kixkʼe li ruqʼ saʼ xbʼeenebʼ li xjolom, li santil musiqʼej kichalk saʼ xbʼeenebʼ ut xeʼok chi aatinak saʼ jalan jalanq chi aatinobʼaal ut xeʼok chi aatinak joʼ propeet.
7 Kabʼlaju tana chixjunilebʼ li winq.
8 Joʼkan bʼiʼ, kiʼok saʼ li naʼaj re loqʼonink ut chi maakʼaʼ xxiw kiʼaatinak chiru oxibʼ po. Kixtzolebʼ li tenamit ut kinaʼlebʼak rikʼinebʼ re naq teʼxkʼulubʼa li Xʼawabʼejilal li Yos.
9 Abʼan wankebʼ tik inkʼaʼ xeʼabʼink ut inkʼaʼ xeʼraj paabʼank ut yookebʼ xyeebʼal li inkʼaʼ us chirix li Xbʼe li Yos rehebʼ li qas qiitzʼin. Joʼkan naq, kixkanabʼebʼ ut kirisi ebʼ li nekeʼtaqenk re li Jesús saʼ xyanqebʼ li qas qiitzʼin aʼin. Ut wulaj wulaj kikʼutuk saʼ li xtzolebʼaal laj Tirano.
10 Joʼkan kixbʼaanu chiru wiibʼ chihabʼ, joʼkan naq chixjunilebʼ li wankebʼ saʼ xweent Asia, joʼ aj judiiy joʼ aj griego, xeʼrabʼi li raatin li Qaawaʼ.
11 Ut li Yos inkʼaʼ kixkanabʼ xbʼaanunkil ebʼ li xninqal ru sachbʼachʼoolej ut kiroksi li apóstol Pablo re xbʼaanunkil aʼin.
12 Ut li tʼikr ut li sut li ak xchʼeʼ li apóstol Pablo nekeʼxkʼam rehebʼ li yaj, ut ebʼ li yaj aʼin nekeʼkʼiraak ut nekeʼelk li maaʼus aj musiqʼej rikʼinebʼ.
13 Abʼan wiibʼ oxibʼ rehebʼ laj judiiy li nekeʼxik saʼ jalan jalanq chi naʼaj re risinkilebʼ li maaʼus aj musiqʼej, xeʼxyal ajwiʼ roksinkil li xkʼabʼaʼ li Qaawaʼ Jesús rikʼinebʼ li echaninbʼilebʼ xbʼaanebʼ li maaʼus aj musiqʼej. Nekeʼxye: «Laaʼin ninye eere saʼ xkʼabʼaʼ li Jesús, li naxkʼe chi naweʼk laj Pablo, elenqex».
14 Aʼin li nekeʼxbʼaanu li wuqubʼ chi ralal laj Esceva, xyuwaʼil aj tij ut aj judiiy.
15 Abʼanan jun li maaʼus aj musiqʼej kixye rehebʼ: «Laaʼin ninnaw ru li Jesús ut ninnaw ani laj Pablo. Abʼan laaʼex anihex?».
16 Tojaʼ naq li winq li echaninbʼil xbʼaan li maaʼus aj musiqʼej kixkut ribʼ saʼ xbʼeen li junjunq toj reetal naq kixqʼax ru chixjunilebʼ. Ut chixjunilebʼ xeʼelk chi tʼustʼu saʼ li ochoch aʼan ut rahobʼtesinbʼilebʼ.
17 Chixjunilebʼ laj judiiy ut ebʼ laj griego li wankebʼ Éfeso xeʼrabʼi li kikʼulmank. Joʼkan naq xeʼxuwak ut ebʼ li qas qiitzʼin inkʼaʼ nekeʼxkanabʼ xnimankil li xkʼabʼaʼ li Qaawaʼ Jesús.
18 Ut naabʼal rehebʼ li xeʼok chi paabʼank, nekeʼxye chaq li xmaak ut nekeʼxye chaq chi kutankil li xbʼaanuhomebʼ.
19 Joʼkan naq naabʼalebʼ li qas qiitzʼin li xeʼxbʼaanu jalan jalanq li naʼlebʼ rikʼin li xtenqʼ ebʼ li maaʼus aj musiqʼej xeʼxchʼutubʼ ebʼ li xhu ut xeʼxkʼat chiru li komonil. Xeʼxbʼir rix ut xeʼxkʼe reetal naq 50,000 tumin re plaat okenaq saʼebʼ li hu aʼin.
20 Chi joʼkaʼin li raatin li Jehobʼa* inkʼaʼ kixkanabʼ wulak yalaq bʼar, ut elk chiʼubʼej.
21 Naq ak xnumeʼk chixjunil aʼin, laj Pablo kixkʼubʼ saʼ xchʼool naq xbʼeenwa txik Macedonia ut Acaya tojaʼ naq txik Jerusalén. Ut kixye ajwiʼ: «Naq ak xkohin aran, tinxik ajwiʼ Roma».
22 Tojaʼ naq kixtaqla aran Macedonia wiibʼ aj tenqʼahom re aʼ laj Timoteo ut laj Erasto. Abʼanan, aʼan toj kikanaak jun kʼamok chik saʼ xweent Asia.
23 Chiruhebʼ li kutan aʼan kichalk jun li nimla chʼaʼajkilal saʼ xkʼabʼaʼ li Xbʼe li Yos.
24 Aran wank chaq jun li winq aj Demetrio xkʼabʼaʼ, li naxkʼanjela li plaat. Li winq aʼin naxyiibʼ rikʼin plaat li kokʼ ochoch re li xʼÁrtemis, li xyosebʼ, ut chi joʼkan nekeʼxtaw xtzʼaqobʼ xtumin ebʼ li nekeʼxkʼanjela li plaat.
25 Tojaʼ naq laj Demetrio kixchʼutubʼebʼ li rechkʼanjel ut ebʼ li nekeʼxkʼanjela li plaat ut kixye: «Ex inkomon, laaʼex nekeenaw naq rikʼin li kʼanjel aʼin naqataw xtzʼaqobʼ qatumin.
26 Ut anaqwan yookex rilbʼal ut rabʼinkil naq laj Pablo kixbʼaanu naq naabʼalebʼ li qas qiitzʼin teʼoq chi paabʼank ut kixbʼaanu naq teʼxjal xkʼaʼuxl naq kixye rehebʼ naq li yos li yiibʼanbʼil rikʼin uqʼej moko tzʼaqal yosebʼ ta. Kixbʼaanu aʼin saʼ Éfeso ut kachʼin chik ma saʼ chixjunil Asia.
27 Ut moko kaʼaj tawiʼ aʼin, maare ebʼ li qas qiitzʼin inkʼaʼ chik us teʼaatinaq chirix li qakʼanjel ut teʼxtzʼeqtaana li rochoch li xʼÁrtemis, xnimal ru yos. Ut li yos aʼin li naloqʼoniik ru saʼ xweent Asia ut saʼ chixjunil li ruuchichʼochʼ, inkʼaʼ chik tnimaaq ru».
28 Naq xeʼrabʼi aʼin, kʼajoʼ naq xeʼchalk xjosqʼil ebʼ li winq ut japjokebʼ re chi xyeebʼal: «Nim xwankil li xʼÁrtemis, xyosebʼ laj Éfeso!».
29 Joʼkan naq kiwakliik chaq jun li nimla poqoqink ibʼ* saʼ tenamit ut saʼ komonil xkohebʼ saʼ aanil saʼ li naʼaj bʼarwiʼ nawank li kʼutbʼesink ut yookebʼ xjukukinkil laj Gayo ut laj Aristarco. Li wiibʼ chi winq aʼin aj Macedonia ut rechbʼihajil li apóstol Pablo.
30 Ut li apóstol Pablo kiraj ok bʼarwiʼ wankebʼ li qas qiitzʼin, abʼan ebʼ li nekeʼtaqenk re li Jesús xeʼxram chiru.
31 Wiibʼ oxibʼ li winq li nekeʼxjolomi li ninqʼe ut li bʼatzʼunk xeʼxtaqla jun li esil re li apóstol Pablo ut xeʼxtzʼaama re, naq inkʼaʼ txik saʼ li naʼaj bʼarwiʼ nawank li kʼutbʼesink re naq inkʼaʼ tixkʼe saʼ xiwxiw li xyuʼam. Ebʼ li winq aʼin ramiiwebʼ laj Pablo.
32 Naq yook chi kʼulmank aʼin, li kʼiila tenamit japjo re chi xyeebʼal jalan jalanq li naʼlebʼ xbʼaan naq sachsokebʼ. Ut li xkʼihalil ebʼ li qas qiitzʼin inkʼaʼ nekeʼxnaw kʼaru xyaalal naq xeʼxchʼutubʼ ribʼ.
33 Joʼkan naq saʼ xyanq li kʼiila tenamit xeʼrisi laj Alejandro li xtikʼisiik toj chiru xbʼaanebʼ laj judiiy. Laj Alejandro kirekʼasi li ruqʼ re xchʼolobʼankil chiru li tenamit li yook chi kʼulmank rikʼin.
34 Abʼan naq xeʼxkʼe reetal naq aj judiiy, junxikikebʼ chi xjapbʼal rehebʼ. Ut chiru wiibʼ hoor xeʼxye: «Nim xwankil li xʼÁrtemis, xyosebʼ laj Éfeso!».
35 Naq li winq li najolomink re li poopol ak xtuqubʼ xchʼool li kʼiila tenamit, kixye: «Ex aj Éfeso, ani inkʼaʼ naxnaw naq li tenamit Éfeso aʼan li nakʼaakʼalenk re li rochoch li xʼÁrtemis, xnimal ru yos ut naq li xjalam u chalenaq saʼ choxa?
36 Maaʼani naru naxye naq moko yaal ta aʼin, joʼkan naq miʼok eekʼaʼuxl ut maakʼaʼ teebʼaanu saʼ junpaat.
37 Ebʼ li winq aʼin li xeekʼamebʼ chaq arin moko nekeʼelqʼak ta saʼebʼ li rochoch li yos chi moko nekeʼxye ta li inkʼaʼ us chirix li xʼÁrtemis, li qayos.
38 Joʼkan bʼiʼ, wi laj Demetrio ut ebʼ li nekeʼxkʼanjela li plaat yookebʼ xqʼabʼankil junaq li qas qiitzʼin, aʼan ajʼe naq wank xkutankil naq teeto li raqlebʼaal aatin ut wankebʼ li ruuchil awabʼej. Ut chiruhebʼ aʼan teʼxye chaq li xmaak chiribʼilebʼ ribʼ.
39 Abʼan, wi toj yookex xsikʼbʼal roq ruqʼ li naʼlebʼ aʼin, ttuqlaaq ru saʼ jun li chʼutam bʼarwiʼ nekeʼtzʼaqonk ebʼ li qas qiitzʼin li bʼoqbʼilebʼ xbʼaanebʼ laj kʼaakʼalenel re li tenamit.
40 Wanko saʼ chʼaʼajkilal rikʼin li xkʼulmank anaqwan, naru nokooʼeʼxqʼabʼa chi xqʼetbʼal qibʼ chiru li awabʼejilal ut inkʼaʼ xooruuk xkʼutbʼesinkil kʼaʼut xwank li poqoqink ibʼ».*
41 Naq ak kixye aʼin, kixchaqʼrabʼi li kʼiila tenamit.
Xtzʼaqobʼ ebʼ li naʼlebʼ
^ Taawil xchʼolobʼankil li aatin, Jehobʼa.
^ Malaj «li nimla mululink ibʼ».
^ Malaj «li mululink ibʼ».
