Hechos 22:1-30
22 «Ex wechpaabʼanel ut ex yuwaʼbʼej, abʼihomaq anaqwan li ok we xyeebʼal eere chirix li kikʼulmank».
2 Naq xeʼrabʼi naq yook raatinankilebʼ saʼ hebreo, maaʼani chik kiʼekʼank. Tojaʼ naq kixye wiʼ chik rehebʼ:
3 «Laaʼin aj judiiy, xinyoʼlaak Tarso saʼ xweent Cilicia, abʼan tzolbʼilin xbʼaan laj Gamaliel saʼ li tenamit aʼin. Xeʼxkʼut chiwu xpaabʼankil chi tzʼaqal re ru li Xchaqʼrabʼ li qaxeʼtoon ut ninloqʼoni li Yos chi anchal inchʼool joʼ nekeebʼaanu laaʼex anaqwan.
4 Xinchapebʼ li nekeʼtzʼaqonk saʼ li Xbʼe li Yos re naq teʼkamsiiq, xinbʼakʼebʼ ut xinkʼehebʼ saʼ tzʼalam joʼ winq joʼ ixq,
5 joʼ teʼruuq xkʼebʼal chi naweʼk li xyuwaʼil aj tij ut chixjunilebʼ li cheekel winq. Xeʼxkʼe we ebʼ li esilhu choʼq rehebʼ laj paabʼanel re Damasco. Xkohin aran chi xkʼambʼalebʼ chi bʼakʼbʼo li wankebʼ saʼ Xbʼe li Yos re naq teʼrahobʼtesiiq arin Jerusalén.
6 »Abʼan, naq yookin chi xik saʼ linbʼihaaj ut nachʼ wankin rikʼin Damasco, jun li nimla saqenk li kichalk saʼ choxa kisutunk we saʼ junpaat. Tuqtu tana waʼlebʼ xinkʼul aʼin.
7 Tojaʼ naq xintʼaneʼk chiru chʼochʼ ut xwabʼi jun li yaabʼ kuxej li yook xyeebʼal we: “Saulo, Saulo, kʼaʼut xikʼ nikinaawil?”.
8 Laaʼin xinye re: “Anihat Qaawaʼ?”. Ut aʼan kixye we: “Laaʼin li Jesús laj Nazaret li xikʼ nakaawil”.
9 Joʼkan bʼiʼ, ebʼ li winq li yookebʼ chi ochbʼeenink we xeʼril li saqenk abʼan inkʼaʼ xeʼrabʼi xyaabʼ xkux li yook chi aatinank we.
10 Tojaʼ naq xinye: “Kʼaru tinbʼaanu Qaawaʼ?”. Li Qaawaʼ kixye we: “Waklin, ayu Damasco ut aran teʼxye aawe chixjunil li xkʼubʼamank naq taabʼaanu”.
11 Xbʼaan xlemtzʼunkil li saqenk inkʼaʼ chik xinruuk chi ilok joʼkan naq ebʼ li winq li wankebʼ wochbʼeen xineʼxchʼilo ut xineʼxkʼam Damasco.
12 »Chirix chik aʼan kichalk wikʼin jun li winq aj Ananías xkʼabʼaʼ. Li winq aʼin naxloqʼoni li Yos chi anchal xchʼool ut naxpaabʼ li Xchaqʼrabʼ laj Moisés. Chixjunilebʼ laj judiiy li wankebʼ aran chaabʼil nekeʼaatinak chirix.
13 Kixaqli chinkʼatq ut kixye we: “Saulo, at wiitzʼin, chi teehonq saʼ laawu!”. Ut saʼ ajwiʼ li hoonal aʼan xintaqsi li wilobʼaal ut xwil ru.
14 Laj Ananías kixye we: “Li Xyos ebʼ li qaxeʼtoon kixsikʼ aawu re naq taanaw li rajom ut re naq taawil li tiik xchʼool ut taawabʼi ebʼ li aatin chi xtzʼuumal re.
15 Xbʼaan naq laaʼataq xtestiiw chiru chixjunilebʼ li winq chirix li xaawil ut xaawabʼi.
16 Kʼaru nakaawoybʼeni chi joʼkanan? Waklin ut chikubʼeeq aahaʼ. Ut re naq li Yos tixkuy aamaak tento taapaabʼ li xkʼabʼaʼ li Jesús”.
17 »Joʼkan bʼiʼ, naq xinsutqʼiik Jerusalén ut yookin chi tijok saʼ rochoch li Yos, sachamil inkʼaʼuxl
18 ut xwil ru. Ut kixye we: “Seebʼa aawibʼ ut elen saʼ junpaat aran Jerusalén xbʼaan naq inkʼaʼ teʼxkʼulubʼa li taakʼe chi naweʼk chiwix”.
19 Ut xinye: “At Qaawaʼ, aʼanebʼ nekeʼxnaw chiʼus naq laaʼin ninwulak saʼebʼ li naʼaj re loqʼonink re xkʼebʼalebʼ saʼ tzʼalam ut xrahobʼtesinbʼilebʼ li nakateʼxpaabʼ.
20 Ut naq yookebʼ xkamsinkil laj Esteban laatestiiw, wankin aran. Xinkʼulubʼa chixjunil ut xinkʼula li xtʼikrebʼ li yookebʼ chi kamsink re”.
21 Usta joʼkan, aʼan kixye we: “Ayu xbʼaan naq tatintaqla saʼebʼ li najtil tenamit”».
22 Joʼkan bʼiʼ, ebʼ li qas qiitzʼin xeʼxkuy rabʼinkil toj saʼ li hoonal aʼan. Abʼan chirix chik aʼan xeʼxjap re chi xyeebʼal: «Isi saʼ ruuchichʼochʼ li winq aʼin! Moko xkʼulubʼ ta naq wanq xyuʼam!».
23 Saʼ xkʼabʼaʼ naq japjokebʼ re, yookebʼ xkutbʼal li xtʼikrebʼ li nekeʼxlan wiʼ ribʼebʼ ut yookebʼ xkutbʼal li poqs chiru iqʼ,
24 li najolomink rehebʼ laj puubʼ, kixye naq tento teʼxchʼik laj Pablo saʼ xnaʼajebʼ laj puubʼ. Kixye ajwiʼ naq inkʼaʼ teʼxkanabʼ xkʼebʼal chi tzʼuum* toj reetal naq tixye li kixbʼaanu xbʼaan naq aʼan kiraj xnawbʼal chi tzʼaqal re ru kʼaʼut japjokebʼ re li qas qiitzʼin chi xyeebʼal naq tkamsiiq.
25 Naq xeʼxbʼakʼ re xkʼebʼal chi tzʼuum,* laj Pablo kixye re li winq li nataqlank rehebʼ laj puubʼ* li wank aran: «Ma kʼulubʼanbʼil xbʼaan li chaqʼrabʼ naq teekʼe chi tzʼuum* junaq li winq li xyoʼlaak Roma li toj maajiʼ naraqmank aatin saʼ xbʼeen?».
26 Naq kirabʼi aʼin, li winq li nataqlank rehebʼ laj puubʼ* xkoho rikʼin li najolomink rehebʼ laj puubʼ ut kixye re: «Kʼaru nakaakʼoxla xbʼaanunkil? Xbʼaan naq li winq aʼin aj Roma».
27 Joʼkan naq li najolomink rehebʼ laj puubʼ xkoho bʼarwiʼ wank aʼan ut kixpatzʼ re: «Ye we, ma laaʼat aj Roma?». Aʼan kixye re: «Laaʼin».
28 Li najolomink rehebʼ laj puubʼ kixye: «Laaʼin naabʼal li tumin xintoj re naq tinwanq choʼq aj Roma». Ut laj Pablo kixye re: «Abʼan laaʼin aj Roma chalen saʼ linyoʼlajik».
29 Ebʼ laj puubʼ li okebʼ re xbʼaanunkil jalan jalanq chi patzʼom ut xkʼebʼal chi tzʼuum* laj Pablo, xeʼxkanabʼ saʼ junpaat. Li najolomink rehebʼ laj puubʼ kichalk xxiw naq kixnaw naq laj Pablo aj Roma ut naq aʼan kixbʼakʼ chi kareen.
30 Saʼ xkʼabʼaʼ naq kiraj xnawbʼal chi tzʼaqal re ru kʼaʼut ebʼ laj judiiy yookebʼ xqʼabʼankil laj Pablo, wulajaq chik kixkanabʼ chi xik ut kixtaqla xyeebʼal naq teʼxchʼutubʼ ribʼ ebʼ li xbʼeenil aj tij ut chixjunilebʼ li nekeʼtzʼaqonk saʼ li Nimla Raqlebʼaal Aatin* rehebʼ laj judiiy. Tojaʼ naq kixbʼaanu naq tkubʼeeq chaq laj Pablo ut kixxaqabʼ chiruhebʼ.
Xtzʼaqobʼ ebʼ li naʼlebʼ
^ Taawil xchʼolobʼankil li aatin, kʼehok chi tzʼuum.
^ Taawil xchʼolobʼankil li aatin, kʼehok chi tzʼuum.
^ Li winq aʼin xaqabʼanbʼil re xtaqlankil jun siʼeent aj puubʼ.
^ Taawil xchʼolobʼankil li aatin, kʼehok chi tzʼuum.
^ Li winq aʼin xaqabʼanbʼil re xtaqlankil jun siʼeent aj puubʼ.
^ Taawil xchʼolobʼankil li aatin, kʼehok chi tzʼuum.
^ Malaj «saʼ li Sanedrín».
