Hechos 23:1-35
23 Laj Pablo kikanaak xkaʼyankil chixjunilebʼ li nekeʼtzʼaqonk saʼ li Nimla Raqlebʼaal Aatin* rehebʼ laj judiiy, tojaʼ naq kixye: «Ex was wiitzʼin, naru ninye chiru li Yos naq linchʼool* naxye we naq chalen junxil toj anaqwan maajunwa xinbʼaanu li inkʼaʼ us».
2 Naq kirabʼi aʼin, laj Ananías, xyuwaʼil aj tij, kixye rehebʼ li wankebʼ chixkʼatq laj Pablo naq teʼxsakʼ saʼ re.
3 Tojaʼ naq laj Pablo kixye re: «Li Yos tsakʼoq aawe, at aj kaʼpakʼal u.* Laaʼat chunchukat chi raqok aatin saʼ inbʼeen joʼ naxye li Chaqʼrabʼ, ut yookat ajwiʼ xqʼetbʼal li Chaqʼrabʼ rikʼin xtaqlankil naq tineʼxsakʼ».
4 Li wankebʼ chixkʼatq laj Pablo xeʼxye re: «Yookat xhobʼal li xyuwaʼil aj tij li nakʼanjelak chiru li Yos».
5 Laj Pablo kixye rehebʼ: «Ex was wiitzʼin, inkʼaʼ ninnaw naq aʼan xyuwaʼil aj tij. Xbʼaan naq tzʼiibʼanbʼil: “Maahobʼ ebʼ li nekeʼjolomink saʼ laatenamit”».
6 Joʼkan bʼiʼ, saʼ xkʼabʼaʼ naq laj Pablo naxnaw naq saʼ li Nimla Raqlebʼaal Aatin* rehebʼ laj judiiy wankebʼ aj saduseey ut ebʼ aj pariseey, chi kaw xyaabʼ xkux kixye: «Ex was wiitzʼin, laaʼin aj pariseey ut ralalin aj pariseey. Anaqwan yook chi raqmank aatin saʼ inbʼeen xbʼaan naq ninpaabʼ naq ebʼ li kamenaq teʼwaklesiiq chi yoʼyo».
7 Rikʼin li kixye laj Pablo, ebʼ laj pariseey ut ebʼ laj saduseey xeʼok xchoqinkil ribʼ ut li kʼiila tenamit kixjach ribʼ
8 xbʼaan naq ebʼ laj saduseey inkʼaʼ nekeʼxpaabʼ naq wank li wakliik chi yoʼyo, chi moko nekeʼxpaabʼ naq wankebʼ li ánjel, abʼan ebʼ laj pariseey nekeʼxpaabʼ chixjunil aʼin.
9 Joʼkan naq xeʼok xjapbʼal rehebʼ. Tojaʼ naq xeʼwakliik wiibʼ oxibʼ laj tzʼiibʼ li nekeʼtaqenk rehebʼ laj pariseey ut xeʼok xhobʼal ribʼ. Ut nekeʼxye: «Inkʼaʼ naqataw xmaak li winq aʼin. Ut wi jun li ánjel kiʼaatinank re?».
10 Naq kixkʼe reetal naq ebʼ li qas qiitzʼin inkʼaʼ nekeʼxkanabʼ choqink, li najolomink rehebʼ laj puubʼ kiʼok xxiw xbʼaan naq kixkʼoxla naq teʼxkamsi laj Pablo. Joʼkan naq kixtaqla xyeebʼal rehebʼ laj puubʼ naq teʼkubʼeeq chaq re naq teʼrisi ut teʼxkʼam aran laj Pablo saʼ xnaʼajebʼ laj puubʼ.
11 Abʼan saʼ li qʼoqyink ajwiʼ aʼan kutamil li Qaawaʼ chixkʼatq laj Pablo ut kixye re: «Kawaq aachʼool! Joʼ chanru naq xaakʼe chi naweʼk chiwix chi tzʼaqal re ru aran Jerusalén, taakʼe ajwiʼ chi naweʼk aran Roma».
12 Naq kisaqewk, ebʼ laj judiiy xeʼxkʼubʼ chanru teʼxkamsi ut xeʼxye naq inkʼaʼ teʼwaʼaq chi moko teʼukʼaq wi toj maajiʼ nekeʼxkamsi laj Pablo ut naru nachalk junaq li rahilal saʼ xbʼeenebʼ wi inkʼaʼ nekeʼxbʼaanu li xeʼxye.
13 Numenaq 40 chi winq li xeʼxkʼe li raatin ut xeʼxkʼubʼ xkamsinkil.
14 Tojaʼ naq xkohebʼ rilbʼal ebʼ li xbʼeenil aj tij ut ebʼ li cheekel winq ut xeʼxye rehebʼ: «Xqaye naq inkʼaʼ toowaʼaq chi moko tooʼukʼaq wi toj maajiʼ naqakamsi laj Pablo ut naru nachalk junaq li rahilal saʼ qabʼeen wi inkʼaʼ naqabʼaanu li xqaye.
15 Joʼkan naq aatinaqex laaʼex ut ebʼ li nekeʼtzʼaqonk saʼ li Nimla Raqlebʼaal Aatin* rehebʼ laj judiiy rikʼin li najolomink rehebʼ laj puubʼ re naq tixkubʼsi laj Pablo bʼarwiʼ wankex, ut teebʼaanu eeribʼ naq nekeeraj xnawbʼal chiʼus li kixbʼaanu. Ut laaʼo ak kawresinbʼilaqo re xkamsinkil naq twulaq».
16 Abʼanan, li xyum li ranabʼ laj Pablo kirabʼi naq ebʼ li winq teʼxmuq ribʼ ut maakʼaʼ saʼ xchʼool naq teʼxkut ribʼ saʼ xbʼeen laj Pablo. Joʼkan naq li saaj al xkoho saʼ xnaʼajebʼ laj puubʼ ut kixye chaq re laj Pablo.
17 Tojaʼ naq laj Pablo kixbʼoq jun rehebʼ li winq li nataqlank rehebʼ laj puubʼ* ut kixye re: «Kʼam li saaj al aʼin rikʼin li najolomink rehebʼ laj puubʼ xbʼaan naq wank jun li esil choʼq re».
18 Joʼkan bʼiʼ, kixkʼam ut kixxaqabʼ chiru li najolomink rehebʼ laj puubʼ, ut kixye re: «Laj Pablo, laj preex, xinxbʼoq ut kixye we naq tinkʼam chaq aawikʼin li saaj al aʼin xbʼaan naq naraj xyeebʼal aawe jun li esil».
19 Li najolomink rehebʼ laj puubʼ kixchap chi ruqʼ li saaj al, kirisi xjunes ut kixpatzʼ re: «Kʼaru taaye we?».
20 Aʼan kixye re: «Ebʼ laj judiiy xeʼxkʼe ribʼ saʼ aatin re xtzʼaamankil aawe naq taakubʼsi wulaj saʼ li Nimla Raqlebʼaal Aatin* rehebʼ laj judiiy chanchan tawiʼ nekeʼraj xbʼaanunkil naabʼal chik li patzʼom re xnawbʼal li kixbʼaanu.
21 Abʼan maakanabʼ naq tateʼxqʼunbʼesi xbʼaan naq ak xeʼxkawresi numenaq 40 chi winq li teʼxmuq ribʼ ut maakʼaʼ saʼ xchʼool laj Pablo naq teʼxkut ribʼ saʼ xbʼeen. Ebʼ aʼan xeʼxye naq inkʼaʼ teʼwaʼaq chi moko teʼukʼaq wi toj maajiʼ nekeʼxkamsi laj Pablo ut naru nachalk junaq li rahilal saʼ xbʼeenebʼ wi inkʼaʼ nekeʼxbʼaanu li xeʼxye. Yal yookebʼ roybʼeninkil naq taakʼulubʼa li nekeʼraj».
22 Li najolomink rehebʼ laj puubʼ kixkanabʼ chi xik li saaj al, abʼan xbʼeenwa kixye re: «Maaʼani ajʼe taaseeraqʼi li xaaye we».
23 Chirix chik aʼan kixtaqla xbʼoqbʼal wiibʼ li winq li nekeʼtaqlank rehebʼ laj puubʼ* ut kixye rehebʼ: «Kawresimaq wiibʼ siʼeent laj puubʼ re naq teʼxik Cesarea naq kachʼin chik ma bʼeleebʼ hoor re qʼoqyink. Teekʼam ajwiʼ 70 li winq li yookebʼ chirix kawaay ut wiibʼ siʼeent aj puubʼ li wankebʼ xjutzʼcheʼ.*
24 Ut kawresihomaq ebʼ li kawaay re xkʼambʼal laj Pablo, teeril naq maakʼaʼ tixkʼul ut teeqʼaxtesi re laj Félix, ruuchil li awabʼej».
25 Tojaʼ naq kixtzʼiibʼa jun li esilhu li naxye:
26 «At Félix li xnimal ruuchil awabʼej, laaʼin laj Claudio Lisias nintzʼiibʼa aawe li esilhu aʼin re xtaqlankil xsahil aachʼool!
27 Ebʼ laj judiiy xeʼxchap li winq aʼin ut okebʼ raj re xkamsinkil. Abʼan naq xinnaw naq li winq aʼin aj Roma saʼ junpaat xkohin rochbʼeenebʼ laj puubʼ ut xinkol.
28 Xwaj xnawbʼal kʼaʼut yookebʼ xqʼabʼankil joʼkan naq xinkubʼsi saʼ li Nimla Raqlebʼaal Aatin* rehebʼ laj judiiy.
29 Xinnaw naq yookebʼ xqʼabʼankil chirixebʼ li naʼlebʼ li naxchap ribʼ rikʼinebʼ li Xchaqʼrabʼ, ut moko kixbʼaanu ta junaq li maaʼusilal re naq tkamsiiq malaj tkʼeheʼq saʼ tzʼalam.
30 Abʼanan xeʼxkʼe resil we naq xeʼxkʼubʼ xkamsinkil, joʼkan naq saʼ junpaat xintaqla aawikʼin ut xinye rehebʼ laj qʼabʼahom re, naq teʼwulaq aawikʼin chi xyeebʼal kʼaru xmaak li winq aʼin».
31 Joʼkan naq ebʼ laj puubʼ xeʼxpaabʼ li xeʼyeeheʼk re, xeʼxchap laj Pablo ut chiru qʼoqyink xeʼxkʼam Antípatris.
32 Wulajaq chik ebʼ laj puubʼ xeʼsutqʼiik saʼ xnaʼajebʼ, abʼan li yookebʼ chirix kawaay xeʼkanaak rikʼin laj Pablo.
33 Naq xeʼok Cesarea li yookebʼ chirix kawaay, xeʼxqʼaxtesi li esilhu re li ruuchil awabʼej ut xeʼxxaqabʼ ajwiʼ laj Pablo chiru.
34 Tojaʼ naq kiril li esilhu ut kixpatzʼ aj bʼar laj Pablo. Tojaʼ naq kixnaw naq chalenaq saʼ xweent Cilicia.
35 Ut kixye re: «Tinkʼe inchʼool chaawabʼinkil naq teʼwulaq laj qʼabʼahom aawe». Chirix chik aʼan kixtaqla xyeebʼal rehebʼ naq teʼxkʼaakʼale saʼ rochoch li awabʼej Herodes.*
Xtzʼaqobʼ ebʼ li naʼlebʼ
^ Malaj «saʼ li Sanedrín».
^ Taawil xchʼolobʼankil li aatin, chʼool.
^ Malaj «at saqobʼresinbʼil tzʼak».
^ Malaj «saʼ li Sanedrín».
^ Malaj «saʼ li Sanedrín».
^ Li winq aʼin xaqabʼanbʼil re xtaqlankil jun siʼeent aj puubʼ.
^ Malaj «saʼ li Sanedrín».
^ Li junjunq chi winq aʼin xaqabʼanbʼil re xtaqlankil jun siʼeent aj puubʼ.
^ Ebʼ li jutzʼcheʼ aʼin natj roq, wank chʼiichʼ saʼ ruʼuj ut kiʼoksimank saʼ li yalok.
^ Malaj «saʼ li Sanedrín».
^ Aʼin naraj xyeebʼal, laj Herodes Agripa II. Taawil xchʼolobʼankil li aatin, Herodes.
